أنا و عم متولي واحد

مشهد المسجون متولي من فيلم (جائنا البيان التالي) بيديني أمل في الحياة...بيخليني أحس بأني لستُ وحدي

أعتقد الرائع متولي جاب من الآخر لما قال (حسبي الله و نعم الوكيل) و في بداية السنة الجديدة بأطرح سؤال مين يحب يضم صوتة لصوت متولي؟؟

٢٠١٤ بنكهة هيفاء وهبي

عن سنة ٢٠١٤ سأتحدث

طبعاً كلنا في الكام يوم اللي فاتوا دول إبتدينا نعمل شير لبوستات مضمونها نقد لسنة ٢٠١٣ و طبعاً طبعاً الستاتس بتاعة (خشي برجلك اليمين يا ٢٠١٤) إتهرست كتابة.....دا غير بقا الخروجات اللي معا صحابك اللي إتحولت لقعدة ندب و تعديد علي سنة ٢٠١٣ و قد إية هيا كانت وحشة و سنة كحلي داكن و بعد ساعة ونص من الولولة بتتحول لهجة الكلام من النقد و التريقة إلي بوس الأيادي...أيوا كلنا هذا الشخص اللي بيبوس إيد السنة الجديدة إنها متبقاش زي القديمة

من الآخر كدا أنا ملاحظة إن الناس في نهاية كل سنة و بداية سنة جديدة بيسيطر عليها حالة رهيبة من الخوف و الزعر و الفزع من السنة الجديدة...الناس بتستقبل السنة الجديدة و ركبها بتخبط في بعض...تقولش رايحيين ياخدو حقنة...إية يا جماعة عادي!! ٢٠١٣ ماشية و ٢٠١٤ هاتيجي...بس عارفين... أنا والله نفسي سنة ٢٠١٤ تبقي غير...نفسي بجد تبقي غير كل اللي فات

قعدت أفكر...و أحسبها

جبت ورقة وقلم و كتبت إية اللي حصل في سنة ٢٠١٣ ضايقني...إية اللي حصل في ٢٠١٣ خلاني أكرة السنة دي كدا؟؟

طب ما تيجوا إنتوا كمان تفكروا زيي

شوفوا إية السبب اللي خلاكو تبقوا مش طايقين كل سنة بتخلص

طب علي الأقل شوفوا إية سبب كرهكوا للسنة اللي إحنا فيها

فكروا

خدوا وقتكوا

أنا والله عملت زي ما طلبت منكوا

فكرت إية السبب اللي مخليني أبقي مش طايقة السنة الحنينة اللي إحنا فيها دي

وعرفت إية السبب

السبب هو إحنا

أيوا...إحنا

يا جماعة والله إحنا

إنتوا مش مصدقيني صح؟؟...طيب أنا هأكدلكوا كلامي

هي السنة دي مش جماد؟؟

آه جماد

الأيام اللي في السنة مش إحنا اللي بنختار نعمل فيها إية؟؟

آه إحنا اللي بنختار

هو الجماد ممكن يضايق شخص؟؟ بمعني هي الترابيزة ممكن تضايقني؟؟ و أقوم بقا أقفش علي الترابيزة و أكتب علي الفيسبوك أنا بكره الترابيزة اللي ضايقيتني؟؟

لأ طبعاً لأن ماهية الجماد أنة شئ ليس فيه حياة ولا يستطيع الحركة أو اتخاذ القرارات بشأن نفسه أو شأن الاخرين و أن الأشخاص هم من يتحكمون به

طب يا أخوانا كلو يسيب الأقلام اللي في إيدة...خلاص الوقت خلص...هنلم الورق

الورق اللي كتبنا فية إية اللي مضايقنا من سنة ٢٠١٣

أول ورقة معانا بإسم: محمد نبيل

الأخ محمد متضايق من سنة ٢٠٠٠ لحااااد سنة ٢٠١٣ بسبب مراتة و حماتة اللي منكدين علية عيشتة

تاني ورقة بإسم: نيرمين علي

الأستاذة نيرمين متضايقة من سنة ٢٠١٣ عشان البشمهندس الحليوة خطيبها سابها

تالت ورقة بإسم: تهاني السيد فتحي

طنط تهاني متضايقة من سنة ٢٠١٣ بسبب إنها راحت للصحة عشان تغير إسمها من تهاني إلي صافيناز فالموظف رفض طلبها 

رابع ورقة بإسم: رابعة 

رابعة!! طب دا إسم دا ولا إية؟؟

فضلت أحاول أقري تاني بس برضو مكتوب في خانة الإسم رابعة

قلت رابعة رابعة وأنا مالي...فضلت مش فاهمة الإسم لحاد ما قريت مشكلة الشخص مع سنة ٢٠١٣

الأخ أو الأخت رابعة متضايقين من سنة ٢٠١٣ بسبب سقوط شرعية مسيوو مرسي أبو العلمين حمودة

خامس ورقة و سادس و سابع و تامن و عاشر لحاااااد الورقة رقم ٢٠٠

أسباب كرة الناس لسنة ٢٠١٣ كانت محصورة بين: مديرهم في الشغل...إنعدام الأمن في مصر...الأحداث السيئة اللي بتمر بيها البلد...الزبالة اللي مالية الشوارع....واحدة حماتها مطلعة عينها...واحدة مش لاقية عريس....واحد مش لاقي شغل....واحدة جوزها خاين...واحدة إتطلقت...واحد مراتة خلعتة...فقر...مشاكل مالية كبيرة في بيزنس خاص

كدا يعني

شفتوا بقا؟؟

شفتوا إن اللي كان مضايقكوا من السنة هو إحنا

شفتوا إن مفيش سنة وحشة و سنة حلوة

فية ناس حلوة بتخلي السنة تبقي حلوة

و فية ناس وحشة بتخلي السنة تبقي وحشة

يا جماعة هو إحنا إزاي بنتمني إن السنة الجديدة تبقي حلوة و إحنا أصلاً من جوانا مليانين وساخة

و أكتر دليل علي إن إحنا السبب في السنين الوحشة اللي بتمر علينا قول الحق -عز و جل- في سورة الرعد آيه ١١

بسم الله الرحمن الرحيم

إِنَّ اللَّهَ لا يُغَيِّرُ مَا بِقَوْمٍ حَتَّى يُغَيِّرُوا مَا بِأَنفُسِهِمْ

صدق الله العظيم

إحنا كلنا متفقين علي مطلب واحد صح؟

المطلب دا إن سنة ٢٠١٤ تبقي هيفاء وهبي..صح؟؟

طيب ماهو إحنا إتفقنا إن السنة جماد و إن إحنا اللي بنتحكم فيها...صح؟

علي كل فرد أن يقوم بحملة نضافة داخلية

يستخدم أي منظف قوي إنشاالله فنيك

يلا ننضف جوانا من الكدب و الغيرة و الحقد و النفاق و الغل و الأنانية و التمثيل

خلينا زي ما بنهتم أوي بشكلنا الخارجي نهتم بشكلنا من جوا

والله والله والله هتفرق

هتفرق أوي كمان

يا جماعة أرجوكوا خلوا سنة ٢٠١٤ تبقي حلوة

ممكن؟؟

ممكن نتغير؟؟

هينفع؟

صدقوني والله العظيم ولا بلد هيتصلح حالها و لا حد هيعيش سعيد غير لما كلنا نبقي كويسين و بنحب بعض بجد

و دا كان وعد ربنا لينا...لما قالنا إنة مش هيغير حالنا إلا لما نغير نفسنا

أرجوكوا دعونا نفوز بالوعد الإلهي

رسالة إلي الدكتور/ وحيد السباعي

أبي العزيز

إلي الدكتور/وحيد السباعي

أكتب لك رسالتي الأولي

أكتب لك يا أبي رسالتي هذة قائلةً بها كلمات عجزت عن قولها أمامك..فإبنتك خجولة بعض الشيئ ولا تجيد فن الكلام مع من تحب...إبنتك لا تستطيع إخبارك بما داخلها تجاهك إلا عِبر الكتابة

أبي العزيز

أنا بحبك جداً والله

و والله والله مقدرش أتخيل الدنيا من غيرك

أبي العزيز

في طفولتي كنت أب رائع مش قادرة أنسي لما كنت بتدوخ عشان تدورلي علي أي حاجة كان بيبقي نفسي فيها

شايفاك والله قصادي و إنت داخل عليا و العرق علي جبينك و تقولي (يا بوسي يا حبيبتي بابا جابلك اللي كان نفسك فية) أنا وقتها كان بيبقي نفسي أقولك كلام كتير أوي بس مكنتش ببقي عارفة...كنت بختصر كلامي الكتير دا بحضن ليك جامد أوي...حضن مكنش بيخلص غير لما تضحك جامد أوي و تقولي: خلااااص خلاص يا بوسي هموووت من كتر الحضن وتفضل تضحك 

أبي العزيز

في فترة المدرسة و الجامعة كنت أكتر من عظيم

فاكر يا والدي العزيز لما كنت بتوصلني الصبح المدرسة؟؟

فاكر يا والدي العزيز الأچندة اللي كنت بتبقي شايلها في تابلوة عربيتك...الأچندة النبيتي يا والدي..اللي كنت أول ما نوصل قدام باب المدرسة تطلعها و تقعد تسمعلي كلمات الإنجليزي فيها...فاكر يا والدي؟؟

طب فاكر أغنية (الجنة أرضنا و الحنة رملنااااا) اللي كنت بتشغلهالي الصبح في الراديو؟؟ فاكرها؟؟ 

طب فاكر لما كنت أطلب منك تيجي تاخدني بدري من المدرسة؟؟

عارف لما كانوا ييجوا يندهوا عليا في الفصل و يقولوا (بسمة وحيد السباعي) و أروح معاهم و أدخل مكتب المديرة و أشوفك

كنت ببقي مبسوطة أوي أوي يا بابا

كنت ببقي حاسة بأمان ملهوش حدود

فاكر يا والدي دروس ثانوية عامة؟؟

فاكر إنت كنت بتضحي عشاني قد إية؟؟

فاكر يا والدي لما كنت بتوصلني كل الدروس و تفضل قاعد مستنيني مكنتش بتحب تمشي و تسيبني لحسن الدرس يخلص بدري شوية فأنزل ملقكش موجود..فاكر يا بابا؟؟

طب فاكر تانية ثانوي لما أنا مجبتش فيها مجموع كويس؟؟

فاكر إنت زعلت مني قد إيه وقتها؟؟

دي كانت أول مرة تزعل مني فيها

والله يا بابا أنا زعلت جداً وقتها إني زعلتك...حسيت إني خذلتك..حسيت إني ضيعت تعبك معايا

فقررت

 

قررت إن لما تيجي تالتة ثانوي إني هموت نفسي في المذاكرة

وعدتك جوا نفسي إني هشرفك و هرفع راسك فوق في السما

وفعلاً وفيت

فاكر يا بابا؟؟

فاكر مجموعي الكبير اللي أنا جبته في تالتة ثانوي؟

طب فاكر فرحتك ليا لما دخلت الجامعة اللي كان نفسي فيها؟؟

إهتمامك بيا و أنا كبيرة و في الجامعة لم يقل عن إهتمامك بيا و أنا صغيرة

بابا أنا عارفة إن حضرتك ممكن تكون مش فاكر التفاصيل الصغيرة اللي أنا كتبتها...بس أنا متأكدة إنك بعد ما تقرا كلامي 

هتفتكرها

والدي العزيز أنا بنتك الصغيرة...اللي بقت زوجة و أم

والدي العزيز تعبك معايا هو اللي عمل بسمة وحيد السباعي

والدي العزيز شكراً

مع إن الأربع حروف المشتركين في تكوين كلمة (شكراً) مش كفاية والله

والدي العزيز....وجودك سبب وجودي

مهما مرت سنين كتييير علينا....هفضل أنا بوسي بنتك الصغيرة و هتفضل إنت بابا حبيبي اللي بيجيبلي شيكولاتة و أفرح بيها أوي

أبي أنت أجمل و أحن و أعظم و أشجع و أطيب رجل في العالم كلة

بحبك يا أبي

شكراً لك يا من علمني كيف أكون أنا...شكراً يا أبي

مصر في إنتظار الرئيس الخوشافي

نظراً لأن الصين الشقيقة واقفة جمنا في كل حاجة....مظبطانا في كل حاجة 

لبس صيني

جمبري صيني

فوانيس صيني

موبايلات صيني

آيبادات صيني

لعب أطفال صيني

أجهزة كهربائية صيني

سبح صيني

سجاجيد صلاة صيني

فقد أصدر رئيس جمهورية الصين الشعبية (شي جين بينج) قراراً بتصدير رئيس إلي مصر الشقيقة ليناسب المصريين بكل طوائفهم

رئيس متعدد الإتجاهات

رئيس لة العديد من الإنتمائات

رئيس من الآخر كدا خوشااااف

زبيب علي بلح علي قراصية علي مشمشية علي تين

واللي مش عاجبوا صنف من اللي في طبق الخوشاف يسيبوا و يختار حاجة تانية من اللي مالية الطبق

بشري سارة لجميع أحزاب مصر الصين تُقدم لكم الرئيس الخوشافي

رئيس مدني عسكري إخواني

اللي يحب المدني موجود

عسكري موجود

إخواني برضو موجود

و علي الله يعجب

مع إنتظار إعتراض حزب النور

لن ينجح بحثك عن إظهار أي نتائج

الساعة ٦:٤٥ إبتديت في قرائة حيات نيلسون مانديلا علي ويكيبيديا

و خلصت قرايتها الساعة ٩:٣٠

حقيقي...راجل حقيقي

قوتة و مثاليتة خلوني بصراحة أحس بإني عايزة أدور في جوجل علي أي نقد موجة ل نيلسون مانديلا

ملقتش

كتبت

نقد مُوجة ل نيلسون مانديلا

نقد مانديلا

إنتقاد الناس ل مانديلا

عيوب مانديلا

عيوب نيلسون مانديلا

أخطاء مانديلا

و هكذاااا

جربت أعمل سيرش بالعربي و بالإنجليزي دا أنا حتي فضلت أخبط علي جوجل ترانسلتور ل حد ما ترجمت (عيوب مانديلا) بالفرنساوي..و حتي ألماني مسيبتوش

بس النتيجة كانت واحدة

إن جوجل كل النتايج اللي جابتهالي كانت متعلقة بإنجازات و عظمة مانديلا

مفيش عيوب

مفيش نقد

مفيش أخطاء

مانديلا لم تُوجَة لة كلمة نقد واحدة...لأنة راجل عظيم

عظيم مش نفاق ولا مدح مني

حقيقي هو راجل عظيم...جرئ...شجاع...صاحب مبدأ...مكنش بيحارب نظام التفرقة العنصرية سعياً منة إلي منصب ولا كرسي...وهذا ما جعل مانديلا أسطورة

أسطورة نيلسون مانديلا لن تنتهي

 جسد مانديلا قد فارق الحياة

ولكن

مبادئ نيلسون مانديلا المحارب المسالم لن تفارق الحياة

أيها الرائع مانديلا...قصة حياتك من كفاحك حتي وفاتك...قصة قمة في المثالية و إذا حاول أعظم أديب كتابة رواية عن كفاح و شجاعة بطل من نسج خيالة...فلن يستطيع كتابة عُشر قصة حيات نيلسون مانديلا الواقعية

الشاعر الممنوع

مات المناضل المثال 

يا ميت خسارة عَ الرجال

--------------

برغم إن صورك فـ كل الدواير

وكل المداخل وكل المحاور

ومليا الشوارع على كل حيط 

كأنك مفيش

---------------

ممنوع من السفر

ممنوع من الغنى

ممنوع من الاشتياق

ممنوع من الاستياء

وكل يوم في حبك تزيد الممنوعات

وكل يوم بحبك اكتر من الي فات

--------------

الله يرحمك يا عم نجم

٢٤ ساعة

٢٤ ساعة

هحكيلكو إنهاردة حكاية ضايقتني أوي

هحكيلكوا عن حاجة حلوة إنتهت و حاجة وحشة مكملة و مستمرة

هحكيلكوا عن إتنين زي بعض بالظبط في كل حاجة

في أدق التفاصيل زي بعض

قابلو بعض...أعجبوا ببعض

و في ٢٤ ساعة حبوا بعض...أنا عارفة إن اللي أنا بقولهولكوا دا صعب إنكوا تصدقوة

بس والله والله حبوا بعض في أقل من يوم

حصلها موقف مزعج...وقتها حست إنها خايفة أوي

كلمتة

أستنجدت بية

في أقل من ربع ساعة كان قصادها

في أقل من ربع ساعة طار من مكان ما هو و راحلها...فضل بعينة يبصلها عايز يطمنها...نفسة ياخدها في حضنة..فضل يقولها متخافيش. متقلقيش أنا جمبك أهو...بس هي كانت لسة خايفة

بصلها أوي و قالها: بقولك أنا هنا جمبك...أنا هنا 

الغريب إنها إتطمنت و راح الخوف منها

بصتلة و ضحكت و قالتلة: شكراً أوي...إنت أجدع حد شفتة في حياتي

قالها: وإنتي والله قمر...بجد قمر

كلامة ليها خلا وشها يحمر جداً..إتكسفت لإن كلامة كان من جواة..مكنش مجرد مجاملة منة ليها...كلمة قمر سمعتها من عينية....عينية اللي كان مبيرمش بيهم طول ما هي قصادة عشان مكنش عايزها تغيب عن عينة لحظة

وصلها بيتها

و قبل ما تطلع...إعتذرلها إنها إتعرضت للموقف دا بسبب غيابة

بكت

بكت أوي

فضلت تبكي و تبكي

إتخض عليها و قالها: مالك

مالك؟؟؟ في إية بتبكي لية؟؟ لسة خايفة؟؟

مجاوبتوش

بس عارفين هي كانت بتبكي لية؟؟

كانت بتبكي لإن الشاب دا غريب عنها...ميعرفهاش غير من ١٨ ساعة بس...بس شافت منة حب و حنية و رجولة و إهتمام مشفتوش من شاب عارفاة من ٥٧٦٤٧٦٤٧٦٤٧٦٤ ألف مليون ساعة

شافت إنة بيعتذر عن غيابة من مكان هو أصلاً ملهوش مكان فية...و التاني مبيعتذرش عن غيابة من المكان اللي المفروض إنة يكون  موجود فية

هو مكنش فاهم سبب دموعها...بس كان موجوع أوي عشانها و كان عمال يتنطط قصادها عشان يضحكها و يخليها تبطل عياط

إنما التاني بيبقي عارف سبب دموعها...و بيبقي مبسوط أوي...و بيفضل بيتنطط عشان يوجعها أكتر و يخلي دموعها تزيد

حبوا بعض

حنيتة كانت فوق الخيال

الكلام اللي كان بيقولهولها بسكوتُة و بعنية تصرفاتة الجميلة إهتمامة بيها و خوفة عليها كإنها حتة منة

خلاها تحبة

كسرة عينيها و هي بصالة...إستنجادها بية اللي كان باين في نظرة عينيها

خلاه يحبها

في ٢٤ ساعة بس...شافت منة رجولة و حب و حنية خلوها تحبة

في ٢٤ ساعة بس...شاف منها طيبة و حزن و جمال و رقة خلوة يحبها

خلصت عياط و سلم عليها و مشيت

و هو مشي

تاني يوم

إتقابلو...و هما عارفين هما إتقابلوا فين

خلص الموضوع ما بينهم

خلص قبل ما يبتدي

خلص عشان لازم يخلص

خلص 

خلص و رجعت هي لحياتها اللي تنفع

و هو رجع لحياتة اللي تنفع

بس هما الإتنين كان نفسهم يعيشوا في الحياة اللي متنفعش

هي منسيتوش

ولا هو نسيها

بيحبوا بعض من جواهم

آه بيحبوا بعض من جواهم

٢٤ ساعة غيرت حياة إتنين كانوا قد أوشكوا علي الإنتهاء

بس لما قابلوا بعض و حبوا بعض

إتغيروا

بقا عندهم أمل في اللي جاي

الأمل دا يتمثل في

إنهم ممكن تاني يشوفوا بعض

كانوا بيتمنوا إنهم بس يبصوا لبعض...بس

أنا عارفة إنكوا ممكن تبقوا شايفين إن الموضوع اللي أنا بقولهولكوا دا أوڤر

بس والله حقيقي

٢٤ ساعة بتغير كتير...لإنها فعلاً غيرت كتير

والله غيرت كتير

 

حيات نطفة----أوضتي اللي عند ربنا-١٠-

موبيل ماما بيرن

ناناة بتتصل بيها

عمالة تحاول تقنعها إنها متموتنيش

بس برضو ماما مصممة علي قرارها

ناناة قالتلها إنها في الطريق جايلها المستشفي

ماما قالتلها: مافيش داعي تتعبي نفسك أنا كلها ساعتين و لا تلاتة و راجعة البيت

بس برضو ناناة كانت مصممة إنها تيجي

وأنا عايزة أقول ل ناناة متتعبيش نفسك معاها...والله هتموتني و مش هتغير رأيها

قفلت ماما التيليفون و قالتلي

حيات...أنا بحبك أوي والله...أنا أسفة يا حبيبتي

كنت لسة هرد عليها

لقيت صوت خبطتين علي باب أوضتنا

الدكتور وصل

ماما رحبت بية أوي و سلمت علية كمان بالإيد

سألها إذا كانت متأكدة من قرارها

قالتلة آة متأكدة

طلب منها إنها تراجع نفسها و تاخد فرصة تانية يمكن تغير رأيها

ماما...عندك أهو فرصة أخيرة...ما بلاش يا ماما..بلاش بقا

هزتلة راسها ب لأة و قالتلة يلا إبدأ بقا

خد ماما عشان يعملها سونار و يبتدي في العملية 

 وفي الطريق لأوضة السونار...جت أصعب لحظة

لحظة وداعي أنا و ماما 

ماما قالتلي: هتوحشيني يا أحلي بنوتة

قلتلها: وإنتي كمان والله هتوحشيني

قالتلي: متخافيش يا حبيبتي هتتبسطي عند ربنا أكتر من الدنيا الوحشة دي

قلتلها: منا عارفة يا ماما...بس كان نفسي أشوفك و أشوف بابايا

قالتلي: حبيبتي كان نفسي آجي معاكي والله

قلتلها: لأ يا ماما أخاف عليكي مالموت..بلاش ونبي تموتي...أنا هقول لربنا أول ما أروحلوا إنو يبعتلك جوز طيب و ولاد و بنات حلوين و هقول لربنا كمان يخليكي مبسوطة أوي

قالتلي: بحبك يا بنتي...متزعليش

قالتلي: مش زعلانة والله...إنتي بس هتوحشيني..أنا خايفة يا ماما بس عارفة إن ربنا حنين و حلو أوي...و أديني أهو يا ماما يا حبيبتي بتفق معاكي أنا لما أروح لربنا هفضل ألعب طول اليوم  و هقول لربنا يوديني حضانة حلوة فيها أطفال حلوين كتير و هقولوا يجيبلي لعب كتير و هقولوا يعملي أوضة زي اللي شفتها و أنا في بطنك بالظبط..... بس قبل كل دا هطلب منو إنو يخليني كل يوم بعد ما ننام أنا و إنتي نتقابل في حلمنا و ننام في حضن بعض..أوكي يا ماما؟؟ بس ساعة لما أقابلك في حلمنا إبقي ونبي يا ماما كمليلي حدوتة سيندريللا..ونبي يا ماما يا حبيبتي

ماما نايمة عالسرير

إبتدي يحط الچيل علي بطنها

حط السونار

قرب الشاشة منها

أول ما حسيت إن ماما شايفاني

فضلت أتحرك يمين و شمال....أطلع لفوق و أنزل لتحت...كان نفسي تغير رأيها...كان نفسي أكتبلها جواب كبير يمكن و هي بتشوفني علي السونار تقراة و قلبها يحنلي.....كانت آخر فرصة ليا إني أعيش....بس للأسف دورت يميني و شمالي ملقتش ورقة ولا حتي قلم...قررت إني أطبطب عليها بس جامد يمكن لما تحس بلمستي ليها تحبني...والله كان نفسي تحبني...خبطها بإيدي من جوا بطنها..ضحكت و قالت (آااه يا حيات) صوت ضحكة ماما خلاني أبتسم...تصدقوا صوت ضحكتها جميل أوي والله....و في أثناء ما الدكتور بيعمل السونار ناناة جت

باست ماما في راسها و قالتلها: بلاش يا فاطمة...دي بنتك ضناكي...بلاش ونبي

ماما زعقت في ناناة و قالتلها: إية اللي جابك؟؟ 

ناناة عيطت و بصت عليا في الشاشة و قالتلي: مع السلامة يا أحلي بنت..كان نفسي والله أشوفك..بس معلش يا حبيبتي أنا ست عجوزة و كلها كام يوم و أجيلك عند ربنا...و ساعتها بقا هدلعك و هلعب معاكي كل اللعب اللي معرفناش نلعبها في الدنيا...و هجري وراكي و هدلعك...هنعمل قطر كبير و نقول توت توت...هنلعب فَتَحي يا وردة...و هفضل طول مانا معاكي أأكلك...و هجيبلك لعب كتير و هافسحك...إتفقنا يا حيات؟؟

إتفقنا يا ناناة...هستني حضرتك...بس ونبي متتأخريش عليا لحسن أنا خايفة أوي والله ...ولما تيجيلي إبقي هاتيلي معاكي صورة ل ماما ونبي..ها؟؟ متنسيش بقا يا ناناة عشان عايزة أحط صورتها جمبي عالكومود في أوضتي اللي عند ربنا

ماما فضلت بصة ناحية الشاشة جامد

قلت كويس...يمكن تغير رأيها

لاقيتها قالتلي: هتوحشيني والله يا بنت الإية

كلمة هتوحشيني اللي ماما قالتها عرفتني إنها مغيرتش رأيها...وإني كلها ساعة ولا إتنين بالكتير و أترمي تحت التراب

ماما زعقت الدكتور و قالتلة: يلا بقا يا دكتور..هو سونار إية كل دا؟ 

يااااه يا ماما....مش مستحملة حتي تشوفيني في السونار!!...ماما إنتي عارفة إن دي آخر مرة هتشوفيني فيها

عموماً يا ماما متضيقيش نفسك كلها ساعة بالكتير و تخلصي مني

رد عليها الدكتور و قالها: يا مدام صبرك شوية...ثانية واحدة

قالتلة: طيب ياريت بسرعة..و إبعد الشاشة دي عني...مش عايزة أشوفها

ماما...إنتي اية كدا؟؟؟ ماما بجد حرام عليكي...إنتي بتموتيني بالبطيئ

حرام عليكي والله

لية يا ماما بتقولي كدا؟؟ مش عايزة تشوفيني لية؟؟

هو أنا عملتلك اية؟؟ هو إنتي لية كدا؟؟؟؟؟

 

طب كنتي زعلانة لية و إنتي بتودعيني؟؟

ماما...أنا أسفة

أسفة إني إترجيتك إنك متموتنيش...والله أسفة

أنا دلوقتي اللي مش عايزة آجي الدنيا دي

والله مش عايزة آجي

 

مش عايزة غير...إني أموت

 

كرهك ليا مخليني مش قادرة أستني لحد ما الدكتور يموتني

نفسي أموت دلوقتي حالاً

بس برضو والله بحبك يا ماما

يا مدام....مداااااام أنا مش سامع نبض للجنين

مدام فاطمة...الجنين نبضة وقف

الجنين توفي

يتبع

إستفتاء إغلاق أكونتات الفيسبوك للحريم

مجتمع الفيسبوك الأنثوي

المجتمع الأنثوي حصلة تحول رهيب في آخر كام سنة..التحول دا بيتمثل في الفيسبوك

نعم الفيسبوك

أنا هتناول موضوع الفيسبوك الأنثوي دا من حتة خفية مستخبية ميعرفهاش غير حريم الفيسبوك فقط

الفيسبوك أيها الرجال و الشباب تحول إلي مكان للردح المُقنن..للتلقيح الذي ليس لة نهاية

أينعم ردح و تلقيح

بمعني إن واحدة مثلاً مبتحبش واحدة

تقوم تعمل إية؟؟

تكتب ستاتس بتبتدي ب

هي الناس بقت كدا لية؟؟ 

ثم وصلة الردح تلحق ب هذا السؤال الإعتراضي

و من أهم قواعد الردح إنك تبتدي الستاتس ب التعميم ثم تخصص بقا بذكرك صفة خاصة بالمردوح لها

الفيسبوك عالم مثالي للتلقيح و للردح و لحرق دم الناس القابلة للإشتعال

وهناك وجة آخر لإستعمالات الفيسبوك

ألا و هو كاميرة مراقبة

صح ولا إية؟؟

وسيلة مناسبة لبعض حريم الفيسبوك لمراقبة الآخرين

و النوعية دي بقا بتجيبلي حساسية نفس حساسيتي من الموز بالظبط

أيها الرجال...إليكم خطوات فك الشفرة الخاصة بتلقيح الحريم

ركزوا في أي ستاتس زوجاتكم بتكتبها لأن أكيد محتواها في كام طوبة علي كام دبشة موجهة لشخص ما

ركز أكتر لإن ممكن الشخص دا يبقي إنت يا مغفل

البوستات اللي أي أنثي بتعملها شير لازم تكون ليها علاقة لحد يا إما ردح يا إما تلقيح و حتي البوستات الدينية بتلاقيها بتدعي بيها علي حد

أيها الرجال و الشباب المحترمون

ركز...ركز...ثم ركز قبل فوات الأوان

ركز في كل ستاتس أو بوست

وشارك معانا

في

التصويت  

ب

نعم

في إستفتاء (إغلاق أكونتات الحريم الرداحة و الملقحتية و المراقباتية) صوتك مهم

صوتك أمانة

بس وحيات أبوك قول نعم

 نعم للإستقرار...نعم للأمن...نعم للرخاء...نعم للتقدم 

صوتك أمانة

السادات كنزٌ مفقود

القائد مُحمد أنور الســــادات

رحمة الله عليك

محمد أنور السادات....رجل جرئ...محترم...مثقف...شجاع...بسيط...رائع...أنا متحيزالة جداً...السادات قيمة كبيرة أوي عندي

بإختصار شديد

بعد الإطاحة بالملكية في مصر مع قيام ثورة يوليو سنة ١٩٥٢

حتي يوم ٢٥ يناير ٢٠١١

هي

الرئيس القائد العظيم محمد أنور السادات فقط

لم يحكم مصر سوي

السادات فقط

و جاري الآن البحث عن رئيس من أهم صفاتة أن يكون

رَجُل

و كلمة أخيرة

ياريت الرصاصة كانت جت فيك يا حسني

حيات نطفة----حدوتة سيندريللا-٩-

يوم التلات الساعة ٨:٣٠ مستشفي في شبرا 

ماما وصلت لوحدها لإن ناناة و جدو رفضوا يروحوا معاها...رفضوا إنها يشاركوا في قتلي

وصلت ماما المستشفي قبل ميعادها...و دخلت أوضتها...و ابتدت بقي الممرضات في إجراءات تجهيزها للعملية اللي كان ميعادها الساعة ١٢

وفي ال ٣ ساعات اللي فاضلينلي جوا ماما شفت حاجات جميلة أوي مستنياني

معرفش مكانها فين..بس كانت حلوة أوي

شفت جنينة خضرا جميلة أوي تقريباً كدا زي اللي ماما كانت بتحكيلي عليها

شفت مراجيح و لعب كتير

شفت بلالين حمرا و صفرا و بينك

شفت سما زرقا و صافية

حسيت بهوا ريحتة جميلة طايرلي شعري الطويل اللي كان مغطي ضهري

شفت شمس منورة الجنينة أوي

شفت أطفال كتير بيجروا و يلعبوا عمالين يضحكوا...و مبسوطين

شفت بنوتة مامتها واقفه بتمرجحها...شفت ولد صغير أوي بيجري ويا باباة كانوا يظهر عاملين سَبَق

في وقت ما الشمس إبتدا نورها يغيب

كل طفل راح قعد جمب أبوة و أمة....كل طفل راح ل باباة و مامتة عشان ياكل

و أنا واقفة لوحدي...بصيت يميني و شمالي...ملقتش حد

خفت أوي

و كمان كنت جعانة

بس مكنتش لاقية حد أجري علية

فضلت قاعدة علي المرجيحة...لوحدي...الشمس غابت خالص...وأنا برضو لوحدي

في وسط ما أنا بتمرجح

سامعة حد عمال ينادي يقول حيات...حيات...قلت يمكن عيال صحابي بينادولي..فضلت قاعدة عالمرجيحة مقومتش

واحد ست محجبة...وشها طيب أوي...مبتسمة إبتسامة طمنتني...ملامحها حلوة أوي...حقيقي تجنن...جمالها هادي و مريح أوي....الست دي وقفت مسكت إيديا و قالتلي: اية يا حيات يا حبيبتي ؟؟ عمالين ننادي عليكي أنا و باباكي و إنتي مش بتردي خالص

حسيت إن طنط دي تبقي أمي...و لما قَربِت تشيلني عشان تنزلني من علي المرجيحة...ريحتها أكدتلي إنها أمي...صوتها جمب ودني هو صوتها اللي حافظاه

أنا إتفاجأت...والله مصدقتش نفسي.....هو أنا مش لوحدي زي ما كنت فاكرا؟؟ أنا مع بابا و ماما

الله...شكراً يارب

قعدت كلت مع بابا و ماما

في ترابيزة واحدة...عيلة واحدة...ماما يميني...بابا شمالي

ماما طيبة أوي والله و بتحبني

بابا حنين جداً و بيموت فيا

خلصت أكلي كلو...ماما اشترتلي بالونة خضرا...بابا إشترالي شيكولاتة

روحت بيتي...شفت أوضتي...والله شفتها

الحيطان لونها بينك في أبيض...السقف مرسوم علية نجوم كتير...السرير لونة أبيض شكلة تحفة...الأوضة ستايرها بيضا...الأوضة مليانة لعب...دباديب كتير...و عرايس في كل حتة...في الأرض في سجادة بينك...و جمبي عالكومود أباجورة صغيرة..الأباجورة كانت علي شكل دبدوب و لونها أبيض...بس أحلي حاجة في أوضتي...إني لقيت  جمب الأباجورة برواز يجنن..فية صورتنا إحنا التلاتة...أنا في وسط بابا و ماما

ماما لبيستني بيجامتي..و بابا جابلي الكاكاو الدافي عشان أشربو قبل ما أنام....ماما طلعتني عالسرير...بابا باسني وقالي نايتي...ماما غطيتني ب غطا لونة بينك...فضلت قاعد جمبي...بتلعب في شعري...و حكيتلي حدوتة حلوة أوي عن واحدة إسمها سيندريللا

رحت في النوم...كان يوم جميل...وفي وسط بابا و ماما بقا أجمل...بحبكوا جداً يا أجمل أب و أم

نمت

ولما صحيت...لاقيت ضلمة فظيعة...بصيت يميني مش شايفة حاجة...فضلت أحسس و أدور بإيدي عالأباجورة و صورتي ويا أمي و أبويا...ملقتش حاجة...فضلت أنادي يا بابا يا ماما...محدش يرد...حاولت أنزل من مكاني..معرفتش أتحرك...سمعت صوت بيقول: مدام فاطمة...إمضي علي الإقرار دا...عشان الدكتور و المستشفي يخلو مسؤليتهم و في حالة وقوع أي ضرر عليكي تكوني إنتي المسؤولة

ماما..تمضي إية؟؟ هو في إية؟؟مستشفي؟؟ 

هي أوضتي دي كانت حلم!! و الجنينة دي كانت خيال؟؟ و بابا و ماما تهيآت؟؟

طب والكاكاو اللي طعمو لسة في بقي؟؟ مكنش فية!!

طب وصورتي ويا بابا و ماما اللي شفتها!! كانت برضو حلم؟؟

حتي ريحة ماما طلعت مفيش؟؟ 

ماما مضت...علي قرار قتلي...مضت...والله مضت

و كمان بتزعق للممرضة و بتقولها الساعة ١٢ و خمسة فين الدكتور كل دا؟؟؟

ماما...أنا لما شفتك لاقيتك بتحبيني..و والله كنتي مبسوطة جداً بيا

ما تجربي تسيبيني أعيش...جربي

جربي و لو لقيتي نفسك زعلانة إبقي موتيني...والله ساعتها هارضا و مش هاعرضك...جربي تشوفي إيديا الصغيرين...جربي تلمسيني هتلاقيني ناعمة أوي...جربي تحضنيني...جربي بس و سيبيني آجي...ونبي 

ماما...أنا والله إتبسطت في اليوم اللي قضيتو وياكي إنتي و بابا...ياريتني كنت هاعيش عشان أنا لاقيت نفسي بحبك إنتي و بابا أوي

الدكتور: جاهزة يا مدام فاطمة

ماما: آه جاهزة

ماما قبل ما نمشي...ثانية واحد إسمعيني..ماما عايزة أقولك شكراً أوي والله علي حدوتة سيندريللا..بس كان نفسي أسمع باقيتها

ماما قولي ل بابا شكراً علي الكاكاو...كان نفسي فية تاني...بس معلش لما أروح ل ربنا هبقا أطلب منة يجيبلي كاكاو كتيييييير

يتبع