بيقولوا رمضان جانا.. بس لأ محسيناش بيه.. اللي جانا هو خيم سوبر شيك.. مطاعم بتزود أسعارها في رمضان لدرجة انهم عادي يبيعوا لك بق الماية بأربعين جنية عادي جداً ولما تحب تحجز فيها فطار فا دايماً هتلاقي ويتر غتت يرد بإبتسامة لزجة يقولك "سوري يا أفندم حضرتك ويتينج ليست" وتستمر مدة الويتينج ليست شهرين تلاتة عادي! ولما تدخل هتلاقي الستات مقعدين شنطهم على كراسي وإنت عادي تقف المهم الشنطة الـ "لويس ڤيتون" تقعد!.. كنافة بالمانجا والنوتيلا والريد ڤيلڤيت تقف طابور ٦ ساعات ونص عشان تجيبها.. إختفاء عجيب لصنية الكنافة العادية اللي بالكريمة.. سحور طبق فول و٣ طعميات بستميت جنية نظراً لشوية الزينة والمكان الخزعبلي اللي إنت قاعد فيه.. عزومات كتيرة بنروحها.. سيلفي بيجمع كل أفراد العيلة أو كل الصحاب.. صورة الفانوس اللي حبيبها جابهولها تقتحم صفحات الفيسبوك.. قماش الخيامية يستعمر المشهد الرمضاني في مفارش تلاقي كوشنز تلاقي أعلام تلاقي فوانيس تلاقي دة حتي عملوا عبايات خيامية شوف إزاي!.. مسلسلات إنتاج خزعبلي متكلفة تريليون جنية وغالباً بتبقي ضلمة وفيها غموض إبن لذينا مستفذ ومشاهد مطعمة بعنف هلامي وجريمة قتل ونفضل طول رمضان شاكين في كل الأبطال ولإن المؤلف والمخرج جامدين بزيادة فا بيجيبوا في الحلقة الأخيرة "ضيف شرف" يشيل القضية!.. إعلانات ڤودافون وموبينيل وإتصالات بيقطعوا في بعض مع العلم ان مفيش مصري بيحول من شبكة لتانية أبداً والله لو جابولنا عبدالحليم في إعلاناتهم!.. ناس عالفيسبوك بتصوت ان الصيام صعب وإنهم ياي هيموتوا عشان مبيشربوش القهوة بتاعتهم!.. نفس الناس برضو بتصوت عالفيسبوك ان رمضان خلص بسرعة وطاار ومحسوش بيه!
وكان هذا رمضان يا سادة!
إزاي؟ طب إزاي والله دة رمضان؟
بنتلم مع بعض في عزومة عشان نتصور السيلفي اللي بنبين فية قد إيه إحنا فرحانين بزيادة!
بنخرج عشان نقول اننا روحنا الخيمة الشيك الغالية فحت!
بس هو رمضان بتاع هو اللي مبقاش بتاع زمان.. ولا إحنا اللي مبقناش بتوع زمان..
أقولك.. رمضان مبقاش هو.. لإننا مبقناش إحنا..
آه وحياة ربنا مبقيناش إحنا..
بنضحك عشان نتصور.. بنبقي قاعدين في أجمد خروجة عايزين نخلص الخروجة ونروح.. بنحس ان المدة اللي بنتصور فيها طويلة جداً لاننا بنبقي عايزين ننهي الإبتسامة اللي وجعت وشنا من كتر تقلها.. لما بنسمع اغنية رمضان جانا بنفتكر أيام زمان لمتنا اللي بجد.. العيلة اللي كانت ملمومة عشان بيحبوا بعض بجد مش لزوم سيلفي الفاميلي! وقتها بنبتسم ابتسامة مضمونها قرار.. قرار إنه ممنوع الدموع.. وممنوع الحنين لأيام زمان.. بنتكلم في كلام كتير غير اللي جوانا.. بنبين اننا بنسمع اللي قدامنا بس الحقيقة إننا بنبقي بنسمع صوت تفكيرنا اللي جوانا اللي صوتة بيبقي أعلى من أي كلام وهزار وضحك..
هو اه رمضان هنا.. بس اللي جوة كل واحد فينا هو اللي مش هنا..
كل سنة وإحنا بنقول إننا بخير!
#بسمة_السباعي
