أنا ڤودافون

عن أزبل أنواع البشر أتحدث....هما الفئة اللي بيفرق معاها أوي منظرها يبان نضيف أوي و كلاسي قدام الناس الغريبة فقط...و مع حبيبها ولا حبيبتة بينسو النضافة تماماً و مبيهمهمش منظرهم خالص.....لدرجة إن الواحد عايز يقول لكل حد قريب منو "ونبي عاملني زي ما بتعامل عمو بتاع الصيدلية ولا طنط بتاعة ڤودافون"....و اتمني من كل قلبي إن كل حد قريب مني و شايف نفسو قريب أوي مني إنو يلغي العشم...أيوا يلغية...و ياريت تعاملوني كأني غريبة و أدخل تحت بند الناس اللي بتحبو تبينلهم الحتة الشياكة اللي بتتدعوا إنها جواكوا

رسالة لبنتي

في أول يوم ليكي يا بنتي في بيت أبويا و أمي بعد ما تم عمرك يومين واحنا نازلين من المستشفي أنا فاكرة كويس إنك كنتي لابسة سلوبيت لونو پينك فاتح  مرسوم علية أرنب صغير و كنتي نايمة من ساعة ما نزلنا من هناك كانت وقتها الساعة ١ الضهر وصلنا البيت الساعة ١ و نص وبردو فضلتي نايمة....كان إحساس غريب أوي بالنسبة ليا....اللي هو أوضتي وانا صغيرة و سريري و لعبي و أمي و أبويا بجد كنت مستغرباكي أوي....انتي مين يا نونة؟؟بنت مين البيبي اللي نايم؟كنت بحبك طبعاً بس كنت خايفة عليكي مني إكمني كنت مدلعة فخفت مكونش أم كويسة معاكي....إستغربت دولابي اللي بقا مليان سلوبيتات و مشمع و إستغربت الكومودينو اللي كان علية زمان موبيلي و كيس في شوكلاتات إتحول فجأة لصيدلية عليها جميع أنواع الأدوية اللي تخصك ولا بقا مكتبي مقولكيش علية آخر ملامح لمكتبي كان علية ألوان و ورق و بالتات دولقتي الله بقي مدهش مليان ويبس و مناديل و بامبرز و قطن كمان و فوط و هكذا.....أما بقا تسريحتي الجميلة فأيام ما كانت تخصني كان عليها كريمات ڤيكتوريا سيكريت علي كام إزازة برفان فخيمة بس طبعاً إتحولت و إتبدل حالها بقي عليها كريمات بردو بس سودو كريم و بنثينول ..... ولا بقا مقولكيش كنت زمان أحب وانا سهرانة أشرب قهوة مثلاً كاكاو لكن بقا بعد الخلفة إرزع كراوية أو حلبة سخنة يا سلام حتي مزاجي في المشروبات إتنسف ما المدام بترضع بقا....فقهوة إية و زفت إية إديها حلبة.....وبخ أنا و حاجتي خلاص إتبخرت.....مش هكدب عليكي أنا أتضايقت.....وبعد ٤ ساعات من نومك صحيتي يا بنتي....كنت ساعتها مرهقة و عايزة أريح بس واحدة مخلفة بينفع تريح؟ منمنتش و إبتدي وياكي الكفاح....الليل جية و طبيعي جداً إننا ننام.....أمي قالت هاهاهاها طبعاً ضحك السنين دة كان زمان النوم خلص....حقيقي إتخنقت أوي لإن من جوايا أنا عارفا إن متطلبات الخلفة مبتخلصش.....يعني هي مش مجرد إني مش هنام ليلة وخلاص كدا لأ دا أنا لسة بكرا و بعدو و بعدو إلي مالا نهاية.....بردو مش هضحك عليكي إكتئبت....حقيقي مسؤليات كتير و شغل و سحل كتير....حقيقي نسيت نفسي من كتر مانا مشغولة بيكي.....كنت أشوف الناس اللي مش مخلفة أحقدعليهم و أقول لنفسي يا بختهم.....وانتي تنامي و تصحي و تنامي و فضلت الأشغال الشاقة مستمرة.....مش عاوزاكي يا بنتي تفهمي من كلامي إني مكنتش حباكي لا والله أنا بعشقك بس في وقتها كنت بنت مرفهه متدلعة فكان صعب عليا أشيل مسؤلية تهد الجبال و أفضل سعيدة.....و أعتقد دا حال معظم الأمهات بعد أول خلفة ليهم.....آه طبعاً كنت بحبك بس و كنتي قلبي بس مكنتش مستمتعة وانا بعملك إحتياجاتك معرفش لية....بس الأكيد إني دلوقتي بعد ما سمعتك وانتي بتقوليلي بسمة أنا بحبك أد السمااااااا و بعد ما شفت حنيتك عليا و خوفك عليا لما بقول آه و حضنك ليا وانا ببكي حسيت إنك والله أمي مش بس بنتي .......أنا عايزة أقولك إن والله والله لو طلبتي مني عينيا ولا قلبي لأدهملك والله حقيقة يا بنت الذينا ملكتيني بطريقة مش طبيعية....حاسة إني مسحورة بيكي....بقيت الصبح مقضياة وياكي طبعاً و لما تنامي بتعدي ساعات والله وانا قعدة ماسكة في إيديكي و ببصلك.....حقيقي أنتي مالكة قلبي....بحبك أوي 

٥٦ شهر

أنا بكامل قوتي أحب أعترف إني كنت مخطأة في فترة كبيرة أوي من حياتي...أيوة كنت غلطانة....أنا ضيعت وقت كتير أوي في الزعل و الكآبة مختش بالي من إن اليوم اللي بيروح مبيجيش تاني مختش بالي إن الوقت اللي بيروح وانا كنت زعلانة فية بفضل طول الوقت اللي جاي أقول يا خسارة مكنتش مبسوطة في كذا و كذا علي سبيل المثال أنا كان عندي مشاكل كتير أوي في أول حياتي الزوجية المشاكل دية كان عمرها ٨ شهور فضلت بعدها ٤ سنين زعلانة أوي علي ال ٨ شهور دول أوي و متأثرة إني يا عيني متبسطش في أول جوازي...بس فجأة كدة بصيت في صوري لقيت شكلي كبر يجي ميت سنة حواجبي علي طول ضماهم إبتدت التكشيرة تقبي وشم علي وشي مبقتش أعرف أهرج ولا حتي أضحك و لما كنت بقابل صحاب عمري في خروجة مكانوش والله بيعرفوني لا شكلاً أنا ولا مضموناً.....دا بالنسبة لشكلي أما بقي بالنسبة لصحتي فبقت هباب أوي مبقتش أقدر أقف ولا حتي أتحرك زي البنات اللي في عمري.....مسكت ورقة و قلم و قررت إني أتغابي علي نفسي إبتديت أكتب لنفسي هو في إية يابنتي ما تفوقي بقي من أم الهبل دا و حسبتها لقيت إن فعلياً في ٨ شهور كنت حزينة فيهم و مش بأختياري  و لقيت بردو إن فية ٤ سنين فيهم  ٤٨ شهر كنت حزينة فيهم و بمزاجي و بإختياري و بكامل إرادتي آه والله بكامل إرادتي....عرفت ساعتها أنا أدإية إنسانة فاشلة في كل حاجة بقي معقول أضيع ٤٨ شهر عشان ٨ شهور!! غبية أنا أوي صح؟ بس والله مكنتش أقصد كنت وقتها قافلة عيني و مش عايزة أشوف الواقع مش عايز أشوف إن خلاص ال ٨ شهور خلصوا مكنتش عارفة أطلع من قوقعة ال ٨ شهور....حسبتها آه والله حسبتها  جمعت ال ٨ شهور علي ال ٤٨ شهر لقيتها طلعت رقم منيل ٥٦ شهر راحوا في الهبل....وقتها نشفت علي نفسي و قررت إني والله والله والله لهتبسط و عينيا دية إن جية فيها دموع فهتقبي دموع من كتر الضحك أيوا اللي هوا هعيط من كتر الضحك....و آخري معرفتي بالزعل هتكون ال ٣ حروف ز ع ل و بس عارفا حروفها بس معناها نسيتو....بعد قراري شطبت كل حاجة متعلقة بال ٥٦ شهر دول من جوايا......كلامي موجة لكل حد موقف حياتة عند لحظة وحشة عدت ضايقتة والله فوت و عدي و عيش بقا و إضحك و لما تزهق من الضحك إتبسط و لو جت حاجة تضايقك إبتسم و بس و أوعي تزعل ولا تبكي خليك قوي الزعل سهل أي حد بيعرف يزعل أسهل حاجة إنك تسيب نفسك للكآبة و الزعل بس القوة في إنك من دلوقتي و أول ما تخلص قراية كلامي تاخد قرارك بأنك قوي و إنك هتفرح و هتضحك وبس وإنك هتدوس علي أي حاجة تزعلك و أكيد عندك أكياس زبالة كتير إحدف فيها اللي يزعلك....حب نفسك

لما بكون عايزة أبكي و أضطر إني أمسك دموعي و كمان أبتسم و أضحك و أهرج بحس إني بنتحر......حقيقي والله أصعب حاجة في الدنيا كلها لما تبين فرحة مزيفة ملهاش مكان جواك.....لما ترسم ضحكة مكان دموع....ألم حقيقي

أنا عكس ما أنا

هو إية حوار المشاعر دا؟ بجد يعني هي إية المشاعر دي؟ ولية دايماً مشاعرنا ماشية عكسنا؟ لية دايماً مشاعرنا ذلانا؟؟ لية دايماً مشاعرنا بتسبقنا و تستخبي في المكان اللي مينفعش نروح وراها فية أبداً؟ لية بقي مشاعرنا مش بأدينا لية دايماً مشاعرنا ساحلانا ورآها و مبهدلانا و مطلعة عين أبونا....واحدة بتحب واحد و الواحد دا بيحب واحد تانية و الواحدة التانية دي بتحب واحد تاني وهكذا....فيها إية لما الكلكعة دي تموت بمعني لما واحد يحب واحدة يقبي هي كمان تحبو و العكس بردو..خيال علمي أنا عارفة....بس أديني بحلم.....حقيقي مشاعرنا معلمة علينا

إية علاقة الحزن بالموت؟ يعني لية لما الواحد بيزعل أوتوماتيك بيقول أنا نفسي أموت؟ 

الكآبة حلوة مفيش كلام

إزاي تقبي شخص متشائم و كئيب في ٣ دقائق فقط؟؟ هقولك أنا

متفرحش و انت بتحب حد و هو كمان بيحبك لأنو أكيد هيسيبك

متفرحش و إنت بتجهز لفرحك لأنك أكيد بعد ما تتجوز هتعيش عيشة منيلة

متفرحش لما تلاقي نفسك سينجل و تفتكر نفسك مرتاح برضو هتفضل تبص عالمصاحبين و تعد تنفسن عليهم

متفرحش لما تلاقي معاك عيلتك لأنهم أكيد هيموتوا و هيسبوك

متفرحش لما تلاقي معاك فلوس كتير لأنك أكيد هتلاقي ميت ألف حاجة تانية ناقصاك

متفرحش لما تلاقي نفسك فرحان لأن أكيد هتيجي مليون ألف مصيبة تنكد عليك

متفرحش و إنت خارج خروجه حلوة لإنها أكيد هتخلص

متفرحش لما تلاقي صاحب وفي و جدع لأنو أكيد هيديك علي أفاك بس مستني الفرصة تجيلو

متفرحش وانت بتحتفل بعيد ميلادك يا أهبل راحت سنة من عمرك من غير ما تعمل فيها حاجة عدلة

ها؟؟ لسه في حد متفائل أكمل!! ولا حلو كدا