الوطن | مامى هو بابى فين؟ | بسمة السباعى
مامــى هو بابى فين؟
-----------------------
بقلم: بسمة السباعى
«اتطلقى» كلمة كنت بقولها لأى بنت جوزها مطلع عنيها وده لإنى كنت عايشة الدور قوى وحقوق الست وكلام أهطل كنت بقوله عشان أكمل بيه فورمة إنى ياى بنت شخصيتى قوية والثقافة بتنقط منى! كلمة كنت بقولها لحد ما سمعت «مامى هو بابى فين؟»، السؤال ده خلانى أشوف إن في وقت ما الطلاق بيحل مشكلة كان ليها ميت ألف حل غير «الطلاق» فبيجيب ميت ألف مشكلة تانية ملهاش أى حل.. فكرت فى إن ليه الراجل ومراته شايفين إن الجواز «علاقة مؤقتة» فبتضايقنى فهتطلق! وليه مغمضين عنيهم عن «نصلح عيوبنا ونكمل»؟
«مامى هو بابى فين؟».. مامتها ردت بـ«مسافر».. عدا كتير والبنت لسه بتسأل: «طب هو مبيكلمنيش فى التليفون ليه؟».. ولسه برضو الأم متعصبة وبتجاوب بنفس الإجابة، بالإضافة لـ«متنيل.. غار فى داهية»، وغالباً بتختم كلامها مع بنتها بـ«بابى مبيحبكيش خلاص!»، تبكى البنت وتروح أوضتها تمسك تليفونها اللعبة وتحطه على ودنها وتقول: «بابى انت فين؟ بابى، مامى بتقول إنك مبتحبنيش، بابى تعالى وأنا مش هعمل شقاوة وهاكل أكلى كله.. بابى متسبنيش»>>>>>http://www.elwatannews.com/news/details/666922
