صباح الخير يا مولاتي
بقلم: بسمة السباعي
ولإنك ملكة حياتي..ولإنك نفسي وعمري..ولإنك فرحتي..ولإنك مبتخليش الدموع تلحق تلمس خدي..ولإنك منعتي الحزن يعرف عنواني..ولإنك قوتي وسندي وكلام كتير حلو والله والله ملهوش وجود في الكلام ملهوش مرادف ملهوش حروف تقدر توصفة...ولإنك أنا..أيوة أنا وجودي هو ضلك..وجودي هو صورتك اللي في المراية..اللي يوم ما هتغيبي فية ومش هتبقي ليكي وجود هتلاقي ضلك وانعكاسك اختفي..ايوة اختفي لاننا واحد يا امي..والله واحد يا أمي..أنا صورتك..صورتك يا أمي.
قبل أي حاجة يا أمي حابة اني أبدأ كلامي بإعتذار.
آسفة يا أمي لإني ممكن أغيب عليكي بالاسبوعين أو بالتلاتة مجيش أشوفك لاني ببقي مشغولة بالمدارس والتمرينات والواجبات..آسفة لاني لما بجيلك بفضل قاعدة عالموبيل وسايباكي بتحكي وبرد عليكي ب "آه إنشاءالله" آسفة لإني مبسمعكيش..آسفة لإني حتي يوم ما حبيت أقولك كل سنة وانت طيبه في عيد ميلادك كتبتهالك عالفيسبوك وهكذا من مناسبات! آسفة يا امي لإنك زمان لما كنتي بتضحي عشاني انا واخواتي وترفضي تشتري لبس لنفسك كنت من جوايا بتريق علي لبسك كنت بقول "اوف بقي علي الكام بلوزة اللي هي مبتغيرهمش دول" آسفه مكنتش فاهمة ولا حاسة بس والله يا أمي لما خلفت فهمت كلمتك اللي كنتي بتقوليها "انا بتبسط لما اجيبلك اكتر ما اجيب لنفسي" دلوقتي بس يا أمي فهمت..آسفة لانك لما كنتي تقوليلي يا بنتي لما توصلي البيت ابقي طمنيني كنت بتخنق وكنت بأوووف وبقول بقي انا كبرت واتجوزت وبرضو هي لسة بتلاحقني بقلقها...شوفتي الغباء! كنت شايفة حبك ملاحقة وخنقة! شفتي غبائي يا أمي! عارفين أنا مهما أغيب عن أمي أرجع ألاقيها برضو مستنياني مغيرة ملاية سريري اللي كان بتاعي قبل ما اتجوز..أرجع ألاقيها حتي لو تعبانة تجري تقف تطبخلي كل اللي احب آكلة..تبعت أبويا يجيب لبنتي كل حاجة بتحبها..ألاقيها لسة برضو حطة جنبها برواز في صورتي انا واخواتي واحنا صغيرين وكانها نفسها ترجعنا تاني لحضنها..بس خلاص..خلاص بقي! الدنيا خدتنا جوزتنا وخلتنا نخلف..خلتنا نشوف اهلنا مرة كل تلات اسابيع..خلت وجودنا في حياة اهلنا يقتصر علي شوية صور ومكالمة خايبة وحبة ذكريات.
ماما عارفة لو قالولي تطلبي اية ويتحقق لك؟
والله هطلب اني ارجع في حضنك..اني ارجع بنتك اللي جنبك اللي كل يوم تصحي علي صوتك..نفسي أرجع جنبك علطول يا أمي..نفسي أكتر نرجع ٥..آه يا أمي نفسي نرجع ٥ زي ما كنا...
نفسي نرجع عيلة زي ما كنا زمان..قبل ما نكبر والجواز يعرفلنا طريق..قبل ما الدنيا تمسك إيدينا وتخلينا نمشي في طريق بيودينا للحزن وللفراق..طريق الخطوة فية مينفعش ترجعها غير بس في خيالك..نفسي يا أمي نرجع لأيام قبل ما نتفرق..قبل ما يكون كل علاقتنا ببعض ساعه تجمعنا بس في المكان ساعه كل شهر آه بنبقي متجمعين بس لأ في حاجة جوانا إتغيرت مبقناش إحنا يا أمي...أمي أنا نفسي نرجع زي ما كنا زمان نفسي نرجع لنفسنا..نفسي أوي نرجع نستني رمضان انا واخواتي واحنا متدفيين بحضنك انت وبابا..نفسي نرجع نتلم حواليكي انا واخواتي واحنا بتفرج علي مسلسل "ساكن قصادي" فاكرة يا أمي؟ فاكرة لما كنا بنسهر نستني مسلسل "هوانم جاردن سيتي"...طب فاكرة لمتنا علي الفطار مستنين المدفع وكل واحد فينا بيخلص بسرعة عشان يجري يلحق الريموت؟ طب فاكرة صوت طبلة المسحراتي وصوت بابا وهو بيصحينا وكنا لما نقوم نلاقيكي محضرلنا أحلي طبق فول يا أمي فاكرة الأيام الحلوة دية؟ الله يا أمي كانت أحلي أيام..والله ذكرياتي معاكي هي اللي موقفاني ومخلياني لسة عايشة...أمي انا نفسي نرجع لأيام لما مكنش لينا غيرنا وبس..نفسي نرجع لأيام ما كنا عيلة ملمومين حوالين ضحكتك وحنيتك انت وبابا..نفسي يا أمي..نرجع وكأننا الواو اللي بين ماما وبابا..نفسي نرجع لبيتنا القديم ولنفسنا القديمة.. تفتكري ممكن؟
ماما هو إنت لية مقولتليش ان الحياة برة حيطان بيتنا وحشة كدة؟ووإن الحياة بعيد عن حضنك إنت وبابا مؤلمة كدة؟
ماما أنا شفت حاجات كتير ألمتني في حياتي..حصلي مشاكل بالهبل..بكيت كتير جداً..تعبت بزيادة..اتخنقت من كل حاجة حواليا..بس اللي كان كل مرة يوقفني ويقويني هو حضنك..والله حضنك..
يارب أرجوك أنا هستحمل من الدنيا دية كل حاجة وأي حاجة الا حاجتين..أمي وبنتي..يارب مايفارقونيش
ولو كان لازم فراق..يبقي اختارني أنا..أيوة أنا
ماما انا بحبك جداً..ومش هقبل اني اعيش دقيقة واحدة وانت مش معايا..لاني ضلك..مفيش ضل بيفضل بعد ما صاحبة بيمشي..ربنا يخليكي ليا يا أمي.
كل سنة إنت معايا وجنبي..كل سنة وأنت حياتي
