بنتي مليكة حبيبتي
مامي إنهاردة بقي عمرها ٢٧ سنة و إنتي عمرك ٣ سنين و نص
مليكة حبيبتي أنا بحبك أوي والله...و بحب كل تفصيلة فيكي
مليكة أنا نفسي تكبري بقي و تقري رسايلي ليكي دية
عارفة يا مليكة إنتي لما عرفتي إنت عيد ميلادي قولتيلي إية؟؟
قولتيلي: مامي أنا هفتح الحصالة بتاعتي فيها فلووووس كتيييير واللهي و هجيبلك تورتة هدية عشان عيد ميلادك
علماً يا لوكا إن حصالتك دية كانت (منطقة عسكرية) ممنوع الإقتراب منها أو التصوير..و اللي كان بيتجرأ و ييجي جمبها كنتي بتكهربية.....بس إنت ضحيتي بيها عشاني
أنا إبتسمتلك أوي...و قربت منك و حضنتك و قلتلك في ودنك: بحبك أوي أوي والله
و بعدين قلتيلي: مامي هو إنت ممكن متسيبنيش في الحضانة و تخليني آجي معاكي عيد ميلادك؟؟
وقتها أنا إتضايقت من نفسي أوي...حسيت بتأنيب ضمير إني وديتك الحضانة...بس والله كل الناس قالولي إن مصلحتك في إنك تروحي الحضانة و متفضليش قاعدة في البيت....والله يا مليكة خلتيني أعيط أوي وقتها...و رديت عليكي قلتلك: لوكا حبيبتي أنا من يوم ما إنتي إتولدتي و أنا أقسم بالله العظيم عمري ما سيبتك في عيد ميلادي و خرجت لوحدي...أنا عيد ميلادي يا لوكا يعني مليكة و بابي و مامي
إنتي إتبسطي أوي و قعدتي تغني و تقولي: هابي بيزدي تو بسمة
بليل جية...قولتيلي: مامي يعني أنا لما أنام و أصحي بكرة هروح عيد ميلادك؟؟
قلتلك: آه يا لولو إنشاءالله
قلتيلي: طيب أنا هنام بسرعة....عشان بكرة ييجي بسرعة
و بوستيني في خدي و قلتلي: بحبك أوي يا مامي
حقيقي والله العظيم يا مليكة السنة دي..هية السنة الوحيدة اللي حسيت بفرحة إن عيد ميلادي جاي...لإني حسيت بحب و
سعادة رهيبة في عينيكي إن عيد ميلادي بكرة...حسيت إني حاجة مهمة...حسيت إن حدث عيد ميلادي مؤثر
هو أكيد طبعاً عيد ميلادي مش مهم عند ناس كتير
و مش مؤثر عند ناس أكتر
و أكيد أنا مش حاجة مهمة عند ناس كتير برضو
بس عارفين..أهميتي عند بنتي و حب بنتي ليا...يكفيني...جداً
يكفيني حب مليكة
مليكة...فاكرة لما كنتي بتطفي شمعة عيد ميلادك و جيت جمب ودنك و قلتلك (مليكة قولي أي حاجة نفسك فيها) فاكرة إنتي وقتها قلتي اية؟؟ قلتي (نفسي في شوكولاتة كتيييير)....إنهاردة بقي إنتي جيتي سألتيني و قلتيلي (مامي هتقولي نفسك في إية و إنتي بتطفي التورتة؟) و أنا فضلت أضحك إنك لسة فاكرة...قلتلك (نفسي في شوكولاتة كتيييير زي لوكا)...بس أنا كدبت عليكي...لإني مش هأتمني كدا و أنا بطفي شمع عيد ميلادي
أنا هأتمني إنك لما تكبري و تنشغلي في الدراسة و بعدين الجواز...تبقي لما تقري كلامي دة...تدعيلي
ها؟؟ إتفقنا؟؟ مليكة هتدعي لمامي؟؟
أوكي يا لوكا؟؟
بحبك يا مليكة
وأنا كمان هعمل زيك يا مليكة و أنام بسرعة عشان بكرة ييجي بسرعة
