إبتدت ماما في إجراءات البحث عن قاتل
إبتدت تلف تدور علي السفاح اللي هيموتني
من دكتور للتاني للتالت و هكذا...الحمدلله كل الدكاترة لحد دلوقتي رافضين يعملولها اجهاض
لحد ما لقت دكتور وافق علي إنة يعملها العملية
إداها ميعاد...يوم التلات...كمان ٦ أيام مش هتسمعوني تاني...كمان ٦ أيام هموت قبل ما أتولد
بس هي الدنيا بتاعتكوا دي القتل فيها بميعاد؟؟ الدنيا بتاعتكوا دي الأم قسوتها غالبه علي حنيتها؟؟ الدنيا بتاعتكو دي مفيهاش مشاعر؟؟ الدنيا بتاعتكو مش حلوة ..إذا كان أمي عايزة تموتني أمال الناس اللي متعرفنيش كانو هيعملوا فيا إية!!! حقيقي الحمدلله إن ماما هتموتني...الحمدلله إني مش هاجي دنيتكوا دي...أكيد عند ربنا أحسن
الغريب في الموضوع إن ماما رجعت بيت جدو و ناناة سعيدة جداً...سعيدة بإنها خدت ميعاد ولقت الدكتور اللي هيموتني...يا سلام عليكي يا أحن أم!! الأم سعيدة بميعاد قتل ضناها...حقيقي دُنيا
ماما عمالة بتحكي علي بطولتها في رحلة بحثها الشاقة عن القاتل و عن لحظة إتفاقها مع الدكتور عديم الضمير و بالتحديد في لحظة ما بتحكي ل جدي عن إنها فضلت تفاصل الدكتور في تكاليف أُجرة قتلي...قالت ل جدي (عشان بس تعرف إن بنتك مفيش زيها..الدكتور كان عايز ٢٥٠٠ جنية فِضِلت أفاصلة لحد ما وصَلت المبلغ ل ١٤٠٠ جنية.. ها إية رأيك فيا بقا يا بابا) رديت عليها و قلتلها حقيقي مفيش زيك!! فعلاً مفيش زيك!! إنتي أم حنيتك طاغية عليكي...إنتي أم طيبة و عشان كدا هتموتيني...كويس والله إنك فاصليتي في تكاليف العملية عشان بباقي الفلوس تجيبيلي كفن و تدفعي تكاليف الدفن و أهو تبقي مخسرتيش كتير....حقيقي أم مفيش زيها
ماما فجأة بكت
بكت جامد أوي
أنا مستغربة..هي بتبكي!! قال يعني حزينة!! لأ حقيقي حنينة!! بس العياط عمال يزيد...هي سمعت كلامي ولا إية؟؟ لأ مستحيل...طب بتبكي لية؟؟ ماما مالك؟؟ فيكي إية؟؟ مالك؟؟؟
حطت إيديها علي بطنها و قالت أنا أسفة يابنتي
أرد عليها و أقولها: ميهمكيش
تقولي: والله مكنتش عايزة أموتك
أرد عليها: أمال هيحصل إية يوم التلات!! عيد ميلاد
و هي بتبكي تقولي: بحبك
أقولها: مبتحبنيش
تقولي: كان نفسي أشوفك و أحضنك
أصرخ أنا و أقولها: طب إية اللي منعك!!! إية يا أمي؟؟ والله لو سيبتيني أعيش مهزعلك..والله لو سيبتيني أعيش لهخليكي عايشة في سعادة...والله لو سيبتيني أعيش لهعوضك عن كل حاجة وحشة شوفتيها في حياتك..مهو أصلاً ربنا كان باعتني ليكي عشان أعوضك...ونبي بقا بلاش يوم التلات..بلاش ها؟؟
تقولي: حبيبتي كان نفسي تبقي جمبي بس والله الدنيا وحشة و أنا خايفة عليكي منها
أقولها: الدنيا دي مشفتهاش...خايفة عليا!! تقومي مموتاني!! عشان خايفة عليا!! خايفة عليا من دنيا وحشة هتكوني إنتي جمبي فيها!! و مش خايفة عليا من قبر و ضلمة هكون لوحدي فيها؟؟ هتسيبيني تحت التراب لوحدي عشان خايفة عليا؟؟ هتسيبيني يا ماما؟؟
تقولي: بحبك
أقولها: بس بقا أسكتي
تقولي: هتوحشيني
أقولها: بطلي بقا...بطلي المسرحية بتاعة الأمومة دي...بطلي
تقولي: سامحيني
أقولها: معني كدا إنك لسة مصممة!! برضو هتموتيني؟؟
ماما ردي عليا...هتموتيني؟؟ هتسيبيني تحت التراب و تمشي
هتموتيني و تبتدي حياتك من جديد
هتبتدي حياتك و إنتي قتلاني بإيدك؟؟
تتجوزي تاني...و تحملي...تجيبي إخوات تانين في نفس مكاني...قصدي اللي كان مكاني
بس يارب متوديهمش مكان مهتوديني...يارب...مع إن كان هيبقي نفسي في حد من إخواتي يكون معايا يلعب معايا و أنا فوق عند ربنا..بس معلش
أنا مش أنانية...هحب إن إخواتي يعيشوا و يتبسطوا...و أنا لما هاروح لربنا هبقي أطلب منو إنو يجيبلي حد ألعب معاة...ربنا بيحبني و هيعملي كل اللي أنا نفسي فية
ماما ممكن أطلب منك طلب؟؟
لما تتجوزي تاني و تجيبيلي إخوات
ونبي إديلهم لعبي كلها...ونبي وديهم الجنينة الكبيرة اللي مشفتهاش الجنينة دي يا ماما اللي إنتي كنتي دايماً بتحكيلي عليها...و أبقي كمان إديلهم هدومي الجديدة اللي لسة ملبستهاش...و كل يوم قبل ما تنيميهم إحكيلهم حكايتي...إحكيلهم إنو كان هيبقا ليهم أخت حلوة إسمها حيات...بس ونبي يا ماما بلاش تقوليلهم إنك إنتي اللي موتيني...قوليلهم هي ماتت لوحدها
و قوليلهم حيات بتحبكوا أوي
ماما بس ونبي السلوبيت الأبيض اللي إنتي كنتي جايباهولي عشان ألبسوا يوم ما أتولد...أدفنية معايا...حطوهولي جمبي في التراب
ونبي يا ماما متنسيش ها؟؟
عشان أول ما أروح لربنا...أبقي ألبسة
يتبع
