سحبت إستقالتي من شركة الدنيا

إلي شــركة الدنيا المحتــرمة

الســـــــــــــــلام عـليكـــــم ورحمــــــة اللـــــــه وبركاتـة

طبقاً لقانون العمل الموضوع في شركة الدنيا يحق لي العدول عن طلب الإستقالة الذي تقدمت به سابقاً علماً بأنة لم يتم الرد بالقبول أو الرفض علي طلبي

و أود أن أحيط سيادتك علماً بأن عدولي عن إستقالتي سببة هو إنني تذكرت أن لدي الكثير من المهام تجاة إبنتي ذات الأربع سنوات و شعرت بإنني سوف أخذلها إن إستقلت من شركتكم الموقرة

لك مني جزيل الشكر علي تأخرك في قبول طلب إستقالتي ...فتأخرك جعلني أفيق من ضعفي و أتخذ قراري بإرسال خطاب آخر متراجعة فية عن طلب إستقالتي و أتمني من سيادتك أن تتيح لي الفرصة أن أظل في منصبي كأم

شاكرةً تعاونكم 

 و رحابة صدركم

وتفضلوا بقبول فائق الإحترام والتقدير

مقـدم الطلـب

بسمة السباعي

رحلة رقم ٢٧٧ المتجهة إلي الآخرة

عن مغتربي الدنيا أتحدث

كلنا قاعدين في الدنيا منتظرين طائرة الموت اللي هترجعنا بلدنا...بلد الآخرة

فمتخليش الدنيا بقي تضايقك...لأنها ببساطة مش بلدنا...و العيشة دية مش عيشتنا أصلاً...دية مش حياتنا والله

إبتسم بقي يا سيدي و خلي فترة إنتظارك للطيارة مفيدة...متضيعهاش في لب و سوداني...متضيعش فترة إنتظارك في كلام فاضي...حاول تفيد نفسك...حاول تعمل حاجة تأمن بيها مستقبلك لما ترجع بلدك...حاول...و إنت اللي هتستفيد...لإن ساعتها لما ترجع بلدك و إنت مأمن نفسك كويس و عامل اللي عليك......هتعيش ملك

إتعب في الغربة...عشان ترتاح في بلدك لما ترجعلها

حياتنا لسة مجتش

و أنا متأكدة إنشاءالله إن الحياة في بلد الآخرة هتكون جميلة جداً...اكيد هتكون جميلة لإننا هنرجع وطنا الأصلي...هننهي غربتنا

كلنا مغتربين في وطن الدنيا

هي الطيارة إتأخرت عليا؟؟ ولا أنا اللي خلاص مبقتش مستحملة الغربة و نفسي أرجع بلدي؟؟ 

أنا سأنتظر طائرتي و سأتحمل مهما طال غيابها...فأنا مشتاقة لوطني...وطن الآخرة

ندي قلعت الحجاب و بقت مُزة

ها قلعتي الحجاب ولا لسة؟؟

إنه التريند الحديث...تريند قلع الحجاب

أنا عارفة إن الحجاب تقيل أوي علينا...بيخلي شكلنا مكحتل علي مبيئ....دا غير العشر سنين اللي بيضيفهم علي سِننا...و يا سلام بقي لما تيجي مناسبة...فرح مثلاً ولا خطوبة....و تلاقي نفسك لابسة الفستان البروتيل و شكلك مزت المزز و ييجي البوليرو و الطرحة الشيفون يدمروا مزت المزز و يحولوها لبلاص 

أنا فاهمة والله كل دة لأني الحمدلله محجبة...فحسة أوي بالإحساس بتاع الأفراح و السواريهات و إن الحجاب و السواريهات دونت ميكس

و ياسلام بقي لما ييجي عيد ميلاد صاحب جوزك و تلبسي و تتشيكي و تقمطي القمطة و تروحي تلاقي مرات صاحب جوزك مثلاً يعني مش محجبة و قردة...بس القردة عاملة شعرها أصفر و كيرلي و ميك آب و لابسة  بنطلون چينز من البنطلونات المقطعة حتي أعلي منطقة الفخد....علي توب بقي مفتوح...و هي قردة أساساً..و إنتي أصلاً أحلي منها ب ٣٠ مرة....بس هي عاملة في نفسها كرنڤال...و إنتي يا عيني أخرك رابطة سبانيش و فاكرة نفسك إنك كيوت...فهي لفتت الأنظار كلها شعر أصفر بقي و لبس...أما إنتي فقومي يا أختي قطعي التورتة بتاعت عيد الميلاد ولا إجري ورا عيالك يا ختي ولا أقولك قدمي السيڤين للناس

طبعاً أنا إتكلمت علي المناسبات و أغفلت خالص الكلام عن الفصل القاتل للمحجبات

فصل الصيف

البنت المحجبة مبتحسش بفرق بين شتا و صيف...دا لإنها طول السنة لابسة بكم...أيوة إحنا المحجبات مبنصيفش...و مبنحسش إن الصيف جية أصلاً...أيوة إحنا المحجبات نفسيتنا بتقوم علينا لما بنلاقي بنات لابسين نص كم و إحنا لأ....أيوة إحنا المحجبات نفسيتنا بتقوم علينا لما بنلاقي بنات شعرهم بيطير و احنا آخرنا حرف الطرحة يطير فتبتدي البنت مننا تعيش الدور قال يعني شعرها فتلاقي جوزها أو خطيبها بيقولها (إعدلي الطرحة) فراح الدور الي كنا لسة هنعيش فية

هتناول إنهاردة نموذج البنت المحجبة المُصيفة...البنت تلاقيها لابسة كارينا كم و عليها تيشرت نص كم زي بتاع البنات اللي مش محجبات...يعني مصيفة بقي هية كدا!!...لا بجد!! إنتي لما تلبسي كارينا كم و عليها توب نص كم..إنتي كدا صيفتي؟؟؟ أيوة يعني لما أشوف كارينا كم و عليها توب نص كم أفهم أنا بقي كدة إن الصيف جية!!.... و غالباً بتبقي رابطة طرحة ذو ألوان صيفية فسفورية...و يا سلام بقا لما تسافر تصيف....إديني في البيائة يا معلم....تلاقي البنت المحجبة مننا قاعدة عالبلاچ متكومة علي جمب...قاعدة متدارية تحت الشمسية....و لابسة ليجينج علي توب ترواكار...و الطرحة طبعاً سوبر سبانيش...حلق...روج بينك فاقع...غوايش بلاستيك أورنج و أصفر....شبشب يحمل لوك هاواي...مونيكير أورنچ في أصابع الرجل...و طبعاً لازم خلخال....و هوا دا لوك الفتاة المحجبة في المصيف

و تلاقي البنات اللي مش محجبات حواليها مش لابسين حاجة و برضو مغطيين عليها

الله!! لية كدا بقي؟؟

طب دي البنت لابسة ليجينج و طرحة و توب و شبشب و حلق و غوايش...مكلفة نفسها يعني تقوموا سايبينها و زابلينها و باصين عالبنات اللي مش لابسين غير مايوة قطعتين إلا قطعتين...ينفع كدا؟؟

تيجي الأستاذة المحجبة تقلع هدومها عشان تنزل البحر

تبتدي تقلع طبقة ورا التانية ورا التالتة ثم الرابعة و هوب....الماكنة طلعت قماش

ظهر المايوووووة

ظهر المايووووة

إحم إحم

المايوة بتاعنا طبعاً كلكو عارفينة....بدلة غطس سوداء اللون...و في اللي بيكلف نفسة و يجيب چيبونة ملونة بألوان قوس قزح و فية اللي بيلف طرحة حوالين وسطة قال يعني هية كدا بقي لابسة كاش مايوة!! كاش مايوة لما ينططك يا بعيدة...مع بونية مذهل عالراس...بالإضافة إلي السان بلوك اللي الإستاذة بتطلعوا من شنطتها عشان تدهن منة!! بتحط سن بلوك إقتداءً بذوات القطعتين (البكيني يعني)...ستايل برضو السن بلوك دا...و هي مفيش حاجة باينة منها إلا وشها و كفها!! بس أهي عُقد و خلاص...إدهني ياختي السن بلوك إدهني يا ناصعة البياض لحسن وشك يسمر تبقي مصيبة

و يبتدي كورس الغطس

الفتاة المحجبة تمشي بكل ثقة متجهة نحو الشاطئ...و تفضل تحط حرف رجلها في المية...و تعمل نفسها ياي بردانة...ياي المية ساقعة عليها...كيوت...و طبعاً محدش بيعبرها ب توب القماش اللي هية لابساة دة...فلما تلاقي محدش عبرها...بتقوم غطسانة في المية بسرعة البرق

تيجي بقي الأستاذة تطلع من المية....تلاقي جوزها (ده في حالة المتجوزين) جاي جري عليها...عشان يديلها الفوطة عشان تلفها حوالين جسمها و هي طالعة من المية...جريت عليك عقربة يا شيخ!! فوطة إية و نيلة إية!! إنت شايفها منظر أوي!! بلبس الصيادين اللي هي لابساة دة!! فيقولك (لأ أصل المية مخلية المايوة لازق علي جسمها)...جسمها!! هاهاااا... جسمها!! دة علي أساس إن الشباب هتسيب الفاتنات المكشوفين...و يعدوا يبصوا علي مراتك اللي لابسة ٦ متر قماش و ماشية تنقط...ياض دي ماشية تنقط!! بقولك بتنقط

العقلية الشرقية يجب أن تذهب إلي الجحيم

والله أنا حاسة جداً بكل الكلام اللي بيدور جوا البنات المحجبات...لإني زي ما قلتلكوا إني الحمدلله محجبة..هو حجابي مش حجاب صح طبعاً...بس أهو الحمدلله و إنشاء الله ربنا يهديني و أحسن من حجابي

أنا زيكوا يا بنات

في الصيف بحاول ألبس لبس خفيف شوية عشان محسش بالحر و برضو بضرب الطرح الفسفوري

بس عالبلاچ ملهاش حل!! برضو و ليا الفخر بمشي أنقط و أنقط و أنقط

وكتير أوي حسيت إني خلاص إتخنقت جداً من الحجاب...و إني عايزة أقلعة

و كتير أوي برضو بصيت لنفسي في المراية و أنا بشعري و شفت نفسي أحلي مليون مرة من شكلي وأنا بالطرحة

و كتير لبست تيشرتات و قمت لمة شعرى ديل حصان و قلت فيها إية لما أنزل كدا؟؟

و كتير في الصيف حسيت إني حرانة من الطرحة و اللبس اللي بكم وقلت فيها إيه لما أنزل بلبس صيفي؟؟

وكتير مسكت موبايلي و شفت علية صور ليا بشعري و قلت فيها إية لما أحط الصورة دية عالفيسبوك؟؟

و كتير سافرت العين السخنة و الساحل و حجابى خنقني جداً..و قلت فيها إية لما ألبس كت و شورت زي بقيت البنات؟؟

و كتير جالي أفراح و قلت لنفسي فيها إية لما ألبس الفستان السان بروتيل دة كدا من غير كارينا و بوليرو؟؟

و كتير و كتيييير و كتيير و كتير

بس رجعت فكرت بيني و بين نفسي

قلت إزاي؟؟

إزاي ربنا يبقي عايزني...و أنا أقولة لأ

إزاي ربنا يبقي بيحبني...و أنا أرفض حبة ليا

اه والله

طب إنتي عارفة إن فية بنات كتير أوي أوي مش محجبات؟؟

إنتي بقي عارفة إن ربنا سابهم و إختارك إنتي...إختارك إنتي و خلاكي تتحجبي عشان بيحبك...عشان عايزك معاة في الجنة...عشان عايزك تعملي كل الفروض اللي عليكي عشان بيحبك و خايف عليكي لنار جهنم تمِسِك

و إنت بقي عايزة ترمي حب ربنا ليكي و تدوسي علية عشان شعر كيرلي و لبس صيفي

والله الموت مش بعيد...والله مش بعيد

إنتي في أي لحظة ممكن تموتي...فلية بقي تموتي و إنتي مش راضية ربنا؟؟ عشان ترضي الناس اللي حواليكي؟؟ تزعلي ربنا منك عشان الناس اللي حواليكي يقولوا عليكي مزة؟؟ طب و لما تموتي و تدفني و تبقي تحت التراب لوحدك..المعجبين بجمالك و شعرك و لبسك و ستايلك هينفعوكي؟؟ تفتكري ممكن ينفعوكي؟؟ 

طب و لما تموتي و إنتي مزة هتفرق معاكي فإية؟؟ هو الكفن بتاع المزز اللي بشعرهم بيفرق عن كفن اللي ضاربة كارينا؟؟

الكفن مبيفرقش ما بين شورت و حجاب...بس اللي بيفرّق...الحساب

طب لما تطلعي لربنا و يحاسبك...هتقوليلة إية لما يقولك (أنا بحبك و خليتك تتحجبي عشان متشوفيش نار جهنم...بس إنتي عاندتي و عافرتي و برضو قلعتي الحجاب) هتقوليلة اية؟؟ هتردي بإية؟؟

متخليش البنات اللي حواليكي يفتنوكي بلبسهم و شعرهم...كلنا هنموت....المزة أم بكيني هتموت...المزة أم شعر أصفر هتموت...الوحشة اللي بتنقط هتموت...الوحشة أم كارينا هتموت...كلنا هنموت

طيب و لية نموت و إحنا مش عاملين اللي علينا؟؟

عشان لقب مزة؟؟

معلش مفيهاش حاجة فكك من الكلكعة و العُقد

و أنا بقولك أهو إنتي بحجابك بكارينتك بطرحتك بقمطتك بلبسك اللي بكم بسواريهاتك البيئة بمايوهك اللي بينقط عالبلاچ مزة

والله مزة

مش إنت راضية ربنا؟؟ واللي هتقولي (معلش يعني ماهو السكيني و الليجينج و السبانيش مش لبس حجاب...فالأحسن لها تقلعة..مدام هية كدة كدة مش محجبة الحجاب اللي يرضي ربنا) هقولها خليكي في حالك يا أمورة...و الدين درجات...مش معني إنها مش لابسة صح إنها تقلعة...الحل لإنها مش لابسة صح إنها تحاول تحسن لبسها...مش تقلعة خالص!!! ما إحنا لو مشينا بالمبدأ دة يبقي اللي بيصلي بسرعة يسيب الصلاة..و اللي بيتنرفز و يشتم غصب عنة و هو صايم ميصومش...واللي بيكدب و بيخون و بيغتاب يسيب الإسلام أصلاً

فكر خاطئ..و تفكير بدائي

دينا مقلناش إننا لو معرفناش نعمل الحاجة ١٠٠٪ صح  نقوم سايبينها...دينا مقلناش كدا

البنت اللي حجابها مش صح (زيي كدة) تحاول تحسن من لبسها و حجابها مش تقلعة خالص

البنت اللي عايزة تقلع الحجاب عشان شكلها كبر أوي...والله كلنا هنموت...المزة هتموت و المحجبة هتموت...و زي ما قلتلك الكفن و القبر مبيفرقوش بين شورت و طرحة....و صدقيني لما حسابك يبدأ مع ربنا ساعتها هتتبسطي بسنك الكبير اللي مكنش عاجبك في الدنيا

والله ربنا جميل و جنتة جميلة أوي

خلونا بقي ندور عالجنة....خلونا بقي لما يجيلنا الموت نبقي جاهزين لإستقبالة

مش الأحسن إننا نبقي جاهزين للموت؟؟

الموت لا ينتظر أحد

الموت غير مزود بخاصية الإنتظار

 

فإستعدي

رسالة إلي بنتي---يوم عيد ميلادي

بنتي مليكة حبيبتي

مامي إنهاردة بقي عمرها ٢٧ سنة و إنتي عمرك ٣ سنين و نص

مليكة حبيبتي أنا بحبك أوي والله...و بحب كل تفصيلة فيكي

مليكة أنا نفسي تكبري بقي و تقري رسايلي ليكي دية

عارفة يا مليكة إنتي لما عرفتي إنت عيد ميلادي قولتيلي إية؟؟

قولتيلي: مامي أنا هفتح الحصالة بتاعتي فيها فلووووس كتيييير واللهي و هجيبلك تورتة هدية عشان عيد ميلادك

علماً يا لوكا إن حصالتك دية كانت (منطقة عسكرية) ممنوع الإقتراب منها أو التصوير..و اللي كان بيتجرأ و ييجي جمبها كنتي بتكهربية.....بس إنت ضحيتي بيها عشاني

أنا إبتسمتلك أوي...و قربت منك و حضنتك و قلتلك في ودنك: بحبك أوي أوي والله

و بعدين قلتيلي: مامي هو إنت ممكن متسيبنيش في الحضانة و تخليني آجي معاكي عيد ميلادك؟؟

وقتها أنا إتضايقت من نفسي أوي...حسيت بتأنيب ضمير إني وديتك الحضانة...بس والله كل الناس قالولي إن مصلحتك في إنك تروحي الحضانة و متفضليش قاعدة في البيت....والله يا مليكة خلتيني أعيط أوي وقتها...و رديت عليكي قلتلك: لوكا حبيبتي أنا من يوم ما إنتي إتولدتي و أنا أقسم بالله العظيم عمري ما سيبتك في عيد ميلادي و خرجت لوحدي...أنا عيد ميلادي يا لوكا يعني مليكة و بابي و مامي

إنتي إتبسطي أوي و قعدتي تغني و تقولي: هابي بيزدي تو بسمة

بليل جية...قولتيلي: مامي يعني أنا لما أنام و أصحي بكرة هروح عيد ميلادك؟؟

قلتلك: آه يا لولو إنشاءالله

قلتيلي: طيب أنا هنام بسرعة....عشان بكرة ييجي بسرعة

و بوستيني في خدي و قلتلي: بحبك أوي يا مامي 

حقيقي والله العظيم يا مليكة السنة دي..هية السنة الوحيدة اللي حسيت بفرحة إن عيد ميلادي جاي...لإني حسيت بحب و 

سعادة رهيبة في عينيكي إن عيد ميلادي بكرة...حسيت إني حاجة مهمة...حسيت إن حدث عيد ميلادي مؤثر

هو أكيد طبعاً عيد ميلادي مش مهم عند ناس كتير

و مش مؤثر عند ناس أكتر

و أكيد أنا مش حاجة مهمة عند ناس كتير برضو

بس عارفين..أهميتي عند بنتي و حب بنتي ليا...يكفيني...جداً

يكفيني حب مليكة

مليكة...فاكرة لما كنتي بتطفي شمعة عيد ميلادك و جيت جمب ودنك و قلتلك (مليكة قولي أي حاجة نفسك فيها) فاكرة إنتي وقتها قلتي اية؟؟ قلتي (نفسي في شوكولاتة كتيييير)....إنهاردة بقي إنتي جيتي سألتيني و قلتيلي (مامي هتقولي نفسك في إية و إنتي بتطفي التورتة؟) و أنا فضلت أضحك إنك لسة فاكرة...قلتلك (نفسي في شوكولاتة كتيييير زي لوكا)...بس أنا كدبت عليكي...لإني مش هأتمني كدا و أنا بطفي شمع عيد ميلادي

أنا هأتمني إنك لما تكبري و تنشغلي في الدراسة و بعدين الجواز...تبقي لما تقري كلامي دة...تدعيلي

ها؟؟ إتفقنا؟؟ مليكة هتدعي لمامي؟؟

أوكي يا لوكا؟؟

بحبك يا مليكة

وأنا كمان هعمل زيك يا مليكة و أنام بسرعة عشان بكرة ييجي بسرعة 

نكدية و أفتخر

هوا أنا اللي كبرت؟؟ ولا المشاكل هية اللي صغرت؟؟

هو أنا لية لما بتحصلي مشكلة مبقتش أنهار و أتضايق زي زمان؟؟

لية المضايقة مبقتش تضايقني؟

لية مبقتش أزعل؟؟

أنا عارفة إن في ناس كتير هتقولي إحمدي ربنا إنك مبقتيش تضايقي...بس حقيقي أنا متضايقة إني مبقتش أتضايق

آه والله...متضايقة إني مش بتضايق 

بيراودني إحساس بإني بقيت جِبلة..اه والله جِبلة

لا بجد...سؤال بس هو لية لما بتحصلي مشكلة بتضايق و بنفعل بس بيكون لمدة ٤ دقايق...فقط لا غير

لأ و الغريب إني لما بكلم صحابي مبحكلهمش علي المشكلة...مش ببقي قاصدة محكيش...بس والله لأني مببقاش متضايقة بنسي أحكيلهم علي اللي حصل...و لو حصل و حكيتلهم بعد دقيقة بالظبط برمي أي إفية و أفضل أضحك معاهم...علي عكس زمان...كنت بفضل ٦ ساعات...٦ ساعات إية!! قصدي ٦ سنين..أفضل ٦ سنين أحكي نفس المشكلة و مبغيرش الموضوع...كنت موهوبة و متميزة في النكد و الأڤورة...إظاهر إني إتحسدت

أنا بقي مش عارفة..مش فاهمة

هو أنا إتعودت عالمشاكل فعشان كدا خلاص تنحت؟؟

ولا دا رضا من ربنا عليا إنة خلاني مبقتش أتضايق

ولا....يا نهار إسود....يا نهار إسود ليكون السبب إني

إني

اني أكون عقلت ولا حاجة

لا لا بعد الشر...لا معتقدش لا

أصل عقلت ازاي؟؟ دا أنا لسة صغيرة و في عز شبابي

  و بعدين أنا

Female

هو فية فيميل بتعقل؟؟ 

لأ صح؟؟

لا يا جماعة بعد الشر عليا من العقلان

لا لا...ربنا ما يجيب عقل ولا حاجة

أنا بس أركز مع نفسي شوية اليومين اللي جايين دول

و هحاول بشدة أستعيد كآبتي

و

شحتفتي

وحشتني أيام الكآبة و العياط اللي من القلب 

يا سلاااام عالعياط أبو شحتفة دة و معاة أغنيتين حزايني كدة 

يا سلاااام

دا الواحد محروم نكد يا جماعة و للتوضيح هو النكد موجود بس هية فين النفس!! النكد الحمد لله متوافر بس هو العيب فيا أنا...أنا اللي مبقتش عارفة أستفيد بالنكد و أتنكد

دا الموضوع وصل معايا اني لما بشوف واحدة صاحبتي بتعيط و متضايقة بنفسن عليها

بقول يا بختها دي مودها وحش و بتعيط و مكتأبة

و أفضل أفتكر في زكريااات مهببة و أحاول أضايق نفسي و أعصر عينيا عشان أجيب العياط و أكمل المحاولات بجر شكل كل الناس اللي حوالية عشان أخليهم يتخانقوا معايا فيمكن ساعتها أزعل و لا أعيط...لكن مفيش

مفيش 

مش عارفة أزعل يا جدعان

دا أنا حتي والله لما بتضايق زمن الزعل بيبقي ضيق أوي...مبلحقش أعيط ولا أتشحتف ولا أكَسَر في الحاجات اللي حواليا...مبلحقش أفرح بالزعل...حاجة مقرفة

سؤال إلي ربات البيوت: بذمة أبوكوا مش بتستمتعوا أكتر و إنتو زعلانين و متخانقين؟؟ دا كفاية إنكوا بتلاقوا حاجة تحكوها...بتلاقوا حد تشتموا فية...إنما بقا لو مبسوطة...بذمتك بيبقي فية حاجة تتحكي؟ لأ

بيبقي فية حد تنمي و تشتمي علية؟؟ لأ

بيبقي فية سبب يخليكي تمارسي هوايتك (قلبة وشك)؟ لأ

شفتوا بقا إن الزعل حلو و كلة مميزات

طب وبعدين يعني؟؟...إية الحل عشان أعرف أكتأب و أعيط زي زمان؟؟

زمان

زمان!! مع  (حركة البق اللي بتتعمل مع كلمة زمان)...و (تنهيدة طويلة) هااااااه فين أيام زمان!! أيام ما كان الواحد يفضل يعيط بالساعات و يأڤور...يا سلام كات أيام عثل....فعلاً بلد وسخة...حتي الزعل فيها بقي مغشوش...الله يا جدعان! الواحد مش عارف يزعل بقلب! الواحد مش لاحق يكتأب...الواحد مش عارف يجيب دمعتين من عينية!! حتي الزعل و الكآبة بقوا مغشوشين..الله يخرب بيت الإخوان يا شيخ!! هما الإخوان...هما السبب كلاب المرشد دول

لو مبقتش أعرفك....يبقي إتأكد إن السبب حقارتك

إنسحابي من حيات البعض مش ضعف مني ولا عشان أنا غلطانة و مش قادرة أواجههم...إنما إنسحابي سببة رفضي للتعامل مع شخصيات حقيرة...منافقة...شخصيات خلقت لتحتكر الوساخة و الدناوة

أغمض عيناك لتري

لا يوجد شئ محزن أكثر من أن يكون وجود بعض الإشخاص في حياتك مقتصر علي ذكريات تستعيدها و صور تحتفظ بها في مخبأ بداخلك

حقاً إنها مؤلمة تلك الذكريات...تلك الذكريات التي لا تنتهي...إلا بإنتهائي

هل أنتم ممن يغمضوا عيناهم لكي يروا؟؟ 

نعم تغمض عيناك لتري

تغمض عيناك لتري شخص كانت تجمعك به قصة حب

تغمض عيناك لتري شخص توفي

تغمض عيناك و تلمس بيدك يدك الأخري و تتخيل و كأن يد حبيبك هي التي تلمسك

تغمض عيناك لتتذكر صوتة و كلماتة

حينما يكون الموجود مؤلم و محزن فأغمض عيناك لتري ما تريد...أغمض عيناك

 

إن كنت ممن يغمضوا عيناهم لكي يروا...فكان الله في عونك 

فأنا أشعر بك