حكاية حبيبي اللي كان
بقلم: بسمة السباعي
فاكر حكايتك مع الحد اللي حبيتة و-كان-؟.. بجد كانت جميلة اوي بجد...حلاوتها كانت في انك كنت مصدق انك هتكمل معاه.. حلاوتها في اول بحبك تسمعها منة بعد انتظار سنة او اتنين..حلاوتها في ابتسامتك اللي جت علي وشك دلوقتي وانت بتقري الكلام دة..كانت قصة جميلة اوي..قصة فرحتك ولما قررت توجعك قتلتك لما جت فيها كلمة "مينفعش".. فاكر حكايتك معاه اللي انتهت بعياط كتير واغاني كئيبة وتقليب في صورة وليل ونهار بتقري مسدچاتة.. حكايتك معاه اللي انتهت بتغيير رقم موبيلك اللي غالباً كنت بتغيرة مش لانك مش عايزة يتصل لأ انت غيرت رقمك لانك لانك كنت خايف لحسن ميتصلش..انت غيرتة لانك رافض الواقع..رافض انة خلاص..فبتقرر تغير رقمك عشان لما تلاقية متصلش تصالح نفسك ب "ما هو اصلة مش معاه رقمي دة" صح ولا اية؟
خلونا نشوف تفاصيل القصة الحلوة دية..هتلاقيها ابتدت بتليفونات كتير..تليفونات من اللي الخط فيها بيقطع فتتخض انه عدي ساعة! حبك وفرحتك بيه خلوك متحسش ان ساعة عدت...كلام حلو حقيقي والله وانا بكتب دلوقتي وشي متغطي بابتسامة مش راضية تحتفي! طيب خلونا نرجع لحكايتك معاه, فاكر جملة "اية اكتر حاجة حلوة فيا واكتر حاجة وحشة؟" اللي كنت بتقولهالة عشان تفتح موضوع طويل معاه فميقفلش بدري, فاكر؟ طب بلاش طب فاكر لما كنت بتقفل معاه كنت بتغمض عينيك وتفضل تفتكر في كلامة اللي قاله..كنت تفتكرة وتفضل مبتسم..كنت بتروح في النوم والابتسامة مكنتش بتروح.
فاكر لما كنت بتبقي متفق معاه علي معاد تشوفة فية وتوصل قبلة كنت بتفضل قاعد عينك علي باب الكافية عشان تشوفة جة ولا لأ.. فاكر بقي دقة قلبك اللي كانت بتوجعك وبتخليك تنحني لقدام نص سنتي وتفضل تبلع في ريقك وعينك كانت بتلمع اوي بزيادة بجد لما كنت تلاقية جية وداخل من باب المكان؟ فاكر ابتسامتك ورعشة ايديك؟ فاكر احساسك وقتها كان عامل ازاي فيك؟ ولما كان يجي يقعد جنبك كنت بتبقي مكسوف تبص ناحيتة وكان اول ما يمسك موبيلة او يبص علي اي حد حوالية كنت تنتهز فرصة انشغالة دية وتبص ناحيتة.. كنت بتبص ناحية عينية عشان تلمسة بنظرة عينيك.. كان كلامك معاه لغتة سكاتك وضحكة بسيطة.. ولما كان ييجي معاد الفراق المؤقت كنت بتقوم تسلم علية وتفضل باصص ناحيتة بتاع ٣ دقايق وكانك بتحفظ ملامحة عشان تكون معاك في ليلك لحد ما تقابلة تاني.
فاكر اول صورة ليك معاه؟ فاكر فرحتك بيها؟ فاكر يومها انت مبطلتش تبص عليها طول اليوم.. فاكر بليل لما كنت بتكلمة من الهاند فري وفاتح قصادك صورتك معاه؟ كنت بتكلمة وفرحان اوي لان صورتة وصوتة خلتة يكون بين ايديك.. طيب فاكر أول خناقة بينك وبينة؟ فاكر يوميها انت عيطت قد اية؟ فاكر لما كنت مقرر انك مش هترد علية لما يتصل بيك وعملت موبيلك سايلنت عشان تنفذ قرارك.. فاكر يوميها انت كام مرة بصيت علي موبيلك عشان تشوفة اتصل ولا لأ؟ وقتها بتخاف انة يتصل وانت متسمعش الموبايل فا تتحجج لنفسك بأنك تخلي الموبايل مش سايلنت لانك مستني تليفون مهم.. فاكر نفسك وانت بتشتغل نفسك وقتها؟ طيب فاكر بعدها لما موبيلك رن وجريت علية ولاقيتة هو.. فاكر لما قلبك خلاك نفضت ل قرارك ورديت علية ومع اول أللو عيطت جامد.. فاكر؟
عدت سنة واتنين.. وجية وقت الفراق.. اللي غالباً بتبتدي بحوار تافه وبتنتهي بجملة "معلش احنا مش هينفع نكون مع بعض" فاكر وقتها قلبك دق ازاي؟ فاكر لما قفلت معاه وانت مش قابل تصدق ان النهاية جت.. مش قابل تصدق انة خلاص اختار مكان الذكريات.. فاكر اول يوم ليك من غيرة؟ فاكر لما صحيت وكعادتك كنت عايز تكلمة ومسكت موبيلك وقبل ما تطلبة افتكرت انة خلاص.. انة خلاص مبقاش ينفع يكون في بينكوا دقيقة واحدة ولا حتي كلمة.. فاكر انت وقتها حسيت باصعب احساس وهو انك تبقي عارف من جواك انة فعلاً -خلاص-..فاكر انت وقتها ابتسمت وسيبت موبيلك جنبك.. وقتها برضو دموعك نزلت احتلت خدك واجبرت ابتسامتك علي الرحيل.. موبيلك رن وقتها.. جريت تشوف مين بس مكنش هو.. كان صاحبك بيسألك "ها عامل اية انهاردة؟" فاكر كلمة "انا كويس.. تمام جداً" اللي انت قولتهالة وقتها؟ فاكر وجع زورك من كتمتة للعياط عشان تقدر تبين انك تمام؟ فاكر لما صحابك اقنعوك تنزل تخرج عشان تنسي وكدة؟ طيب فاكر وجعك لما كان حد يقولك علية "دة كان شخص حقير" فاكر كنت بتتوجع عشانة ازاي؟ فاكر لما كنت بتتمني انك ترجع تعيش معاه وجنبة حتي لو حزين كان احسن لك من الف وعد سمعتة من صحابك انك هتقابل حد احسن منة تريليون مرة.. انت كنت بتبقي عايزة.. عايز نفسك اللي معاه.
ونسيتة.. وهو نسيك.. حبيت غيرة.. الحياة مشيت.. هو حب غيرك.. بتفتكرة طبعاً.. وهو اكيد بيفتكرك.. انت عايش وبتضحك وبتخرج.. وهو اكيد.. بس ولا انت نفسك اللي كانت معاه.. ولا هو نفسة اللي كانت معاك.
ذكرياتك هي اللي مخلية قلبك ينبض.. والهوا يوصل جواك.. ذكرياتك هي اللي موقفاك.. هي اللي مخلية لسة ليك عمر.. يوم ما تقرر انك تفارق الحياة.. يبقي فارق ذكرياتك.
