حصرياً: ١٣ عادة لا يفعلها الا الفيسبوكاوي "المصري"
بقلم: بسمة السباعي
١- لما يجي يعمل لايك علي حاجة ميبشوفش البوست, لا دة بيشوف مين اللي عامل شير او كاتب البوست لو حبيب يبقي لايك اما لو عدو او حد دون المستوي بيئة يعني او مش مهم عالمستوي المهني فا لو منزل سبق سماوي والله ما هيعبر امة بلايك ويشيلة حتي!
٢- الشخصيات العامة والمشاهير بوجه عام لايك وكومنت لو حتي منزلين بوست محتواة "نقطة" أو "فاصلة"
٣- الحتة بتاعة "واتس أون يور مايند" تحولت من مجرد مكان لكتابة الخواطر الي مكان للتشليق.. التلقيح.. التظبيط.. ادعاء النضافة وشحاتة اللايكات.
٤- التاج: بالنسبة لليوسر المصري بيستخدموا لكسب تلزيقاوي استفذاذي للايكات اللي هو الشاب من دول ينزل صورتة وهو ضارب الفرق في شعرة بتاع حمادة هلال بعد النيولوك ومربي دقن. اووووي وضارب موس في حواجبة اللي هو انا ستايل ويعمل ل ٣٥٥٣٣٢٣ الف واحد تاج عشان ت لايك او لو عندك ذوق ت كومنت! انما تعمل تاج لحد في معلومة مهمة لا مستحيل! هو يا صورة الخروف يا صورة ام طبق الكحك يا صورة الجميل صاحب الاكونت وهو حمادة هلال!
٥- الفيسبوكاوي المصري هو الوحيد اللي بيستخدم تعليق بصور "طن لايكات" "انت عسل" "البنت اللي فوق دية مية مية" صور عايزة الرجم الحقيقة! وهو برضو الوحيد اللي بيستأذن عالانبوكس بسؤالة الغتت "ممكن نتعرف؟"
٦- سياسة اللايكات عندة مرتبطة ب تلايكلي الايكلك هتبطل تلايكلي ولا هعبرك ولو حتي نزلت صورتك عالمريخ!
٧- الستات الكبار مصيبة تانية خالص يا جدعان! تلاقي الست من دول قاعدة راصدة كل قرايبها ولا كانها قاعدة في شباك البلكونة! "البت رانيا بنت اخويا بطلت تعملي اعجابات خالص شكل الولية العقربة امها قالبتها عليا" وياريت بتكتفي بالتحليل بس انما دية بتدخل انبوكس تروق قريبتها رانيا دي "اية يعني بطلتي تعمليلي لايكات هو انا يا بنتي غلطت فيكي ولا عملتلك حاجة وحشة يا بنتي" دايماً طنطات بيفتكروا ان قرايبهم عاملين عليهم مؤامرة لتدميرهم عن طريق منع الهوا واللايكات! هي مؤامرة انما طنط تفكر ان بوستاتها رذلة فا عشان كدة رانيا بطلت تعملها لايك!.. لا مستحيييييل هي مؤامرة اية فهمني انا!
٨- الفيسبوكاوي المصري الاصيل بيعز اوي تجيلة حالة وفاة عشان يدخل ينوح وينكد علي اللي جابونا عالفيسبوك ب ستاتس تجيبله ستميت الف كومنت وعشرين الف لايك المهم البوس بيكون محتواه "ربنا يصبر قلبي مات الغالي مااااات وسابني لوحدي" او لو نضيف شوية هتلاقية كتب التلات حروف اياهم "RIP" ولما بقي تغلط وتسالها او تساله مين اللي مات يطلع عين اللي خلفوك علي ما يرد وفي الاخر بيطلع ابن عم مرات بنت خالة البواب بتاعهم!
٩- استكمالاً لبوست ريست ان بيس احب أوضح ان المصري هو الوحيد الوحييييييد في العالم اللي بيعمل لايك علي بوست مكتوب فية ان حد مات او عيان! فاكر انة كدة بيوجب بشدة لما يلايك وي كومنت! اللي هو انا جدع طحن
١٠- التشيك ان وما ادراك ما التشيك ان! طيب سافر وتشيك ان واستحملناك.. خارج وبتشيك ان فا براحتك عيش! انما في مستشفي وعيان ومرمي علي السرير متعلقلك محاليل سم هاري وبتطلع موبيلك تعمل تشيك ان يا فُكهي انت! يا ساتر عليك وعلي رذالة اللي خلفوك! طب انت في اية ولا في اية! بتموت ولا بتتشيك ان! لا والاكثر تلزيقاً انك تلاقية مخلي حد يصورة وهو حاطط ماسك الاكسجين علي وشة وايدة فيها الكانيولا! اللي هو ونبي تعليقاااات كتير ولايكات ونبببببي! جتك الهم فيك وفي رذالتك! ونبي حد يقفل انبوبة الاكسجين خلوة يتخنق زي ما هو خانقنا معاه!
١١- موضوع فيلينج ودرينكينج وليسننج! ينهار اسود ومهبب! فيلينج مخنوق! فيلينج محروق! فيلينج الوحدة! ليسننج تو زا بيتلز! وحياة خالتك بتسمع البيتلز يا بتاع "هم استغنوا عن اااااه" وفي برضو النموذج البِلِط اللي عايز ضرب الجزمة بتاع "ليسننج تو خطبة الجمعة"! مؤمن وملزق في نفس الوقت سبحان الله! المهم انك هتلاقي الشخص دة عمرة ما عمل هو ب يليسننج او بيدرينكج اية عالحقيقة دايماً هتلاقي بيدرينكج "جرين تي" او "هوت شوكلت" او "لاتية" انما قرفة متلاقيش شاي بلبن مستحيل تلاقية كتبة! حتي المشروبات فيها بيئة وكلاسي! اه يا عالم غلسة غلاسة جبنة بريزيدون! وهتلاقي نفس الشخص بتاع الجرين تي دة وهو عزرائيل جاي يريحنا منة هتلاقوة داخل عالفيسبوك بسرعة عامل تاج لكل الناس وكاتب " از يز عزرائيل اند فيلينج الموت"! اعتقنا بقي يا اخي!
١٢- برضو هتلاقي ان المستخدم المصري هو الوحيد اللي لو حصل وكان فرحان عالحقيقة ونزل صورة وحصل بتلصدفة ان شبشب. اتقطع بعدها او صباع رجلة الصغير اتخبط في منديل! هيقرر انة اتحسد بسبب الصورة الفحيتة اللي هو منزلها فا يتصرف التصرف المصري المعتاد انة يغير الكاڤر فوتو ويحط صورة الخرزة الزرقا وعضة اسد ولا نظرة حسد!
١٣- الفيسبوكاوي المصري الاصيل بياكل وبيشرب وبيخرج وبيسافر وبيحس وبيحب وبيخطب وبيسيب علي حسب الحاجات اللي تجيبلة لايكات اكتر!
الفيسبوكاوي المصري (حتة جد بقي) ربنا يرحمة من نفسة ومن دماغة لانة حقيقي غلبان بطّل يعيش.. بطّل يحس.. بطّل حتي ياكل اللي يحبة.. دة حتي بطّل يعيش.. في سبيل الالف لايك.. وبيعيشوك؟ بيفرحوك؟ بيخلوك تحس انك مبسوط بجد؟ اكيد لا لانك ولا انت عايش اللي بتحبة ولا عارف تحب اللي انت مبين انك عايشة.. حقيقي والله ربنا يرحمك من نفسك.. ويفرحك بجد.
