كلنا جوانا أوضة مضلمة مليانة كراكيب و ياريت بعد ما تقري كلمة كراكيب متستغربش أوي و تعمل نفسك مفهمتش...الأوضة دي ليها مكان في قلبنا مليان أحداث علي ناس مبقتش موجودة في حياتنا علي ذكريات لما تفتكرها وانت بتقري كلامي هتبتسم و فيها كمان فراق و فيها ذكريات لينا مع أبونا و أمنا فيها لعب مكسرة و فيها كمان صوت البحر و فيها طعم الفريسكا اللي ميتنسيش فيها كمان عنقود عنب ماسكوا بإديا المبلولين مية مالحة...في الأوضة دي قرارات كتير و كلام كتير مقولناهوش....الأوضة لية مضلمة؟ و إزاي في عز ما هي مضلمة شايفين كل دا؟ هقولك أنا....كلها دي ذكرياتك و انت أكتر واحد عارف في إيه في حياتك عايز تخفيه و عشان الأوضة بتاعتك و الكراكيب بردو بتاعتك فانت شايف إنت بتخفيها فين أما بقا ليه مضلمة فلإن إحنا كلنا ببساطة عايزنها تفضل كدا غامقة خالص لأنها لو نورت هنشوف اللي فيها بكل وضوح هنشوف حاجات إحنا عايزين منشوفهاش فركناها جوا الأوضة دي جوا قلبنا و قفلنا جميع الأنوار خليناها معتمة...كدا أحسن والله
