اللي في الأعلي لينك مقال (زوجات تحت الإقامة الجبرية) الحمدلله نُشر اليوم علي روزاليوسف...يهمني رأيكم جداً
الجمعة، 28 مارس 2014
الأربعاء، 26 مارس 2014
٧ سطور----حماتك كارت ولا خط؟
٧ سطور إنهاردة هاتكلم فيهم مع البنات اللي هايتخطبوا و البنات المخطوبين
صباح الخير يا آنسات....طبعاً كتير أوي أتكلم معاكو عن إزاي تنجحي جوازتك صح؟
إنهاردة بقي أنا هاقولك ٥ شروط لتحصلي علي جوازة ناجحة
١-حاولي بقدر الإمكان أن تختاري شاب يكون (سمعة تقيل) و ياريت يكون (أطرش) عشان بس ميفضلش يسمع كلام أمة و يجي يقرفك و يطلع عينك
٢-حاولي بقدر الإمكان أن تختاري شاب تكون أمة كارت مش خط...لإنها لو خط هاتشوفي أيام سودا...كل دقيقة هتكلمة و إنتي في الآخر اللي هتتخنقي و تطقي...فأسمعي كلامي و دوري علي واحد أمة كارت و ياريت لو تكون معندهاش موبايل أصلاً هيبقي أفضل
٣-يجب أن يكون بيت الزوجية علي بعد ٣ قارات عن بيت حماتك
٤- ياريت تختاري زوج يكون يتيم الأب و الأم و ملهوش أخوات بنات...يعني من الآخر مقطوع من شجرة
٤-بالنسبة للنصايح اللي الناس بتقولهالك بتاعة (إزاي تكسبي حماتك) فكك منها خالص لإنك مهما عملتي هتفضلي بنت البطة السودا
٥-طبعاً بالنسبة للتجهيزات بتاعة الجواز فا فكك خالص من الكيرياتين و الماسكات و الصبغات....إنتي عشان تفوزي بجوازة ناجحة لازم تروحي لأي مستشفي و تخليهم يعموكي و يطرشوكي و ياسلام لو يخرسوكي...و ساعتها أضمنلك حياة سعيدة
مع تمنياتي لكم بحياة لذيذة
الغير مخطوبة تتبع التعليمات السابقة للحصول علي جوازة ناجحة...و الأستاذة المخطوبة لو خطيبها مش متوافر فية الشروط دية تتفضل تسيبة
و في حالة إن المخطوبة عملت نفسها كيوت و قالت عليا إني بأڤور و نفضت لنصايحي الذهبية السابقة و عملت فيها ست الحسن و الجمال و قالت (لأ أنا باحب أمة) أحب أقولها طيب ألبسي عشان (أمة) دية هاتفسحك و هاتروقك
صباكو منجا يا مخطوبييييييييييين
الثلاثاء، 25 مارس 2014
فوبيا الطلاق
فوبيا الطلاق إستوطنت داخلنا جميعاً....فمجتمعنا فية المرأة تخشي من أن يقال عليها مُطلقة...فيه الرجل لا يخشي أن يقال علية زاني
الأحد، 23 مارس 2014
دستة جاتوة
دستة جاتوة....الحمدلله نشرت روزاليوسف مقالي الرابع.....مقال كل كلمة فية والله أبكتني....مقال شفت نفسي فية...شفت والدي و والدتي برضة فية...شفت جدي و جدتي...شفت فية كل أب و كل أم
آسفة جداً لأن كلمات المقال حزينة
شكراً جزيلاً
لينك المقال
http://www.rosaelyoussef.com/news/83866/دستة-جاتوة
دستة جاتوة
بقلم : بسمة السباعي
عندي خيال بأني عمري زاد ٥٠ سنة
و إن بنتي اللي عمرها ٤ سنين كبرت و بقت متجوزة
شايفة نفسي عجوزة أوي
جربت أقوم مقدرتش أتحرك
حسيت بألم السن الكبير
حسيت بأن التجاعيد اللي مالية وشي و إيديا بتقولي فوقي إنتي معودتيش شابة قوية
بصيت شمالي...شفت جوزي...شكلة كبر هو كمان
عجِز أوي
بصيتلة و سألتة: هو إحنا لية لوحدنا بقالنا كتير!؟
مردش عليا....بس عينية كانت مليانة دموع
سألتة تاني: هي دينا بنتنا فين يا حاج؟؟ بقالي كتير أوي مشفتهاش
أحتجت دموع عينية...و فرضت وجودها...فرضت وجودها بقوة كمان
بكي...أيوا بكي
معرفتش غير أني أقولة: معلش يا أبو دينا...أكيد بنتنا هتيجيلنا...تلاقيها بس مشغولة شوية
خلص اليوم
و اليوم بقي ٨ شهور
و لسة مجتش
و في يوم كنت قاعدة بتفرج علي برنامج في التليفزيون.....فسمعت المذيعة بتتكلم عن حفلة الدولة لتكريم للأمهات المثالية
فهمت من كلامها أن بكرة عيد الأم
أتبسطت أوي
و صحيت جوزي و قلتلة: أفرح يا حاج...هانشوف دينا بكرة
قام إتنفض و قالي: أزاي!!؟ هية كلمتك!!؟ طب إنتي كلمتيها!!؟ طب هي جاية!؟ ولا قالتلنا تعالوا!؟ طب و لو مجتش!؟ افرضي مجتش!! هنعمل إية!!؟ نفسي أشوفها...نفسي أخدها في حضني زي زمان...ها يا حاجة ردي بقي معقول بنتي جاية!؟
ضحكت أوي و قلتلة: والله جاية...بقولك جاية
قالي: إزاي!! جاية إزاي؟؟
فهمتة أن بكرة هيبقي عيد الأم و أنها أكيد هتيجي عشان تعيد عليا
المهم....خدت كل الأدوية المسكنة اللي موجودة عندي
عشان أقدر أقوم و أتحرك
قمت دخلت المطبخ عشان أحضرلها الكيكة اللي بالشيكولاتة اللي كانت بتحبها و هي صغيرة
و قلت كمان أعملها عصير الفراولة البيتي عشان كانت بتحبة أوي
و ندهت لجوزي و قلتلة ينزل يروح يجيبلها الجاتوة و التورتة اللي هي بتحبهم
الحمدلله ربنا قواني و جهزت كل حاجة
مكنش فاضل بس غير حاجة واحدة
إني أحضر ترابيزة السفرة عشان لما دندونا تيجي يبقي كل حاجة جاهزة عشان مش عايزة أتعبها كفاية عليها جوزها و بيتها ربنا يعينها
المهم طلعت فتحت نور الصالون كلة
شغلت كل النجف
و فرشت علي السفرة المفرش الوردي اللي هي كانت بتحبة
طلعت طقم الصيني اللي كانت مكسرالي نصة و هي صغيرة
و أنا بطلعة من النيش....بكيت
فضلت أبكي
لأني كنت متعودة أني ألاقي دينا جمبي و أنا بطلع الصيني من النيش
كنت دايماً أناولها الطبق و هي تحطة عالسفرة
كانت يا عيني صغيرة فكانت بتجيب كرسي صغير و تقف علية عشان تطول السفرة
إفتكرت لما كانت ماليا حياتي كلها
إفتكرت شكلها و هي مخضوضة و خايفة لما كان الطبق يقع يتكسر منها غصب عنها
شفت إيدي اللي كنت بشيل بيهم ميت طبق
لاقيت نفسي مش قادرة أشيل بيهم غير يادوب طبق
بكيت...لأن كل حاجة إتغيرت
بكيت...لأني ملقتهاش جمبي
والله بنتي وحشتني أوي
بس صَبَرت نفسي و قلت خلاص هانت
كلها كام ساعة و أشوفها
جوزي جية و شايل معاة حاجات كتيييير أوي
سألتة دا إية دا كلة
قالي جبت لدينا كل الحاجات اللي بتحبها
و بصي كمان جبتلها كارتونة شيكولاتة من النوع اللي هي بتحبة
بقولك إية صحيح متحاولي تقنعيها تِبات معانا يومين كدا...تفتكري ممكن جوزها يرضي؟؟
قربت منة و طبطبت علي ضهرة المحني و رديت علية بإبتسامة.....رديت علية من غير كلام
بصلي و قالي بصوت كلة خوف: تفتكري هانشوف دينا؟؟ بجد هانشوفها!؟
هزيتلة راسي بآه
دخلنا نمنا
كنت ظابطة المنبة عالساعة ٧ الصبح.... قلت عشان ألحق أصحي ألبس و أستني دندونا
طبعاً من كتر فرحتي صحيت قبل ما المنبة يرن
بس هي الدنيا ضلمة لية كدا!؟ لتكون الأباجورة باظت!؟
و بعدين إية دا؟؟ في صوت عياط جامد أوي
إية دا!! دا صوت دينا
فضلت أنادي عليها و أقولها: دينا إنتي جيتي
دينا حبيبتي مالك؟؟؟
دينا أفتحي النوووور
دينا مالك بتعيطي لية يا حبيبتي؟؟ مالك يا بنتي؟؟
بس مكنتش بترد عليا
فضلت أنادي علي جوزي...برضة مردش
حاولت أقوم عشان أشوف في إية
صوت عياطها قلقني عليها أوي....بس مش عارفة أتحرك من مكاني! والله ما عارفة
سمعت صوت جوزي بيبكي
كنت لسة هصرخ و أقولة مالكوا في إية! لية كلكو بتعيطوا!!؟ لاقيتة بيقول
أمك كان نفسها تشوفك أوي يا دينا قبل ما تموت
وقتها فهمت سبب الضلمة اللي أنا فيها و فهمت لية هما بيعيطوا....بكيت..... بكيييييت أوي
بكيت مش لخوفي من أني مت....بكيت لأن مشفتهاش
مشفتش بنتي حبيبتي
و خلاص كدة مش هاشوفها تاني
خلاص الموت مضي علي قرار الفصل النهائي
خلاص مفيش دينا تاني
طيب ينفع يارب تخليني أفتح عينية ألمحها بس
نفسي أشوفها
و في وسط بكاها سمعتها بتقول: ماما حبيبتي متزعليش...حقك عليا
با رد عليها بس خلاص...مفيش كلام مني هايوصل
خلاص أختلفت لغتنا
ماما بحبك
والله اسفة
و أتزحزحت الطوبة اللي كانت متواربة
أتزحزحت و أنتهي بينا الحوار
الطوبة قفلت عليا بيتي....و الضلمة بقت إجباري....خلاص مبقتش سامعة من بنتي غير صوت خطواتها
ودعتها و طلبت منها تبطل بكا
قلتلها لا إله إلا الله يا بنتي
في وسط ضلمة المكان...سمعت صوت بنت بتقول: يا ماما...بتعيطي لية يا ماما!؟ مالك يا ماما؟
فتحت عيني....بصعوبة...إستغربت جداً إني شايفة.....بصيت لاقيت نفسي في بيتي....واقفة جمبي بنتي و لسة عمرها ٤ سنين
دينا حبيبتي لسة معايا
جربت أقوم من مكاني
ففرحت جداً أني عرفت أقوم و فرحت أكتر أن دينا لسة جمبي
حضنتها جامد أوي
حضنتها و كنت خايفة
كنت خايفة من خيال إني لما أعجز ميكونش مسموح لي غير بصور بنتي و بس
كنت خايفة لتكون نهايتي زي نهايتي اللي شفتها في خيالي
بس المهم إني حمدت ربنا أنه خيال...و خلاص خلص
هو آه بالنسبة ليا كان خيال....بس للأسف دة واقع بالنسبة لناس كتير أوي
أبناء كتير أوي مقصرين في حق والدهم و والدتهم بحجة أنهم مش فاضيين...أو أن أبوهم بينصحهم كتير و هم خلاص كبروا عالنصيحة! أو لأن والدتهم بتكرر الحكايات! و هما خلاص مصدعين أوي و مش قادرين يستحملوا ولا نصيحة ولا حكايات متكررة
إنتهي يوم عيد الأم
و أتقفلت كل الأنوار
إتلم المفرش الوردي
إتشال طقم الصيني
إتكتم صوت الضحك العالي
الكلام بقي بحدود
إنصرف كل الحضور
عاد الصمت و النور الخافت ليحتل بيت الأم
إنتهي يوم عيد الأم
و إنتهت معاة تلك المشاعر المؤقتة
تلك المشاعر التي تتمدد في المناسبات و الأعياد و تنكمش في الأيام العادية
إنتهي يوم عيد الأم
و عادت الأم لذكرياتها منتظرة عيد الأم القادم
إنتهي يوم عيد الأم
لتعود كل قطعة من قطع الشطرنج إلي مكانها الأصلي
و تظل الملكة العجوز وحيدة لا تجد من يقف جوارها سوي وزير مُسن ضعيف
و يظلوا في مكانهم و قد أنهكهم التعب....منتظرين لمسة من يدك لتحركهم إلي قربك
أعتقد أنك إذا لم تحرك الملكة و الوزير بقرب خانتك فستخسرهم للنهاية
فكر جيداً...و أتخذ قرارك
قبل أن يأتي الموت بحركة فجائية و يأخذ منك ملكتك و وزيرك
فكر جيداً
قبل أن يتفوة الموت بكلمة
كش ملك
الجمعة، 21 مارس 2014
الأربعاء، 19 مارس 2014
٧ سطور----للزوجات فقط
٧ سطور
٧ سطور إنهاردة هتكلم فيهم (مع) الزوجة المنكوشة....و بقول مع مش عن
هحاول أوصل معاها لحلول يمكن ترضي تسرح شعرها
يا مسهل يارب
أختي الزوجة إنتي ناكشة شعرك لية!!!!!؟؟
طيب بلاش شعرك....لابسه واسع و مبهدل و ألوان مش لايقة علي بعضها في البيت لية!!!!؟؟؟
طب بلاش اللبس الواسع المبهدل....قالبة بووووووزك علطول لية!!!؟
البنت من دول تفضل قاعدة لابسة لبس أبو لهب و ناكشة شعرها و تسألها إنتي عاملة شعرك كدة لية ترد (بسماجة) و تقولك (كيرلي) أو لو حصل و مكنتش مكرللاه تلاقيها عاملاه (كحكة العيد اليتيمة)! و قالبة خلقتها و قاعدة بتدور علي أي خناقة معدية و في الآخر تستغرب أوي أن جوزها قاعد ليل و نهار عالقهوة
لأ حقيقي معندوش حق! يا شيخة إتهدي شوية دا القهوجي مُلفت عنك
إتقوا الله في أزواجكوا و بلاش تلوث بصري
ياريت تسرحي شعرك و تلبسي لبس عدل بلاش تكنِزي اللبس الحلو للخروج بس
و الأهم من دا كلة
فكي التكشيرة و ألغي البوز
أعتبري نفسك في أيام الخطوبة أيام ما كنتي عاملة فيها ست الحسن و الجمال
حقاً كم أنت مسكين أيها الزوج المصري دا كفاية الكحكة و أزياء جنكيز خان والله
اللي مستفزني بقي أوي أن البنت قبل الجواز بتفضل ٦ سنين تشتري في (لبس الجواز) و بعد الجواز هي (بيجامة واحدة منتنة) و مبتتقلعش....والله مابتتقلع
طب يا بنت الحلال غيري البيجامة دية!! تقولك مريحة
مريحة اية يا مفترية دا من كتر مانتي لازقة فيها بقت بريحة
إعتقينا و إعتقي جوزك
لكن برضو مفيش فايدة تلاقيها دخلت البيجامة الغسالة و لبست لبس حلو لحاد ما البيجامة تنشف و هوب تنط جواها تاني
بين الزوجات و اللبس المعفن المبهدل قصة حب لا تنتهي
بجد شئ يسد النفس
أخواتي المتزوجات أتمني أنكوا تسرحوا شعركوا.....و ونبي بلاش أزياء أبو لهب و جنكيز خان أرجوكوا بلاش
يلا أنا هاقوم بقي عشان أجيب البيجامة بتاعتي من عالمنشر زمانها نشفت
تصبحوا علي ألف خير
الثلاثاء، 18 مارس 2014
كنبة وردي
عندي خيال
خيال بأني أعيش في بيت يكون حيطانة ملزوق عليها ورق حيط لونة وردي في أبيض
البيت يكون صغير أوي
شايفة جواة كنبة لونها وردي
و شايفة كمان قدامي ترابيزة خشب صغيرة محطوط عليها تليفزيون قديم....قديم أوي
شايفة يميني مكتبة مليانة كتب...و أجنداتي اللي فيها كلام كتباة بخطي.....مليا الرفوف
بيني و بين التليفزيون ترابيزة إزاز مدورة....محطوط عليها مفرش صغير كروشية أبيض
فوق المفرش....حوض زرع مدور صغير فيه زرع أخضر جميل أوي
عالأرض في سجادة لونها سماوي
ناعمة أوي
وهناك....شمال
شباك كبير أوي
شباك له شيش
الشيش مفتوح و الشمس داخلة البيت منوراة
منوراة و كأن البيت ملهوش جدران
الشباك علية ستارة لونها أبيض
يمين الصالة اللي فيها الكنبة في حمام و مطبخ صغيرين
و شايفة نفسي قاعدة عالكنبة
مبتسمة أوي
مبسوطة أوي
ماسكة كتاب
و في إيدي كوباية شاي دافية
الله! والله أنا مبسوطة أوي
حقيقي بيت جميل أوي أوي
بس خيال
خيال جميل
فتحت عيني
و قررت أحقق اللي شفتة في خيالي
قلت هالزق ورق حيط وردي علي كل الجدران و هغير لون الستاير و هخلي بيتي نسخة طبق الأصل من اللي شفتة في خيالي
قررت أفتح كل الشبابيك اللي حواليا
قررت أخلي الشمس و نورها يفرضوا وجدوهم بقوة جوا بيتي
هاحقق خيالي
هاحققة
بس تفتكروا لما خيالي يبقي واقع هاتبسط بية زي ما كان خيال!؟؟
لأ طبعاً
لأ.... لأن الخيال محبوب أوي لأنة مش واقع
و أول ما بنحققة و بيبقي واقع.... بيبقي عادي
الخيال حين يفوز بلقب الواقع....لا يهتم به من كان يتخيلة
بل يهملة....بمعني أدق بيرمية في الزبالة
و بيعمل خيال جديد
عشان يعيش فية
و يفضل يتمناة...و يستناة
هكذا نحن جميعاً
نعشق ما لا نري
نعشق الغير ملموس
نعشق الخيال
لما الدنيا بتضيق عليا أوي....و بحس أني قرفانة من كل الناس اللي حواليا
بنادي علي خيالي....و بأخرج معاة....باخرج معاة من الواقع
أوضة فاضية
سدادة ودان
بغمض عينية
و أبعد بخيالي
أبعد علي قد ما أقدر
أروح هناك أوي...أحس بالهوا اللي بيخبط في وشي.....باختار كل تفصيلة حواليا.....أجري....أضحك
بعيش حتي و لو لنص ساعة في خيالي
آه هو خيال...بس شايفاة و حسه بيه أوي
والله العظيم النص ساعة دية بتفرق معايا جداً
عارفين ساعتها لما بافتح باب أوضتي و أقابل الواقع
ببقي هادية والله
جربوا...مش هتخسروا
ثق في خيالك
لأنة هو الوحيد اللي بيخليك تسمع الكلام اللي نفسك تسمعة
هو الوحيد اللي بيخليك تبتسم بجد
هو الوحيد اللي بيخليك تشوف نَفسَك زي ما أنت عايز تشوفها
هو الوحيد اللي بيخلصك من دوشة الواقع
كله يشغل موود الخيال
و يفضي دماغة
و يروح مكان ما يحب
حقق في خيالك ما يمنعك الواقع من تحقيقة
السعادة ليست فقط في تحقيق الأحلام....فالسعادة التي نشعر بها أثناء تخيلنا لهذا الحلم تفوق بآلاف المرات سعادتنا حين نحققه
الاثنين، 17 مارس 2014
مقال (هتش النوستالجيا) علي روزاليوسف
الحمدلله نُشِرت مقالتي التانية علي روزاليوسف
و دة اللينك....أتمني سماع تعليقاتكم
شكراً جداً
http://www.rosaelyoussef.com/news/82014/هتش-النوستالجيا
الأحد، 16 مارس 2014
أبحث عن صاحب خيال الظل الأبيض
لا تثق أبداً في أحد...حتي نفسك لا تثق بها....فلا تنسي أن نفسك هي التي جعلتك تتألم حينما أختارت لك أن تحب...هي التي ظلت تشاهد دموعك و لم تحاول أن تمنع عنك أحزانك...نفسك جعلتك تحب و تعاونت مع الحزن ضدك...نفسك كادت أن تقضي عليك.....فلا تثق بأحد صدقني.....فالجميع ظلالهم سوداء
و سواد ظلالنا هو الصورة الوحيدة الصادقة...نعم هو خيال ظل.....لكنه خيال صادق...... فهو دائماً يعكس سواد ما نخفية بداخلنا
يعكس سواد تلك الأشخاص الحاملون لوجوة بنكهة الملائكة
يعكس سواد جميع البشر
حتي أنت........خيال ظلك يعكس سوادها
حين تصبح خيال ظلالنا بيضاء اللون...فسيختفي الحزن
لا تثق إلا في لغة خيال الظل
فقط خيال الظل
السبت، 15 مارس 2014
موضوع تافه
أنا مبحبش أسمع أغاني أنجليزي خالص...بمعني تاني أنا مش بلاقي نفسي غير في الأغاني العربي
مش بشغل أغاني أنجليزي عالساوند كلاود عشان الناس تشوف أني بسمع أغاني نضيفة و أني ياي كلاسي و شيك و بسمع عديلة! أنا بشغل اللي بحب أسمعة و بس
عمري أبداً أبداً ما هاكل السوشي
مبحبش صوت چورچ وسوف و أغانية بتستفذني جداً
بحب عمرو دياب جداً
بكره الأفلام كلها سواء عربي ولا أنجليزي
مدمنة مسلسلات...أي مسلسلات
بحب مسلسل العشق الممنوع جداً...و عموماً بحب المسلسلات التركي جداً جداً جداً
مبحبش أحمد مكي ولا باسم يوسف
متحيزة جداً لڤودافون و عمري ما أفكر أجيب خط موبينيل أو أتصالات
مبحبش فيلم تايتانيك
بكرة الأكل الصيني
بكره الفوود كورت جداً جداً جداً بتاعت سيتي ستارز و كارفور
بس بحب الفوود كورت بتاعت سن سيتي
مبحبش أغاني مشروع ليلي خالص و مش هاحبهم
بتعصب جداً من البنات اللي بيروحوا يتعلموا تانجو و صالصا! معرفش لية بتنرفز أوي أوي كدة!؟ حشرية أنا أوي..بحاول أقنع نفسي أن كل واحد حر...بس برضو بتخنق منهم
بحب جداً أتفرج علي أغاني أم كلثوم علي روتانا كلاسيك
بكرة لبني عسل بتاعت قناة الحياة
بحب بعض أغاني منير و ليس منير
بتنرفز طحن من نضارة شرف عامر
بحب حر الصيف جداً
بكره الجوافة و ريحة الجوافة
بكرة النور الأبيض اللي هوا النيون بجد بيعصبني أوي
بعشق شيريهان
بحب عبدالمنعم مدبولي جداً
و أخيراً
مسرحية هالة حبيبتي التي أضحكت الجميع....بتبكيني أنا جداً جداً
الخميس، 13 مارس 2014
شكراً يارب
الحمدلله إنهاردة إتنشر لي أول مقال في روزاليوسف
أنا مبسوطة أوي والله
اللينك
http://www.rosaelyoussef.com/news/81487/ندي-قلعت-الحجاب-و-بقت-مُزة
الأربعاء، 12 مارس 2014
٧ سطور----بلد للبدل أو للإيجار
٧ سطور
الوليد و أرض توشكي
أبوالعينين و أراضي طريق إسماعيلية الصحراوي
سياج وأرض اللبينى
أحمد بهجت و ١٥٢ فدان بتوع دريم لاند
هشام طلعت مصطفي و أرض مدينتي
أحمد عز و أستيلائه علي شركة حديد الدخيلة
دا غير الفساد المالي ل الاستاذ شفيق و راسخ و الجمّال و كينج الأفلام (الأن كت) صفوت الشريف و أحمد المغربي و إبراهيم كامل و جرانة
دا غير طنط سوزي ملكة القراءة للجميع
ولاد الذينا كانوا بيلعبوا بنك الحظ علي مصر
و كلة بما يرضي الله قاعد في الچاكوزي و اللي لسة مخرجش أكيد العَطَله في برائتة جاية من الهيلث كلاب و خصوصاً إني سمعت إن هناك إصلاحات في جميع وحدات الچاكوزي!! إنما أوعوا تفتكروا إن لا سمح الله تأخير برائتهم جاي من ناحية الحكومة!! لا طبعاً
من يامة الحكومة فالحكومة ماضية علي قرار البرائة في قضايا مُلَفقة للبريئين تتهمهم بفساد مالي قيمتة لا تتعدي ال ٨٠٠ مليون جنية بكفالة مالية قدرها ٢ جنية و نوووووص
و الآن تلتقون مع أولي حلقات المسلسل الكوميدي (الواجب القومي) بطولة: الرصيف الحكومي
مصادرة بضائع باعة فقراء جائلين لأستيلائهم علي جزء من الرصيف الحكومي!! هههههههه
تكسير فتارين و قطع أرزاق الباعة الغلابة بسبب أنهم عايزين فلوس حلال!! فأستولوا علي جزء من (الرصيف الحكومي) و حولوا المنطقة إلي ما يشبة السوق!! إنما لو كانوا سرقوا ٢٠٠ فدان و حولوا المنطقة إلي ما يشبة ب (كومباوند) كان عادي و براءة كمان
يا سيات الوزير يا محقق الواجب القومي! أنا مُتفقة معاك في رفض مبدأ تحويل الأرصفة إلي مراكز تسوق...بس أنا ضدك و بشدة في أنك موفرتش لهؤلاء الشرفاء البسطاء محلات أو بلاش محلات يا سيدي...وفرلهم خيمة زي بتاعة (معرض صنع في سوريا) كدا و تقوم بتوجيههم علي هناك...لكن تكسر فتارين و تصادر بضايع عليها أقساط! دا مش واجب قومي زي ما حضرتك فاكر! دا واجب مدرسة! لما حضرتك تنيم ناس جعانة أنهاردة بسبب إشغال رصيف!!! يبقي أنت كدا بتحول الشريف إلي حرامي...و ساعتها متجيش تحاسبة و تقولة أنت بتسرق لية! ساعتها إبقي حاسب نفسك
عموماً نرجع لموضوع الرصيف الذهبي الحكومي
أنا مكنتش أعرف إن الرصيف أهم من آلااااف الفدادين
أنا مكنتش أعرف أن الرصيف الحكومي أهم من توشكي و أراضي ٦ أكتوبر و أراضي طريق أسماعلية و الضبعة و مصانع و شركات مصر اللي إتخصخصت كلها و غيرة و غيرة و غيرة
أنا مكنتش أعرف مدي فاعلية الدور اللي بيقوم بية الرصيف الحكومي المصري
فليسقط الباعة الغلابة اللي عايزين يسرقوا الرصيف
و يحيا النزيه أحمد عز
طب علي فكرة بقي الراجل اللي قسم علم مصر ل ٣ أجزاء دا راجل فهيم و عبقري
هقولكوا لية
الراجل دة كان عارف إن مصر ٣ طبقات
طبقة كوسة
طبقة لحمة مفرومة
طبقة بشاميل
المهم بجد بقي
تحذير للشعب المصري: خلوا بالكوا..أرجوكوا ونبي خلوا بالكوا....أوعوا لو حد لقي نفسة داخ ولا تعب يفكر يقعد عالرصيف
لحسن الوزير بتاعنا شديد أوي في موضوع الأرصفة دة
كلو إلا الرصيف الحكومي
إلا الرصيف! فاهمين
اللهم كن للفقراء والمحتاجين والمساكين.. اللهم أطعمهم فإنهم جوعى.. وأسترهم بسترك وأحفظهم بحفظك.. ووسع عليهم وأدخل الفرح لقلوبهم يا حنان يا منان يارب العالمين
آمين
حسبي الله و نعم الوكيل
تعقيباً علي حملات إزالة الإشغالات في منطقة أسفل كوبري الفنجري و الاعتداء على الباعة و مصادرة بضائعهم التي قام الباعة بشرائها بنظام التقسيط...بلد قذرة و فكرة نفسها كدا هتنضف! يا سيات الوزير إزاي تسمح بكدا!! يا أستاذ المفروض انك قبل ما تمضي علي قرار فاشل زي دة...و تلم الباعة الغلابة دول و تصادر بضايعهم و تسلمهم تسليم آمن للسجون لأنهم طبعاً مش هيقدروا يسددوا الأقساط اللي عليهم!! كنت توفرلهم حتة يبيعوا فيها!! حل المشكلة مش بمصادرة البضايع! يا سيات الوزير أنت كدا بتحول الباعة البسطاء الشرفاء إلي بلطجية و حرامية! لمجرد أن البلد الواسعة دي كلهاااا مفيهاش حتة أرض تسمحولهم فيها بكسب الرزق الحلال....وزارة الداخلية فاشلة و هي المسؤلة عن زيادة البلطجية...حسبي الله و نعم الوكيل....يا سيات الوزير شوف كام طفل هينام أنهاردة و الجوع بيقطع بطنة لانك قطعت رزق أبوة أو امة! حقيقي أنا قرفانة منكوا كلكوا
الثلاثاء، 11 مارس 2014
الريس المطلوب مُغلق أو غير مُتاح
الشقة علي العروسة
أو بطريقة أخري
طُعم الشقة نتيجتة مضمونة فهو يصطاد العريس في ٢٤ ساعة فقط
أبتكر الأهالي طريقة جديدة لزحولة بناتهم....هي أنهم يجيبولها شقة عشان تبقي تتجوز فيها
باكيدچ العروسة....إتجوز بنتنا و ستحصل علي شقة و فرش مجاناً
و علي العريس أن يأتي بشنطة هدومة فقط وفقاً لمقولة (إحنا بنشتري راجل) و فعلاً هما مكدبوش! هما فعلاً (بيشتروا) راجل
بقي بزمتكوا عروسة بشقة لُقطة ولا مش لُقطة!؟؟
يتجوزها ولا ميتجوزهاش!؟؟
يتجوزها طبعاً
فقر الشباب هو مصدر إلهام الأغنياء
من داخل بيت الحاج حسين المنشاوي و الحاجة زينب أحدثكم
آه صحيح..أنا نسيت أعرفكوا مين الحاج حسين و الحاجة زينب دول
بإختصار شديد الحاج حسين موظف حكومي بسيط طلع عالمعاش من ٣ سنين و الحكومة طبعاً مظبطاه!! لأنها بنت حلال وفرتلة معاش شهري كبييييير أوي جداً ليتناسب مع متطلبات الحياة الرخيصة المُدعَمة!!! أما عن الحاجة زينب فهي ربة منزل و أم فقط
المهم الحاج حسين و الحاجة زينب عالحديدة و حتي الحديدة باعوها من أجل عيون إبنهم عمر
عمر شاب درس في كلية الهندسة جامعة القاهرة و تربطة قصة حب طويلة بزميلة له...هذة الفتاة تُدعي دينا و هي أيضاً من أسرة بسيطة
عمر شاب عادي زي ٩٠٪ من الشباب...يعني ولا شقة ولا حساب في البنك ولا عربية
إتخرج من الجامعة و طبعاً حكومة مصر رقيقة المشاعر وفرتلة كل ما يحتاجة
وفرتلة
بطاقة رقم قومي تحمل كلمة (ذكر) في خانة النوع
المهم عمر جالة عروسة!! أيوا جالة عروسة
مش عايزاكوا تستغربوا خالص لأن العروسة كانت لُقطة
هبة...أبوها شغال في الكويت بقاله ٦٠٠ سنة...و عندها عربية تويوتا كورولا آخر موديل...أبوها فاتحلها مكتب هندسي عشان يقضي علي بطالة بنتة....و عندها شقة متشطبة....و لأن (هبة) فتاة أبيها الوحيدة المدللة فالبابي بتاعها وعدها أنه هيفرشلها الشقة كمان
بصراحة هبة عروسة متتفوتش!!؟
عروسة كما يقول عنها الستات الشلت بعد ما يقوموا ب مصمصة البق و ضم الشفاة و تحريكها من أقصي اليمين ثم إلي أقصي الشمال في مرات متتالية (عروسة مال و جمال و أخلاق)....خلاصة الموضوع هبة عروسة متتفوتش
نرجع لموضوع الحوار اللي دار بين الحاج حسين و الحاجة زينب بخصوص هبة ولا دينا
الحاجة زينب: طب يتجوزها إزاي يا حاج و هو مبيحبهاش!؟؟
الحاج حسين: حب اية يا ولية!! بقولك عندها شقة!! شَـــقَـــة (مع فتح البق فا كان بيقولها: شاااا قاااا ااه) و عربية و فلوس متلتلة هتورثها من أبوها!! تقوليلي حب!؟ جاك حب لما يرفصك
الحاجة زينب: طب و يسيب دينا اللي بيحبها!؟؟ دا إبني وأنا عارفاه! والله دا يموت لو سابها
الحاج حسين: يموت يا روح أمه!!..ما يمووت!!...المهم قوليلي بس هي البت دينا دية عندها شقة!؟؟
الحاجة زينب: لأ...معندهاش...و بعدين هية الشقة أصلاً عالعروسة!!! الشقة مسؤلية إبنك يا حاااج.. بقولك بيحبها بقالوا ٥ سنين!! حرام علينا الواد
الحاج حسين: لأ تصدقي حرام فعلاً إنه يسيبها!! دا المفروض يسيب أبوها و اللي جابوها كمان...خلية في الجوازة التانية..و بعدين يا ناصحة تقدري تقوليلي لو راح يتقدم للست دينا بتاعتة دية هيجيب طلبات أبوها منين! ما أهو أضعف الإيمان أكيد أبوها هيطلب مهر و شبكة و شقة حتي و لو إيجار! تقدري تقوليلي إبنك هيجيب دا كلة منين!! و انتي عارفة البير و غطاة! أنا محلتيش غير الكلسون القطونيل دة !! بصي يا حاجة إبنك كدة كدة هيسيب دينا...فا يسيبها دلوقتي و يلحق البت اللي شارياة أحسن ما يسبيها و يقعد يشوي درة
و بعدين يا حاجة دا البت هبة دية عندها مكتب هندسي بتاعها لوحدهاااا!! فاهمة يا ولية يعني اية مكتب بتاعها لوحدها!! يعني إبنك بعد ما يتجوزها و البت تحمل منة..أكيد ساعتها هتسيب الشغل....و ساعتها بس يا أم عمر أبنك هيبقي هو الكل في الكل
دا غير العربية اللي هيتنقل بيها..مش احسن من الميكروباصات اللي البت التانية قاطعة نفس عمر أبنك فيها!!!؟
دا غير ال
الحاجة زينب قاطعت الحاج حسين و قالتلة: والله كلامك عين العقل يا حاج...دا الواد دة يبقي أهبل لو فضل ماسك في البت دينا دية...و بعدين دية حتي بت مقفعة و مسلوعة!! حب اية فعلاً يا حاج! ما هو إحنا أهو! لا كنا نعرف يعني إية حب ولا نيلة و أدينا أتجوزنا أهو و عايشين
و يبتدي مسلسل الحقيقة و السراب فيتحول الأب و الأم إلي الحاجة ثريا أبوالفضل (فيفي عبدة) و يمارسوا الضغوط بكل أشكالها علي المهندس عمر عشان يسيب دينا
و طبعاً عمر بيسيب دينا
و بيتجوز هبة
إذن جملة (إحنا بنشتري راجل) إحنا كنا فاهمنها غلط طول السنين اللي فاتت دية
لأن فعلاً كلمة (شراء) هنا كانت تحمل معني البيع و الشراء...فا شراء الزوج هنا تم بعملة الشقة و العربية و المكتب و الفرش
فإذن هما (إشتروا) راجل
راجل باع حبيبتة لأنها فقيرة زية و بتركب معاة الميكروباص! و قبل ما يبيعها....باع نفسة
فتحول عمر من البشمهندس عمر إلي الغلام عمر
قبل ما أختم قصة عمر و هبة و دينا معاكوا هقولكوا علي حدث مهم
عمر إتخانق مع هبة مراتة...فلم هدومة و راح يغضب عند أمة....فقام أبوه هداه و قاله: يا أبني الراجل مننا ملهوش إلا بيت مراتة......إستهدا بالله كدا....دا شيطان و دخل بينكوا...أكيد عين البت دينا ربنا ينتقم منها....و بعدين إنت لو سيبتها هتتبهدل من بعدها يابني هية مش كاتبالك ولا مؤخر ولا قايمة! إرجع و استهدي بالله
ارجع أيها الغلام
إرجع يا أخويا
توضيح بسيط: استيائي مش من عمر إنما إستيائي من اللي خلا عمر يبقي سوسن!! إستيائي من حكومات مصر كلها لانها هي السبب في ظاهرة إن الشباب و الشابات بيبيعوا نفسهم في سوق الجواز
العيب مش في عمر...ولا في أهل عمر
و العيب برضو مش في هبة...ما هو مش ذنبها إنها غنية
العيب في الحكومات القذرة اللي خلت عمر يبيع نفسة عشان يعرف يتجوز
و غيرة و غيرة و غيرة و غيرة
العيب في الحكومات الحقيرة اللي خلت بنات كتير جداً برضو تبيع نفسها لرجالة قد جدودها عشان يلاقوا فلوس يأكلوا بيها أهاليهم
حكومات قذرة
حولت المجتمع المصري إلي مجتمع هش...رخو...مجتمع قابل للكسر....و المصيبة إن الحكومات تعمل علي تطوير المطارات و دعم السياحة و حاجات كتيييير....يمكن تكون الحاجات دي فعلاً حلوة....بس حلوة في وقتها
لما تصلحوا المجتمع من جواه الأول...هتبقي ساعتها الحاجات دية حلوة
أي ريس هاييجي لازم يحل مشاكل مصر الداخلية فقط..لأنة لما يحل مشاكل البلد الداخلية كل المشاكل التانية هتتحل
هقولك إزاي
لما تقضي عالفقر و البطالة و أزمة سكن الشباب اللي عايزين يتجوزوا
لما توفر مستشفيات محترمة تعالج محدودي الدخل
لما توفر معاش شهري محترم مش ملاليم لكبار السن
لما تدعم الأسعار و مش باقولك تدعم أسعار الآيفون و الآيباد!! إنما تدَعَم أسعار الأكل من لحمة و فراخ لحاد الخضار و العيش
لما توفر لأطفال الشوارع مكان يأويهم و بقول مكان يأويهم مش ملجأ يطلع عين أبوهم تعذيب
لما توفر التعليم الجيد في مدارس فعلاً تحمل شعار مدرسة جميلة و نظيفة و متطورة
لما توفر كل دة....إبقي تف في وشي
لا بجد والله
لما توفر كل دة...و كل دة أصلاً حقوق مش إمتيازات
ساعتها شعبك هيشيل
ساعتها شعبك هيشتغل بذمة
و هيطور البلد
ساعتها مصر هتبقي فعلاً قد الدنيا
أسسوا شباب مصر كويس...عشان يقدروا يشيلوا
أنا عارفة طبعاً أن كلامي ملهوش أي لزمة
فالسرقة و النهب و مص دم الغلابة بقت أفيونة الريس
فأنا أعلم أن مكتوب علي باب قصر الإتحادية لافتة
لافتة تحمل جملتين
ممنوع دخول الرئيس للقصر قبل إستحلاب هذة الأفيونة
و
الرجاء غلق ضميرك و عمل رحمتك بالناس علي الصامت
متحاولش يا شعب بقي مع الريس اللي هيبقي ريس...لانة أكيد هيقرا اللافتة اللي متعلقة علي باب القصر و طالما دخل و قعد عالكرسي فأكيد وافق و أمتثل لقانون الدخول...أنة يقفل ضميرة و يعمل رحمتة عالصامت
فالريس المطلوب مُغلق أو غير متاح إضغط رقم واحد لإرسال ميني كول
Call Ended
الاثنين، 10 مارس 2014
رأيتك في رائحة العطر
زجاجة عطر أعادت لي حزني....فكيف!؟
كيف لمثل هذا الجماد أن يذكرني بما كنت أحاول أن أنسي!؟؟
كيف لزجاجة عطر أن تعيدة إلي خيالي!؟؟
كيف لزجاجة عطر أن تجعلني أحزن!؟؟
مؤلم أن تشم رائحة عطر من كنت تُحب .....لكن.....علي آخر
تشم رائحة عطرة علي آخر....فتتجاهل هذا الآخر.....و تضع يدك علي جبينك...و تغمض عيناك....... فتتذكره
و تسمعه يهمس قائلاً: بحبك
فحينها تنهي حلكة غمضة عينيك و تفتحها
فتري ذلك الآخر الذي يُلقِب نفسة بحبيبك الجديد
و يقول لك: إيه مبتروديش لية!؟
فتأتي تلك الإبتسامة المؤلمة التي تُخفي بها نبرة صوتك المرتعشه...و تجيب عليه قائلاً: و أنا كمان
فيمد يده ليمسك يدك
و هنا يعلن قلبك إحتجاجة...يرفض هذا البديل...يرفضة و بشدة
فيأمر قلبك عيناك أن تفضحك بسيلٍ من الدموع
و حتي الدموع!! حتي الدموع تتجمد في عينيك من برودة مشاعرك...فتظل دموعك مختبأة
مختبأة بداخل عينيك و لا يشعر بها إلا أنت
حين تري شخص لم يعد موجود في رائحة العطر
فأنت حقاً تتألم
الأشياء التي تُجبرك حواسك علي تذكرها...هي أكثر أنواع الذكريات ألماً
فوبيا الڤايبريشين
إلي جميع شركات الموبيلات
الرجاء حذف خاصية الڤايبريشين من الموبيلات اللي بتنزلوها مصر نظراً لأن الشعب المصري كلو عندو حساسية من الڤايبريشين و عندة عقدة رفض الڤايبريشين لأنه بياكل البطارية
إحنا مصابين بفوبيا الڤايبريشين
حقيقة علي فكرة! إحنا كلنا قافلين الڤايبريشين خوفاً من أنه ياكل البطارية
نحن أعداء الڤايبريشين و نفتخر
الأحد، 9 مارس 2014
ترنيمة الرحيل
أسرعوا و أكتبوا طلباتكم
فهناك رعدٌ و برقٌ يمهدان أن الأبواب ستُفتح
و ها هي الأمطار تنهمر بغزارة
وقد أعلن الآن مالك شركة الدنيا أن الأبواب قد فُتحت و أنه جاهز لتلقي طلبات العاملين بشركة الدنيا
إنها فرصة جيدة لي لأقدم طلبي لسيادة المالك و أنا ميقنة أني سأخذ علية الموافقة
فيقيني بقبول طلبي جاء من كلام المالك لنا في قانون العمل بشركة الدنيا المتمثل في دستورة السماوي فهو قال أن حين تُمطرِ السماء فعندها تُفتح الأبواب المؤدية إلي المالك......و حينها ستُقبل طلبات العاملون بالشركة
و ها أنا إرتديت ملابس أنيقة لتليق بالمقابلة
و ذهبت لأتحدث إلية
و في طريقي له
شعرت بوخز يؤلمني...و أخذ جسمي يرتجف
يبدو أن الإله قد أصدر قرارة بالموافقة علي مطلبي
فأغمضت عيني...و قررت النطق بترنيمة الرحيل
غمرتني السعادة...فأنا أعتقدت أن هذا الوخز هو إستئذان من روح حبيسة بداخل جسدي
أعتقدت بأن هذة الرجفة هي بداية رحلة صعودي إلي المالك
و لكن هناك من أفسد رحلتي
فجسدي منع روحي أن تغادرة
جسدي يرتعش رافضاً فراق روحي له
روحي تأبي أن ترضخ لقرار جسدي
روحي تتفاوص مع جسدي و تحاول إقناعة بأن يسمح لها بالرحيل
يرفض جسدي و يعلن رفضة برجفةٍ أسقطتني أرضاً
رجفة رفضٍ صارخة
أيقنت أن جسدي يهاب الظلام...يهاب الموت....يهاب الفناء
فأختار بضيق تفكيرة أن يظل في دنيا الفناء المظلمة
و لأن جسدي يملك قلباً طيباً فذهب إلي روحي و حاول أن يعتذر منها عن منعة لها فقال
أعذريني أيها الروح...فأنا لاستطيع تحمل ظلمة قبر ...أنا أخاف مقابلة الله...فأنا إرتديت ملابس تغضب الله...و فمي نطق بكثير من الكذب...و سمعت بأذني غيبة الكثير....أعذريني فأنا لدي الكثير من المعاصي فكيف تطلبين مني أن أتركك ترحلين! كيف و ان رحلتي فسأرحل معك! و كيف أرحل معك و أنا كاذب و مغتاب و منافق كيف! منعتك لأني أخاف لقاء الله...لكني أقسم لكي أني سأحاول أن أصلح من نفسي و حينها لن أمنعك إن حاولتي الرحيل...بل ستجيديني منتظرك لأرحل معك...أرجوكي سامحيني
قبلت الروح إعتذار الجسد
قبلت و قررت أن تعاون جسدي في إصلاح أخطائة لينالا رضا المالك
مازلت أنا و جسدي و روحي في غرفتي
كنت حزينة لأنني لم أستطع الذهاب للمالك
فيحول بيني و بينة إتفاقية موثقة بينة و بين جسدي و روحي
فيحول بيني و بينه...عمري الذي لم ينفُذ
و لكني لم أستسلم لتلك الإتفاقية
كتبت كل ما أردت أن أقولة للمالك
و توجهت برسالتي
لأقدمها للمرة المائة بعد الألف
عسي أن تُقبل هذة المره
بالفعل قد وصلت إلي نافذة غرفتي
و فتحت النافذة
و نظرت إلي مقر الخالق
و قدمت له رسالتي
سيادة مالك شركة الدنيا
لقد تأخرت في إجابة طلبي كثيراً يا سيدي
رجاءً يا سيدي أن تقوم بنقلي و سريعاً إلي منصبي في حياتي الأخري...إلي منصبي في عالمٍ بلا هو و بلا هي
عالمٌ سأرفض أن أكون أنا فية
عالمٌ سأكون فية معك
يا سيادة مالك شركة الدنيا
لقد أتيت بي إلي هذة الشركة و قمت بتعيني في تلك الوظيفة و أحاطتني بهؤلاء الناس...كل هذا يا سيدي حدث بدون رغبتي...و أنا الآن أطالب سيادتكم بإرجاعي إلي سيرتي الأولي
تراب يتطاير
يا سيدي الإله....يا مالك الدنيا
أعلم أنك لن تهمل رسالتي إليك لأنك تعلم أنها رسالة صادقة
أتمني قبول طلبي بسرعةٍ تتناسب مع شوقي لك
آمين
و بكلمة آمين قد أنهيت طلبي من مالك شركة الدنيا المحترمة
أغلقت النافذة بعد أن إنهمر المطر بغزارة داخل غرفتي
وجهي كان مغمور بمياة....مياة لا أعلم ان كانت من عيني أم من عين السماء
وبعد أكثر من ساعة
إنتهت الأمطار
و غُلِقت الأبواب
جسدي كان ينتفض بشدة بعد أن إبتلت ملابسي كلها من بكاء السماء
عيناي مازال بها بقايا أضواء برق إحتفال السماء بفتح المالك لباب مكتبة للعاملين
ذهبت و أستبدلت ملابسي...و أعددت كوبا من القهوة الساخنة
أما عن رسالتي
فهي معلقة بين السماء و الأرض
إما أن تصل للمالك
أو أن تُفقد كما فُقدت صاحبة الرسالة
الجمعة، 7 مارس 2014
زوجات تحت الإقامة الجبرية
زواج مع إيقاف التنفيذ
هذا هو حال معظم زيجات العصر
زوج يري أن مسؤلياتة تقتصر علي العمل و كسب المال
زوجة تري أن مسؤلياتها تقتصر علي المطبخ و تربية الأبناء
فينسي الرجل أن لة فتاة ترغب في قليلٍ من الحب
و تنسي المرأة أن لها شاب يتمني قليلٍ من الإهتمام
و حين تحاول أن تقنعهم بأن يعودا بنفسهم إلي فترة ما قبل الزواج
فتجد الزوج يرد عليك بحدة قائلاً: والله! و مالة!! و نشحت بقي!! و نتغدي و نتعشي رومانسية بالحب...و أدفع مصاريف المدارس بوستين للمديرة؟؟ و لما يجيلي مُحصل الكهربا أبقي أحضنة و أطبطب علية!؟ و نأكل العيال إية بقي ساعتها!؟؟ دباديب و قلوب!؟؟ عالم فاضية
أما الزوجة فيكون ردها: هو أنا لاقية وقت أهرش!! أنا خلااااص تعبت!! والله تعبت...البيت و العيال و الطبيخ و المذاكرة و أوصل مدارس و أجيب من المدارس و الغسيل و المكوا... و في الآخر تقولولي أرجع لأيام زمان؟!! دا أنا لو في إيدي أرجع لأيام قبل الجواز مكنتش إتهببت علي عيني و إتنيلت إتجوزت....يااااالهوووووي الكوسة إتحرقت
و ينقطع الحوار مع الزوجة نظراً لأن الكوسة إتحرقت
الزوج و الزوجة أجابا بجمل ليست لها علاقة بكلامي معهم...فأنا لم أقل للزوج أترك عملك!!...و لم أقل للزوجة أنتي مقصرة في حق أبنائك!!....بل قلت لهم أن يهتموا ببعضهم البعض....حدة رد الزوجان أكدت لي أنهم لا يروا حلاً لإرجاع الحب بينهم ...و أنهم لا يقوموا بشئ سوي السب و اللعن في الجواز و سنينة!! لكن يضعوا حلولاً لتصلح حياتهم...ممنوع! ممنع الأقتراب من هذة المنطقة...فهم متزوجين
و المتزوجين غير مزودين بخاصية هاتغير عشانة و هاتغير عشانها
الله يلعن أبو الجواز و سنينة
إستوقفتني هذة الجملة...لأنها بداخلنا جميعاً...و لكن هناك من لدية الجرأة ليقولها....و هناك من يخفيها بداخلة
حتي الآن لم أجد إجابة لسؤالي...لماذا نحن المتزوجون هكذا!!؟
لماذا فقدنا الحب!؟؟
لماذا أصبحت هذة صورة المتزوجين!؟؟
لماذا حين نري شاب و صديقتة (مكشرين) نقول لهم (مالكوا عاملين زي المتجوزيين كدا لية)؟؟
لماذا أصبحت كلمة (المتجوزين) كناية عن النكد و قلبة الوش؟؟؟
لماذا فقد الأزواج رغبتهم في بعضهم البعض؟؟
لماذا أصبحت الزوجة تولي النوم الأهمية... علماً بأنها أيام قبل الجواز كانت بتسهر بالساعااااات عشان تتكلم معا نفس الشخص في التيليفون!!؟؟؟
لماذا أصبح الزوج يفضل القهوة و البلاي ستاشين و الچيم....علماً بأنة قبل الجواز كان منفض للقهوة و صحابة عشان يقعد مع نفس الشخصية!!!!؟؟
لماذا أصبحت حين تقول له (بحبك) يرد قائلاً (خير عايزة إية)؟؟ او (ريحي نفسك معاييش فلوس)...لية بجد!؟؟
لماذا أصبح حين يقول لها (بحبِك).....تتوجس خيفةً من أن يكون خانها فتسرح بخيالها في التفكير بمن تكون حبيبتة الجديدة...و تنسي أن تجيب علية...حتي قلبها!! ما عاد يُقبَض تلك القبضة القديمة التي كانت تشعر بها حين كان يقول لها بحبك
محزن أن قلبها لم يذكِرُها بأن تجيب علية بإبتسامة أو حتي بحُمرة وجة
أشعر و كأن هناك تار بين كل من يحمل لقب زوج و زوجة
معرفش لية والله كدا؟؟
يمكن إحساس الزوج و الزوجة إنهم خلاص كدة لازم يفضلوا مع بعض طول العمر و وشهم هيفضل في وش بعض هو السبب في حالة الزواج الموقوف
طيب بجد والله فيها إية لو عقد الجواز كان بيتجدد
زي إشتراك الچيم كدا
بس نخلية بعد مدة سنتين
كل سنتين يُخيَر المتجوزين بين أنهم يجددوا العقد أو أن يروح كل واحد فيهم لحالة
و ساعتها لو البنت حابة تروح لحالها مش هتخاف من حاجة... لأن إسمها مش هيبقي مُطلقة
هيبقي
عقدها خلص
طب والله فكرة حلوة
جداً بقي كمان
و ساعتها الراجل و الست لو كملوا و جددوا العقد هيبقوا جددوه عن إقتناع و عن حب
لأن الحياة الزوجية ساعتها هتفقد صفتها الجبرية فالزوج و الزوجة هيتعاملوا مع بعض من منطلق إنها مختارين بعض للمرة التانية و التالتة و السادسة فأكيد الحياة ساعتها هتبقي أنضف بكتير أوي
أنا شايفة أن إلزام المجتمع المرأة بتحمل كل مساوئ شريكها و إرهابها من لفظ مُطلقة هو سبب ضياع الحب بعد الزواج
و سأوضح لكم ما أقصد
البنت وقت الخطوبة بتبقي (الحنينة الرهييفة) و دة بسبب إنها حاسة إنها لو فسخت الخطوبة عادي....أصل المجتمع بيقبل (الفاسخة) عادي....فإحساسها إنها مش مجبرة علي إستكمال حياتها مع هذا الشخص بعث فيها الأمان...إحساسها بأنها ممكن تسيبة في أي وقت هي عايزاة هو اللي مخليها تفضل تحبة
حرية الإختيار هي السبب في إستمرار الحب
لحاد ما يقوم المأذون بدورة الجليل
و يقوم المجتمع بدورة الجميل بإصدارة لفرمان
الطلاق مرفوض
البنت بعد الزواج بتحس بأن وجودها في البيت مع جوزها هو إقامة جبرية أو فترة حبس...الأفراج فيها بشهادة وفاه
إحساسها بأنها مش هتعرف تخلص من الجواز كرهها في الجواز و في جوزها من قبل أصلاً ما تشوف حاجة وحشة منه
صفة الإجبار التي أكتسبها الزواج هي سبب تحول الفتاة من حبها لزوجها إلي رفضه ثم إلي كرهه
مجتمعنا المظلم أضاف لافتة (ممنوع الخروج) علي باب المتزوجين
فتحول بيت أحلامهم إلي سجن....زنزانة بها كل متاع الحياة
و لكنها تظل زنزانة
أبيحوا حلال الله
و أخبروا بناتكم أن الإقامة في بيت زوجها ليست إقامة جبرية و أنها تستطيع الطلاق وقتما تشاء
فمتي تبعثوا الأمان في نفوس بناتكم...سيصبحوا زوجات صالحات
زوجات صالحات في بيت أزواجهن بإختيارهم....لا تحت الأقامة الجبرية
يلا تصبحوا علي ألف خير
و ولااا كأنكوا سمعتوا حاجة.....أيها الزوجات خلونا علي خطتتنا في النكد لحاد ما تتحقق مطالبنا في كارنية إشتراك في خاصية الزواج يُجدد أو يُلغي كل عامان.....و يلا قومي أنكشي شعرك أكتر ماهو منكوووش و نكدي عالراجل.....و إنت أوعي تغلط و تفرد وشك أنا عايزاك تمد بوزك علي قد ما تقدر دي ولية نكدية و متستهلش غير قلبة الوش
الخميس، 6 مارس 2014
نوستالجيا ومبي
هتش النوستالجيا
إنتشرت مؤخراً في المجتمع المصري الفيسبوكاوي... حمي النوستالجيا
فهذا شاب يرتدي تيشيرت سوداء عليها علامة (لاكوست)...راشق عالفيسبوك ليل و نهار في سايبر (ميدو نت) ...يحتسي كانزاية من الماونتن ديو....و هوب يقوم عامل شير لأغنية لفيروز و يكتب فوقيها (نوستالجيا) و يرزع كام علامة تعجب ورا هذة الكلمة...هذا الشاب يرفع دائماً شعار أنا نوستالجياوي و أفتخر
ببقي عايزة أرزعه علي قفاة و أقولة (نوستالجيا) دية تبقي خالتك! يا حيليتهااا
المصطلح النوستالجياوي أصبح يسبق أي كلمة مثلاً: نوستالجيا منير!...نوستالجيا الرحباني!....نوستالجيا ومبي!!...نوستالجيا المسطرة اللي فيها مية و مشرشرة من تحت!!...نوستالجيا الكومبوزر اللي كان علي نوكيا 3310!!....نوستالجيا سندوتش الجبنة البيضا بالخيار!! و هكذااا
بعيداً عن هذا الشاب اللاكوست... أنا ضد حوار النوستالجيا و النوستالجيين دة تماماً
و هقولكوا لية
لأن الأيام اللي فاتت اللي إحنا قاعدين منوستالجيين نفسنا عليها مكنتش وقتها عاجبانا أصلاً....و كنا بنأوف منها....و كنا بنقول إمتي نخلص بقي من المدرسة! و إمتي نتخرج من الجامعة!!؟ و إمتي نتجوز و إمتي نخلف و إمتي و إمتي و إمتي!!؟
و لما خلصنا مدرسة و إتخرجنا من الجامعة و إتجوزنا و خلفنا....برضو بنأووووف و ن هووووف من هذة الفترة (حاضرنا) و نفضل نتذكر في أيام لمجرد إنها أصبحت (منتهية الصلاحية).....و نبتدي الوصلة (فييين أيام ما كنا لوحدنا و بحريتنا!؟؟ فين أيام الصياعة اللي كانت في الجامعة!؟؟ فين أيام ما كنا نرجع نلاقي مامتنا محضرلنا الغدا!!؟؟ فين أيام ما كانت كل شغلتنا في الحياة هي الأكل و النوم و الخروج!!) و بنكمل الوصلة بمقطوعة فنية من (أووووف من العيااال و زنهم!! إمتي نخلص بقي من الوش دة!!) ....ولا يوم من أيام زمان
أنا بس عايزة أوضحلكوا إن إحنا بنحب أيام زمان لأنها خلصت و مبقتش معانا...ببساطة لأنها فاتت.....فبنقوم بقي طالعين بالمصطلح النوستالجياوي المتين و نعد نحسس نفسنا إننا كنا وقتها مبسوطين جداً...مع العلم إننا كنا رافضين هذا الماضي المحبوب حينما كان يحمل لقب الحاضر
المهم إن بعد ما الفترة بتاعت الجواز و الخلفة و الشغل تعدي....و أولادنا يكبروا و يتجوزوا....بيستمر معانا برضو مسلسل الأوف و الهوف....و النوستالجيا تاكلنا و نفضل نقول (ياااه فين أيام ما كانت العيال صغيرة و معانا و حوالينا..أهو دلوقتي الولاد إتجوزوا و بقينا لوحدنا).......نحن دائماً نبحث عن المفقود....نبحث عن الماضي لأننا لم نعد نملكة
أنا لا أري أن (النوستالجيا) مرتبطة فقط بالحنين إلي عصر أو زمن مضي بأحداثة و شخصياتة...فهناك نوستالجيا مستوطنة بداخلنا جميعاً....(النوستالجيا الصيني)....بمعني...أن النوستالجيا الصيني المصري أصبحت للحبيب الأولاني...نوستالجيا الرجل لشكل مراتة قبل ما تحمل و تخلف و تبقي شبة الكورة...نوستالجيا لشريط حماقي القديم....نوستالجيا لسندوتش إتشال من منيو كنتاكي مثلاً
هكذا نحن المصريين لما نحط بصمتنا في حاجة...قلبنا تعريف النوستالجيا لفود كورت
و هناك خبر إن النوستالجيا بعد ما شافت تعريفها عند المصريين و البوستات اللي مكتوب فيها نوستالجيا علي صور المساطر و الزمزميات...أصيبت النوستالجيا بنوستالجيا لتعريفها القديم
أيها النوستالجيين
نحن دائماً نضطهد حاضرنا و نهملة حتي يشيب و يصبح ماضي....و حينها نعشقة و نتمني عودتة لنا
نحن نقتل حاضرنا بنوستالجيتنا لماضيٍ قتلناة حين كان حاضراً
و حين يأتي مستقبلنا يجدنا مشغولون بإختيار إلي أين نتجة بنوستالجيتنا إلي الماضي القريب أم إلي الماضي البعيد
فنهمله هو الآخر
و تصبح نوستالجيتنا لا للماضي فقط
ولكن للحاضر و المستقبل أيضاً
نحن جميعنا...لا نحب الشئ ألا حين ينتقل من خانة (الآن) إلي خانة (كان)....من خانة (الحاضر) إلي خانة (الماضي)...من خانة (الموجود) إلي خانة (الغائب)....هي ليست نوستالجيا إنما هي حبٌ للمفقود
فهكذا نحن جميعنا
لا نرضي بما نملك...ولا نحب إلا ما نفقِد
أصبحنا جميعاً مسجونين في زنزانة الماضي...و مقيدين بقيود المفقود
أصبحنا جميعاً مصابين بمرض النوستالجيا....نوستالجيا المفقود
الاشتراك في:
الرسائل (Atom)