ها يا حبيبتي هانفرح بيكي إمتي؟
يلا بقي شدي حيلك يا قمر؟
آااه يا ما نفسنا نشوفك و إنتي في الكوشة
ها يا حبيبتي مش حاطة عينك علي حد؟؟
مفيش حد من زمايلك في الكلية ينفع؟؟ ولا معيدين حتي؟؟
طب أخبار الشغل إية مفيهوش حد مناسب؟؟
طب مالو حسام؟؟
طب و ثامح إبن خالتك مالو دا كمان!؟؟؟ دا شغال في الكويت و مفيش حاجة تعيبة... بس إنتي أصلك بت فقرية
يا حبيبة ماما أنا نفسي أطمن عليكي و أفرح بيكي كدة وإنتي عروسة
ها يا أبو البنات مفيش حد من صحابك عندة إبن ينفع لبنتك؟؟
كل هذة الأسئلة تُطرح داخل كل البيوت المصرية
يختلف المتحدث و لكن المضمون واحد
جواز البنت
للأسف الشديد معظم الأهالي زرعوا داخل بناتهم مبدأين
الأول: هو أن كل مهام البنت في الحياه تكمُن في البحث عن عريس لُقطة ثم الإيقاع بة
الثاني: هو إنها إذا حصلت علي أعظم شهادة في الدنيا و بقت وزيرة بس آنسة فتبقي فاشلة و معيوبة و ضيعت حياتها في الشغل
هذا بالإضافة إلي ظهور موهبة التأليف لدي جميع الناس المحيطين بهذة الآنسة ذات ال ٣٦ سنة...بيقوموا بتأليف ميت ألف قصة عليها مثلاً: إنها بتحب واحد و معرفتش تتجوزة فرفضة الجواز من بعدة ....أو...ما هي اصلها حاطة مناخيرها في السما و مش عاجبها حد (و حد دة غالباً ما بيكون عبدالفتاح القصري 2 )....أو...إنها شخصية زبالة و متتعاشرش فالعرسان بيطفشوا منها....أو...أنها مستنية تتجوز عن حب فخليها بقي بايرة زي ما هيه و خلي المسلسلات التركي تنفعها...أو...إنها و إنها و إنهاااا و إنها
لكن نسمع قصة واحدة عن شبيهي الرجال المتنكرين في زي العرسان..لأ مفيش
طب حتي نقول نصيبها لسة مجاش...لأ منقولش
كان ممكن برضو نقول إن العرسان اللي إتقدمولها مش كويسين....لأ مستحيل مش كويسين إزاي! دول بيقبضوا مبلغ محترم و بعدين الراجل ميعيبوش غير جيبة
حين يذك أسم مُذكر فبتتوقف أتوماتيكياً موهبة التأليف عند الشعب المصري....هذا الشعب الطفولي الذي إعتاد فية الذكور الصبية علي التهرب من المسؤولية و إلقاء كل الأخطاء علي كاهل الأم
الأم أو الإبنة أو الأخت أو الزوجة
المهم أن هذا المجتمع يحب أن يري أن المخطأ دائماً أنثي
شئ محزن إن معظم أهالي الآنسات حولوا بناتهم من آنسة إلي منخل....ينخل و يصفي كل الشباب اللي بتتعامل معاهم لكي تقع بإبن الحلال وبالنسبة ل ولاد الحرام (اللي مش جاهزين مادياً للجواز) فهم مبينزلوش من منخل الآنسة و بيترموا في الزبالة
و هذا خطأ ثاني..ثاني إية!! أقصد ثاني بعد المليون يقع فية مجتمعنا...أن تعريف (زوج إبن حلال) أصبح مُقترن بمحفظتة و حسابة البنكي...فقط لا غير
و عرفاناً بالجميل فنحن لا نستطيع إغفال دور الأم المصرية إشتراكاً مع كومبارس الأب المصري في تعقيد بنتهم الآنسة....و دفعها إلي أن تصبح زوجة سريعاً لإرضاء أهلها...و شهرين تلاتة و ترجع لهم سريعاً برضوا...و لكن مُطلقة
مين حدد معايير الفرحة بالنسبة للأم المصرية؟؟ لا بجد حمار مين اللي حدد إن الشئ اللي يسعد الأم المصرية هو رؤية بنتها بالفستان الأبيض!؟؟
مع إن رؤية بنتها بالبالطو الأبيض أبرك بكتييييييير أوي من الفستان الأبيض...علي الأقل البالطو الأبيض مستقبل و فلوس
أما بقي الفستان الأبيض فضياع مستقبل و شحاتة فلوس
ها بقي يا حاجة غيرتي رأيك في حوار الفستان الأبيض؟؟
طبعاً الحاجة مستحيل إنها تغير رأيها
فعقيدة البحث عن عريس أصبحت مستوطنة بداخل الأم و الخالات و الجيران و قرايب الجيران و صحاب قرايب الجيران من الآخر مستحيل مستحيل إن يقبل إختيار البنت للقب آنسة
طيب سؤال بس....هو أنتوا بتقولوا علي الشاب اللي إتأخر في الجواز إية؟؟
عازب...أو...أعزب....صح؟؟
طب و في المقابل بتقولوا علي البنت اللي إتأخرت في الجواز إية؟؟
العقل بيقول إننا نقوم بتأنيث كلمة عازب فتُصبح عازبة أو عزباء
صح؟؟
صح طبعاً
بس بما إن إحنا في مجتمع بيعمل الصح للذكر فقط...أما الصح للمؤنث فبيوأد
فبنقول علي البنت اللي إتأخرت في الجواز
عانـس...أو...معـنسة
و فية لقب تاني نسيت أذكرة
بايــــرة
و قمة التناقض لما تلاقي الناس بتطالب بعدالة إجتماعية
عدالة إجتماعية إية اللي بتطالب بيها يا إبن المفكوكة إنت
و إنت أصلاً في بيتك ديكتاتور و بتعاير بنتك إنها متجوزتش و بتقولة يلا يا بايرة...عدالة إجتماعية اية يا حاجة و إنتي بتفرقي بين ولادك علي حسب جنسهم
عدالة إجتماعية اية اللي بتطالبوا بيها و إحنا بنوافق أن فلوس كتير أوي تتدفع في مدرسة إنترناشيونال لمجرد إنة ولد
إنما لما بتبقي بنت فبنسمع من اللي حوالينا ميت ألف كلمة حرام و خسارة و لية و مالها المدارس اللغات
عدالة إجتماعية إية يا مجتمع مضلم بيفرح بشهادة تجارة عربي بياخدها الولد
و مبيفرحش بشهادة طب تاخدها البنت لمجرد إنها لسة آنسة و موقعيتش إبن الحلال
قالك عدالة إجتماعية!!! قبل ما تهتفوا مطالبين بيها...ياريت تحققوها في بيتكوا الأول
إن إنتقال معيار التقدير و التفوق من نجاح البنت في حياتها العلمية و العملية إلي نجاحها في مهمة إصطياد العريس هو أحد أسباب المجتمع الهش الذي نعيش به
يا حاج...يا حاجة
الفرحة ببنتكوا مش فستان أبيض و عريس
الفرحة ليها معاني تانية كتير غير الكوشة.....الفرحة بيها إنها إتخرجت من جامعتها بتقدير كويس....إنها ناجحة في شغلها...إنها شخصية محبوبة
يا حاج...يا حاجة
ملكوش دعوة ببنت الحاجة فهيمة جارتكوا اللي إتخطبت و هي في أولي جامعة
ملكوش دعوة بقرايبكوا اللي بيقولوكوا خلوها تشد حيلها
ياريت متكلموش بنتكوا في موضوع (شد الحيل) و (الجدعنة) دة لأنة موضوع رخيص و ممل
أخيراً أحب أقول لكل مرددي جملة (إحنا عايزينك تتجوزي عشان الجواز دة أمان و عيلة و دفأ)...
إتخرسوا شوية و سيبوا الناجون من التهلكة ينعموا بحياتهم و بلاش أنانية يا أخوانا!! ما هو مش معني إنك غرقت فا تشد الناس اللي حواليك كلهم و تغرقهم عشان تلاقي حد يبلبط معاك و يسليك
و رسالتي إلي الآنسات
لما حد يقولك إن الجواز أمان و عيلة و دفأ
قوليلة إتكتم و بطل كدب و بلبط لوحدك يا برنس
و أنا هثبتلك مدي كذب اللي بيقول إن الجواز أمان و عيلة و دفأ
أولاً
الأمان: الأمان لا يأتي إلا ب كالون ٦ تكات و تقدري تشترية بمبلغ ٢٠ جنية من أي موان و ممكن تلاقوة في كارفور علي فكرة
ثانياً
العيلة: هاهاهاهاااااا عيلة آه!! سأحدثك قليلاً عن العيلة...بصي يا ست الكل أولاً الزوج مكانة بعد الجواز في الشغل و بعد الشغل في القهوة و بعد القهوة ننا هوووووو
إنتي مكانك مع ولادك الزنانييين و لوحدك... و عايز آكل يا مامي ...عايز اعمل بيبي ....عايز أتنيل...عايز أقرفك...عايز أطلع عينك يا مامي
و إذا حدث غلطة و تواجد الزوج في البيت فإسألي أي واحدة من صحباتك المتجوزين بس تكون بنت أمينة و صريحة...عن هذا اليوم بيبقي عامل إزاي!؟؟
دا بالإضافة إن جو العيلة انتي مجرباة في العيشة مع أبوكي و أمك و أكيد وش و صداع و ززززززن
ثالثاً
الدفأ: هذا هو الشئ الوحيد الذي لا يعوض غيابة......سوي دفاية إتنين شعلة و هتلاقوها في كارفور فقط ب ٩٠ جنية
يعني حل مشكلة عدم الجواز بيتمثل في: ٢٠ جنية (كالون ٦ تكات) + ٩٠ جنية (دفاية إتنين شعلة)= ١١٠ جنية
إغتنموا هذا العرض...عرض بديل العريس قبل نفاذ الكمية
و في نهاية كلامي
أيها الآنسات تذكروا دائماً أن الدفأ و الأمان بيد كارفور لا الزوج
