طويل العمر يطول عمرة و يزهزه عصرة

وزير الداخلية لسة وزير الداخلية

أمانة في رقبتك أن ترسلها إلي عشرة غيرك و إلا هتموت مشلول من هذا الخبر

ولا تخرج قبل أن تقول سبحان الله

و بمناسبة هذا الخبر اللذيذ قررت أكتب شعر لأهني به وزيرنا

في عهدك يا بيه

التفجيرات بقت بجنيه

و سعادتك منور في منصبك و عامل للأرهابيين أبونيه

بس الحق لله القنابل في عهدك بقت سينييه

فجروا مدارس و مديرية أمن و أتوبيسات 

و حضرتك بتعرف الأخبار من النايل سات

بس الحق لله يا سيات اللوا الأمن بقي في كل مكان

كل الطرق مليانة كماين و لجان

و الظباط بيعاملونا بكل حنان

خليك معانا و أمِننا كمان و كمان

و سلام بقا لحسن أروح اللومان

تحيا جمهورية مصر العربية

إيمان

تحدثت معكم عن والدي و والدتي

و عن إبنتي

و اليوم سأحدثكم عني

عني هي

أنا أعلم أن جملة (عني هي) تمثل خطأً لغوياً و لكن ماذا أفعل إذا كنت سأحدثكم عني.....و عني تكون هي

هي 

لا أعلم كيف أقصيها و أقول هي

و هي تعني لي نفسي

فدمجت الكلمتين و أصبحت 

عني هي

هي صديقة عمري

هي عالمي الخاص

هي قوتي

هي ضحكة قلبي الصادقة

هي أنا

أنتي أختي التي لم تلدها أمي

ذاكرنا سوياً

رسمنا سوياً و علي (اللايت تيبل) شففنا سوياً

و لأني عاهدت نفسي أن أكون صريحة معكم 

فاليوم سأعترف لكم... بأننا برشيمنا سوياً

 

و أرتدينا الچاكيت (المزود بجيب داخلي لنخبأ به البراشيم) في عز فصل الصيف في اللجنة سوياً

تصببنا عرقاً من هذا الچاكيت اللعين سوياً

أتذكرين هذا الچاكيت يا حبي؟؟

و لأنها كانت معي فتحول كابوس زحام كوبري أكتوبر اليومي إلي ضحك لا ينتهي

مرت الخمس سنوات 

و تخرجنا

و إفترقنا

عام بدونها

مر علي و كأنة مائة عام

أقسم بالله العظيم فقدت نفسي بفقدانها

أقسم بالله العظيم أنا لا أكذب

أنا حقاً كنت في قمة الحزن بدونها

فتذكرت حديثي مع (شخص لم تعد صديقتة ) عنها

هذا الشخص قال لي بالحرف :أن الدنيا وحشة  و زبالة أوي من غيرها

كنت أعتقد أنة كاذب فكيف تكون الدنيا سيئة بدون شخص

و لم أدرك صدق كلامة إلا عندما فارقتها لمدة عام

فأقسم بالله العظيم آمنت بكلام هذا الشخص

فالدنيا سوداء معتمة كئيبة بدونها

و بعد عام

عادت لي نفسي

فجمعنا القدر مرة أخري

ولكن

حين ألتقينا بعد فراق عام

هي

كانت كما كانت....رائعة...جميلة...مرحة...قوية

وأنا كنت كسيدة في السبعين من عمرها

كنت لا أضحك

كنت أسيرة لهموم الحياة

ولكنها حررتني

ظلت بجواري و أعادت لي نفسي

هي من جعلتني أجد نفسي التي فقدتها 

وجودك معي هو سر وجودي

شكراً أختي 

أعرفكم بنفسي التي هي

إيمان عساف

فأنا هي 

المرفوض مفقود

أرض سوداء مهشمة الملامح

مكان لم أره من قبل

شمس ساطعة أشعتها تخترق السُحُب

حرٌ شديد

صمتٌ قاتل 

لا أسمع شئ سوي صوت رمال تطاير

الخوف يقتلني و التعب فرض قوتة علي نفسي

حاولت البحث عن أحد لأتحدث معة لكني لم أجد سوي

خيال ظلي

فقط أنا و خيال ظلي

وماذا أفعل به! فهو مجرد خيال لن يفيدني بشئ...خيال ظل!! أنا أبحث عن من يخرجني من هذا المجهول...و أنت لا تعنيني بشئ

لكني لم أفقد الأمل

ظللت أبحث عن ملامح للطريق

ظللت أبحث عن أي علامة لتخرجني من هذا المكان المخيف

كنت أركض

خيال ظلي كان يلحق بي أينما ذهبت

نظرت له و حدثتة بلهجةٍ حاده: ماذا بك! كف عن ملاحقتي! فإن كنت تبحث عن مخرج من هذا المكان فلا تتبعني...فأنا مفقودة هنا...مفقودة

فبدأ خيال ظلي يذوب...و يذوب

إلا أن إختفي تماماً

إختفي 

شعرت بالندم...لإني فقدت من كان معي في هذا المجهول

فقدتة و صرت وحدي تماماً

 

ذهبت الشمس إلي مخبأها

و ظللت أنا و خوفي ننصت إلي صوت الرمال المتطايرة 

جلست 

فكرت في أن أستعيد من فقدت

فأشعلت ناراً أمامي

 

كنت لا أبحث عن الدفأ

و لكني كنت أبحث عنة

عنة هو

خيال ظلي

الذي كان يلاحقني أينما ذهبت

الذي كان بجواري دائماً

إفتقدت وجودة 

افتقدة

حين تركني...شعرت بالمعني الحقيقي لكلمة مفقودة

كم أنا غبية! ألقيت بالشئ الوحيد الذي كان لا يؤذيني.....لا يؤلمني...لا ينافقني...لا يخونني

ألقيت به من نافذة حياتي لأني كنت علي يقين أنة ليس له سواي و أنه حتماً سيعود 

حتماً سيعود فهو خيال ظلي...خيال ظلي أنا..فكيف له ألا يعود!!؟

و كم من أشخاص ألقيانهم و كنا ننتظر عودتهم....ففقدناهم...ولم  يظل معنا أحد سوي غرورٌ أبله يأخذ بأزرنا و يقول لنا أنه (سيعود)....سيعود!!؟

ألقيت به بعيداً لأني كنت منشغلة بالبحث عن مخرج من المجهول...فألقيت بالدليل

وكم من مشاغل أنستنا من كنا نعني لهم الدنيا

ألقيت به لأني ظننت أنه يلاحقني...ظننت أنه يتبعني

و كم منا رأي بغرورة أنه هو الدليل...فألقي بمنقذة...ف ضَل

و بعد أن تركني  

أدركت

أدركت أني أنا من كنت ألاحقة

أدركت أني أنا من كنت أتبعة

فأفيقوا الآن...قبل أن تفقدوا دليلكم

أفيقوا الآن..قبل أن تفقدوا شخصً كان كخيال ظلكم الوفي

أفيقوا و إمسحوا غبار الغرور من علي أعينكم 

كان دوماً يقول لي

إنه معي ليحررني من مجهول نفسي

إنه معي ليرشدني إلي كيف أكون أنا

و أنا عاندت

إستكبرت و سخرت منه

و طلبت منة الرحيل لأنني كنت موقنة أنه ليس لدية القرار...و أنه حتماً سيعود...و أنة واقع مُسلم به

فرحل

إتخذ قراري...لا قرارة...و رحل

و ها أنا

سجينة حتي هذة اللحظة بداخل مجهول نفسي

و أمامي نار موقدة من ذكريات لتساعدني أن أجده 

و أعود معه إلي نفسي

سأبحث عنك

عنك يا خيال ظلي

فأنا أفتقدك  

٧ سطور---- الموجات الشخلولية المُتدلدلة

٧ سطور

أنا هتكلم معاكو أنهاردة في موضوع يؤرقني!! يؤرقني؟؟!!! إية يؤرقني ديه!!؟

موضوع يزعجني

آه يزعجني ماشي

موضوع ضوضاء الإكسسوارات

أنا يا إخواني قررت أطلق علي المدونة حملة (لا للشخاليل و لا للدلاديل)...ها مين معايا؟؟

بجد مستحيل اللي اخترع نوعية الإكسسوارات دية

لا والله شئ صعب

دا عيل كافر ابن لذينا

البنت تبقي لابسة ميت سلسلة فيها ميت ألف دلاية ..فراشة تلاقي...قلب موجود..نجمة متوافر...نحلة..نملة...وردة..كلبة..وزة..بطة..فهذة الضجة  بتخلي المحيطين بهذة المزعجة يقولوا: واك واك وااااك واااك

المصيبة مش في السلاسل لأن السلاسل تلوث بصري و أهو قشطة  الحمدلله النور بيقطع كتير فا ربنا بينجينا من تلوث البصر...الله يِعمر بيت اللي بيقطع النوووور...آمييييين....المهم السلاسل دية مبتعملش دوشة غير و البنت ماشية..فالإزعاج بيبقي محتمل

إنما بقي نيجي للمصيبة الكبري....التلوث السمعي...ضوضاء الشخاليل.... المتمثلة في المليون ألف غويشة...اللي مليانين شخاليل و دلاديل!! اللي ملتفين حوالين إيدين الكتكوتة!!! الله يخرب بيتك يا بعيدة

صدعتيني يا مزعجة

من الناحية العلمية شعب مصر كلوووووووو بيشوح و هو بيتكلم..صح؟؟

فتخيل كدا بقي الموجات الشخلولية المُتدلدلة الهايلة اللي بتحدث نتيجة إندماج بين التشويح و الشخاليل اللي في الغوايش

أقسم بالله الموضوع دة مزعج جداً جداً

و أتمني من الله عز وجل إن كل الإكسسوارات المزعجة بشخاليلها بدلاديلها يولعوا بجاز

معاً لنقضي علي ضوضاء الإكسسوارات

معاً لنعيش في مجتمع هادئ

معاً لحياة أفضل

صباحكوا منجا و خالي من الشخاليل

يوميات عزرائيل----روح فرح-١

في يوم الثلاثاء الموافق ٢٠١٢/٩/٨ كُلف عزرائيل بقبض روح (فرح)....فرح الطفلة ذات السبع سنوات

و حُدد له الميعاد

عندما سمع عزرائيل أن صاحبة الروح التي سيقبضها طفلة عمرها سبع سنوات تألم...و لكنه أسرها في نفسة

و صمت

دمعت عيناة...و لكنة أخفي دموعة و إستجمع قواة ليكمل باقي الموضوع

طلب عزرائيل من الملك المختص عنوان بيت (فرح) و تفاصيل عن حياتها لكي يجد طريقة مناسبة لقبض روحها

فأعطاة الملك ورقة بها كل تفاصيل حيات فرح

الورقة بها

 فرح محمد طارق العشري

عمرها ٧ سنوات

وحيدة أبيها و أمها

جائت (فرح) إلي الدنيا بعد أكثر من ١٤ سنة إنتظار من أبويها

تتمتع بصحة جيدة 

إنتهت من الصف الثاني الإبتدائي

العنوان: ٣٠ شارع مختار سعيد متفرع من نبيل الوقاد- أرض الجولف- الدور السادس- شقة ٣٥٤

ميعاد قبض الروح: يوم ٢٠١٢/٩/٩ الساعة ١١:٥٥ أي قبل منتصف الليل بخمس دقائق

حينما إنتهي عزرائيل من قرائة الورقة إنهمرت دموعة علي خدية

ظل يبكي و يبكي

 

فمر بجانبة ملَك و قال لة: عزرائيل!! يبكي!! ماذا بك يا عزرائيل؟؟ أحقاً أنت تبكي؟؟

و ظل يقول له: أعزرائييييل يبكي!! أعزرائيل عيونة بها دموع!! أعزرائيل الذي أبكي خلق الله جميعاً يبكي!! هذا شئ عجيب!! أنت تبكي؟؟؟

عزرائيل مستمر في النحيب كطفل فقد أُمِه

و لم يجب علية

فكرر الملَك سؤالة مرة أخري و قال لة: يا عزرائيل قل لي ماذا بك؟؟ لماذا كل هذا البكاء؟؟

فأجابها عزرائيل و قال لها: كلفني الله بشئ و أنا أخشي أن أعصاة

فأندهش الملك و قال له: تعصي الله!! أجُنِنت يا عزرائيل؟؟ 

فقال لها: لا لن أعصاة...و لكني...لكني لا أستطيع

فسألتة الملك: ماذا بك يا عزرائيل!! بماذا كلفك الله هذة المرة؟؟ أقصد لمن الروح التي لا تقوي علي قبضها هذة المرة؟؟

فأجابها قائلاً: فرح...طفلة بريئة عمرها  ٧ سنوات...وحيدة أبويها

فقالت له الملَك: لابد أن لله حكمة ما...فلتنفذ ما أمرك الله به

فإزداد بكاه

و ظل يبكي و أجهش بالبكاء بحرقة أبكت الملَك

ظل يصرخ و يقول للملَك: ماذا أقول لأبويها؟؟ ها؟؟ أجيبيني؟؟ لماذا فرح؟؟ فالعجائز يملئون الأرض...لماذا (فرح)!! لماذا الطفلة الصغيرة!! لماذا؟؟؟!

لا،،،،لا...أنا لا أستطيع

حاول الملك تهدئة عزرائيل...ولكن عزرائيل كان مستمر في البكاء

ولم تتوقف دموع عزرائيل إلا عندما 

إتخذ قرارة بأنة سوف يقدم إستقالتة

نعم سوف يقدم إستقالتة للرب

و أمر صديقة الملك بجلب له ورقة لكي يكتب بها خطاب إستقالتة

إبتدي خطاب إستقالتة ب

يتبع

طلب مستعجل يا سيدي الإله

أنا أشفق علي نفسي

فأنا أصبحت شخص كل ما يربطني بالحياة هو فنجان قهوة

 لم تعد تُعنيني تلك المشاعر 

ولا

الأصدقاء

ولا 

العائلة

لا شئ سوي فنجان قهوة و نظرة إلي وجة إبنتي

أخطأ من ظل يلقبني بكائن حي

فأنا صورة...صورة لكائن حي

ماتت أنا من داخلي

و هذا الموت منحني شهادة وفاة مؤقتة

لكني في إنتظار سيدي الإله

ليرسل لي شهادة وفاة موثقة و مختومة بالختم الإلهي

سيدي الإله أرجوا من سيادتك السرعة فأنا لا أستطيع العيش بهذة الشهادة المؤقتة طويلاً

لأن حولي أهل و أصدقاء يتعاملون معي و كأني حية

يطلبون مني أن أفتقدهم و أن أحبهم و أنا لم أعد أمتلك تلك الخصائص الإنسانية يا سيدي

فأرجوك يا إلهي أن تسرع في إرسال شهادة وفاتي فنحن في مجتمع يحب التعامل الرسمي الموثق بالأوراق

و طلب أخير يا إلهي

فلتكتب في شهادة وفاتي أني متوفاة من خمس سنوات

لأني في هذة الخمس سنوات جرحت الكثير...أهنت الكثير....ألمت الكثير...ولم أكن أقصد

 أعتذرت كثيراً...و حاولت أن أوضح لهم إني لم أعد إنسانة مثلهم...لكنهم لا يعذرون....فقررت أن أريهم شهادة وفاتي المؤقتة....ولكنها لم تقنعهم

فأرجوك يا إلهي أن ترسل لي شهادة وفاتي و تكون موثقة و رجاءً يا سيدي أن تكون مختومة بالختم الإلهي و مكتوبة بتاريخ وفاتي الفعلي

و أرجوا السرعة في إرسالها يا سيدي

فقد كثر اللوم و العتاب علي

وأنا لم أعد أتحمل أحد

فأنا يا سيدي لا أنتمي لهذا المكان

ولا أتحلي بمشاعر الإنسان الحي

فمكاني معك....بجوارك

 شكراً يا سيدي الإله

اللهم أقبل دعوة منة فضالي!!

الرفيقة المجاهدة منة فضالي قالت: حسبي الله و نعم الوكيل في كل شخص ظلم عز

لا تعليق يا أخت منة

بس هو فية بس حاجة مستفذاني بالنسبة للأيد اليمين اللي إنتي ماسكة فيها بارفان

Burberry

مش عيب الإيد الشمال تشيل ليب جلوس

آخر العنقود أبو ٢,٥

والله عيب

روحي يا شيخة ربنا يكرمك بروچ ماركة محترمة

 وربنا يرجعلك عز بالسلامة

قالك حسبي الله و نعم الوكيل في كل من ظلم عز!! حسبي الله ونعم الوكيل فيكي يا بعيدة

خلق عكرة

و آدي صورتها أهي و هي ماسكة الليب جلوس المضروب و بتحسبن 

مطلوب تدخُل الجيش فوراً

الحمدلله الواتس آب إشتغل!! كدة الواحد يقدر ينام و هو مرتاح...ماهو لو الواد مارك كان عامل حساب لقواتنا المسلحة مكنش قطع علينا الواتس آب أبداً!! و أنا من موقعي هذا أصرح بأن موقف القوات المسلحة ضعيف للغاية مع الواد مارك!!كان يجب إتخاذ إجراءات حاسمة ضدة لإن كلنا قفشنا موت إن الواتس آب قطع! عموماً يسقط يسقط حكم العثكر ولا للمصالحة مع الجيش قبل إعادة اللاست سين عالواتس آب

مين wonho chung؟؟

معلش بس هو مين 

Wonho Chung

اللي الناس كلهاااااا عمالة لايك للبيدچ بتاعتة عالفيسبوك؟؟

من هذا؟؟

مين وان هو شونج ؟؟

و ظهر إمتي؟؟ و إزاي معظم المصريين عارفينة بالرغم من إن احنا شعب مبيحبش يتفرج علي فيلم إنجليزي عشان بيكسل يقرا الترجمة....و الواد دة شكلة ياباني أو صيني فأكيد بيتكلم لغة محتاجة ترجمة...فا إزاااااي بقاااااا الناس عرفوة و لايكوة

أنا هاتجنن

لا والله بجد مين الراجل دة اللي الناس كلها عرفتة فجأة إنهاردة؟؟

و أدي صورتة أهي يا جماعة يمكن حد يعرف شكلة و يقولي مين هو

نقد لـبـسمة السبـاعـي

أصحابي و أهلي عمالين يسألوني و يقولولي مالك؟؟ مالك؟؟ مالك؟؟

زعلانة لية يا سوسن!! إية بس اللي مضايقك

و كل دة طبعاً بسبب الكآبة اللي بتهل عليهم بليل كل ما أببليش و يقروا اللي أنا كاتبة 

وبصراحة..حقهم 

أنا نَفسي دخلت إنهاردة قريت اللي أنا كتبتة اليومين اللي فاتوا..لاقيتة كئيب طحن 

لأ بجد حاجة تأرف..قال إية (أنا و أنا فقط)...قال يعني حواليا ناس كتير أوي و أنا إختارت أكون أنا و أنا فقط!! منا قاعدة أهو بهش الدبان!! و (بدون إسم) ياااي حقيقي إتاثرت أوي!! ولا (قابل للكسر) أوڤر جداً...لأ حقيقي كلام غامق أوي ولا القلقاس في سخافتة

و قال اية الوحدة حرية!! وحدت إية اللي الحرية!! الوحدة دية سببها تنفيض الناس ليا مش أكتر..الوحدة دية سببها تقل دمي علي فكرة

و تذكر الوحدة إجبار مش تناكة و إختيار

و قال اية أنا اللي إخترت الوحدة!! جاتني نيلة! هو أنا لاقية حد يعبرني ولا يقولي بخ حتي

ملحوظة: أنا بحب أوي أنقد نفسي بأستظراف...و نقدي دة غرضة الظُرف و اللطافة والله مش أكتر...لكن  والله العظيم والله العظيم ما كتبتة عن (الوحدة) هو ما أؤمن بة...هو أنا...فكلماتي في (أنا و أنا فقط) هي أكثر مقال قريب لقلبي....لأنة أنا

يا أصدقائي الأعزاء...يا أهلي الأحباء

أعتذر عن كآبة كلماتي و لكني

 قرفانة حبتين تلاتة أربعة ستة عشرين...ميت ألف مليون حبة

قرفانة لإني لحد اللحظة دية....لم أخطوا خطوة واحدة تجاه جمعية أطفال القمر

حاسة بضعف جوايا مكتفني

مش عارفة أعمل إية

حقيقي والله...وحيات بنتي...قرفانة جداً و مستحقرة نفسي جداً جداً

حاسة إني ندلة أوي

بس والله العظيم ما لاقية حل....أعمل اية؟؟

 

أنا و أنا فقط

أخطأ الذي ربط بين الوِحدة و الحزن

فهناك تلك الوِحدة التي تُخلصك من أشخاص وجودهم معك هو مصدر حزنك

يكفي أنك في وحدتك تستطيع إسترجاع كل الذكريات التي تجعل قلبك ينبض تلك النبضة التي تؤكد لك أنك مازلت حياً..نبضة تشعرك بحلاوة وحدتك

فكيف تقولون أن الِوحدة حزن؟؟

ففي الوِحدة سعادة لا يدركها إلا من لدية الشجاعة ليعترف بأنة حزين وسط الجميع

فلتجربوا الوِحدة

أنا أشفق علي هذا الشخص

 الذي يجد سعادته في أن يكون بينهم 

فهو لم يجرب الوِحدة

تلك السعادة التي لا تنتهي

 لم يجرب أن يضع رأسة بين يدية

أن يغلق عيناة

أن لا يسمع شئ سوي صوت  فيروز

فقط هو و صوت فيروز

و يقولون أن الوِحدة هي منفي الشخص الحزين

وهم منفيون جبرياً في عالم الأشخاص 

إفتخر بنفسك... فأنت لديك القوة التي أخترت بها وحدتك

إفتخر بنفسك....و أترك مسجوني (أنا حوليا كتير) يكملوا باقي العقوبة...و يسعدوا بمن هم مصدر حزنهم

إتركهم إلي أن يُخلي سبيلهم و ينعموا بحرية الوِحدة

بدون إسم

عندي خيال

خيال بإني أكون وسط ناس معرفهاش...ناس غير الناس اللي حواليا

خيال بإني أكون في مكان معرفوش ولا حتي عمري شوفته

خيال بإني أكون مش بإسمي ولا بشكلي ولا بإحساسي

خيال بإني ميكونش جوايا أي ذكري حلوة أو وحشة من أي حد

خيال بإني أنسي إسمي أنسي مين أنا....و أنساكوا كلكوا

خيال إني أتوه....نفسي أتوه...بعيد أوي....مش بس أتوه من المكان...لأ أتوه من نفسي كمان

نفسي أتوه من نفسي أوي

نفسي أتوه من اللي جوايا

نفسي أتوه من كل حاجة حلوة و وحشة فاكراها

نفسي أقابل كل الناس اللي أعرفها كأنهم ناس جديدة معرفش حتي إسمهم

و ساعتها أكيد....هلف وشي و أمشي...و أسيبهم....ساعتها مش هعرفهم حتي بإسمي

عندي خيال بإني مكونش أنا

بس بسأل نفسي أنا لية عايزة مكونش أنا؟

فبلاقي مني رد عنيف أوي

بيقولي ما تسيبني أحلم شوية!! هو إنتي لازم تأرفيني!! لازم تأكديلي إني هفضل أنا

لازم تأكديلي إني هفضل هنا وسط دا و دية 

متسيبيني يا شيخة...سيبيني أحلم شوية

ولا لازم يعني لما أحلم أكون في حلمي (أنا) و في نفس المكان و محاطة بنفس المعارف؟؟

أنا عندي خيال بإني أبدأ حياة مكونش أنا فيها أنا

ولو حتي منفعش إني أبدأ حياة

فخيالي إني أنتهي من حياة أنا فيها أنا

ممكن خيالي يوم يتحقق؟؟

ممكن في يوم مبقاش أنا؟؟

حتي نُغير ما بأنفسنا

 مدير أمن الشرقية تلقى إخطارا من العميد (رفعت خضر) مدير المباحث الجنائية يفيد قيام ٣ مسلحين يستقلون دراجة بخارية بإطلاق النيران على ضابط بالقوات المسلحة ومجندين بالقرب من مفارق التجنيد أول شارع فاروق أثناء عودتهم على جرار تابع للقوات المسلحة من مفارق الغار ولاذا الجناة بالفرار

ماذا بعد؟؟

لماذا لا نتعاطف معهم؟؟

فلنعترف....أن هناك عداوة و غل و كراهية من عقلية المصريين تجاة أي نظام بمعني إن الشعب قد إعتاد علي كرة أي جهة مسؤلة...أياً كانت....عُقد و خلاص!! لما ظابط جيش ولا شرطة يتصاب ولا يتقتل بيبقي مُتقبل جداً و عادي...لكن لما أي شخص عادي يموت بيبقي التعاطف مالي قلوبنا

هذا النوع أيضاً الذي يتقبل دم المجند فاقد للإنسانية

هناك نبرة شماتة من بعض الأشخاص متمثلة في جملة (أحسن أهو ذنب اللي ماتوا علي جبل سانت كاترين)!! إتقوا الله!! والله إتقوا الله

إن كنت ممن يقولوا هذة الجملة الرخيصة و متبني مبدأ الشماتة فأنت إنسان حقير و غير واعي

فلنعي

 نعي أن ضابط الجيش و الشرطة دة إنسان

إنسان يشغل خانة أب و إبن و زوج و أخ

حينما يستشهد إنسان أياً كان وظيفتة مجند أو شُرطي أو مهندس أو طبيب أو حتي نجار

فهناك

إبن تيتم

زوجة فقدت سندها و ترملت

أم و أب فقدوا فلذة كبدهم

أخت فقدت من كان يرعاها

و  قبل ما نطالب ببلد نضيفة و مستائين اوي من قذارة مصر.....فياريت...ننضف نفسنا الأول من القذارة اللي مغرقانة

فلنتقي الله

٧ سطور----رسالة إلي المتأنسن

٧ سطور

مات و هو واقف عالرصيف!!....و هو إية اللي وقفة عالرصيف هو مش عارف إن ممكن أي قنبلة تنفجر في أي وقت مش يخلي بالة...ولا أهلة باعتينة يموت عشان طمعانين في التعويض

مات و هو راكب القطر!!...و هو إية اللي ركبة القطر ما هو عارف إن قطر يعني موت

مات و هو في الإستاد بيتفرج علي ماتش كورة!!....و هو اية اللي وداه هناك!! مالة التليفزيون يعني؟؟

مات و هو سايق الأتوبيس السياحي!!....و هو إية اللي خلاة يسوق الأتوبيس السياحي من أساسة

ماتت و هي راكبة أتوبيس المدرسة!!....و هي اية اللي يوديها المدرسة متقعد في البيت..ما هي في الآخر مسيرها للبيت و للجواز

ماتت و هي في رحلة علي جبل سانت كاترين!!.....و هي إزاي أهلها يسمحولها تسافر لوحدها!! و بعدين إية اللي يطلعهم سفاري في شهر فبراير

 

لما إنت تبقي شايف إن موت أي إنسان أياً كان إنتمائة السياسي مؤامرة تستهدف الإيقاع بين الشعب و النظام

فأنت إنسان حقير 

 

لما تعليقك علي خبر موت أي إنسان يبدأ بجملة (هو إية اللي وداة هناك أصلاً)؟؟

فأنت إنسان لا تملك من الإنسانية سوي إسمها

و رسالتي لهذا القطيع المتأنسن 

هو إنتوا إية اللي جابكوا الدنيا أصلاً!؟؟

رحمة الله علي شهداء سانت كاترين

لا تنسوهم من دعائكم

جماعة أنصار بيت المقدس و غسيل أم دلال

جماعة أنصار بيت المقدس تعلن مسؤليتها عن التعاقد مع النيزك الذي سيرتطم بالأرض موضحة أنها دفعت للمريخ مبلغ ٦٠ مليار دولار عشان يخبط النيزك كتف و يخلية يرتطم في الارض من ناحية مصر

جماعة أنصار بيت المقدس تعلن مسؤليتها عن ضحايا عاصفة سانت كاترين ...و أكدت جماعة أنصار بيت المقدس علي أن طيارات الإسعاف المصرية كانت متوجهة و بغزارة لإنقاذ الضحايا و خاصةً الضحايا (المصريين) و لكن أفراد الجماعة رشو علي عنين المسعفين بارفان نوع (لولوا) و منعوهم بالقوة من إنقاذ الضحايا

جماعة أنصار بيت المقدس تعلن مسؤليتها عن غلاء أسعار جميع المأكولات و الخضروات في مصر

جماعة أنصار بيت المقدس تعلن مسؤليتها عن قطع الكهرباء يومياً في مصر

جماعة أنصار بيت المقدس تعلن مسؤليتها عن زحام الطريق الدائري و كوبري أكتوبر و كل طرق القاهرة

جماعة انصار بيت المقدس تعلن مسؤليتها عن تطبيخ جميع قواضي التي تمر ب دار الفضاء المصري ( الفضاء بحرف ال ف).... حرف ال (ف) انا متشكرة ليك أوي لأنك خليتني أكون في التمام 

جماعة أنصار بيت المقدس تعلن مسؤليتها عن منع الشرطة المصرية من القيام بواجبها في تأمين الطرق و المواطنين المصريين و وضحت قائلة: أن أفراد الجماعة لموا جميع الدوريات و نقاط التفتيش و الظباط اللي كانوا متواجدين بنسبة ١٠٠٪  في جميع الشوارع و الطرق و الكباري المصرية و إحتجزوهم داخل دريم بارك و تحديداً داخل الكوندور

جماعة أنصار بيت المقدس تعلن مسؤليتها عن جميع حوادث العنف المتواجد في مصر

جماعة أنصار بيت المقدس تعلن مسؤليتها عن نقص سوداني ديلايتس نكهة البابريكا من الأسواق المصرية

جماعة أنصار بيت المقدس تعلن مسؤليتها عن عدم نشفان الغسيل اللي الحاجة أم دلال نشراة عالحبل بقالها ٦ أيام

جماعة أنصار بيت المقدس تعلن مسؤليتها عن ضياع شراب أبو اسماعيل (أبو إسماعيل العادي اللي ساكن في غمرة..مش أبو إسماعيل التاني بتاع حازمون فردة الشراب الكحلي)...ينهار أسود دا أنا كتبت فردة الشراب الكحلي قبل ما أقفل القوس!! كدة الناس هتفهمني غلط! و هدخل في سكة بوليس و شاويش!! ولا لأ صحيح ما أهو إخوان.. واللي بيشتم في الإخوان مبيتحاكمش ولا بيتحاسب

جماعة أنصار بيت المقدس تعلن مسؤليتها عن تصغير كروت شحن ڤودافون لدرجة إن الواحد مبقاش شايف ولا الكارت ولا الرقم اللي علي الكارت

جماعة أنصار بيت المقدس تعلن مسؤليتها عن أي إنفجار حصل أو هيحصل

جماعة أنصار بيت المقدس تعلن مسؤليتها عن إعلان جبنة دومتي بتاع شريف منير اللي جاب لنص شعب مصر شلل رباعي

جماعة أنصار بيت المقدس تعلن مسؤليتها عن تمويل برنامج الرشيق (شريف مدكور) و نعتته بالطابور السادس و نصف

جماعة أنصار بيت المقدس تعلن مسؤليتها عن نقص مُلينات (بيكولاكس) من جميع الصيدليات المصرية

جماعة أنصار بيت المقدس

إزداد سماع هذا المصطلح في الآونة الأخيرة بطريقة غير مفهومة

هل جماعة أنصار بيت المقدس وهم صنعناة؟؟

مجرد سبب نُبرر بة تراخي الحكومة المصرية؟؟ 

هل جماعة أنصار بيت المقدس بئر إختارتة الدولة لتلقي فية اخطاء حكومتنا المخترقة؟ 

و إذا كانت هذة الجماعة تتمتع بالقدرة الخارقة التي تمكنها من تفجير ما تريد و وقتما تشاء...هل هذا يمحي خطأ حكومتنا؟؟

 هل هذا مبرر كافي لدولتنا العاجزة حتي عن توفير الأمن لمديرية أمن القاهرة!!؟؟....أنا مع تواجد شبح جماعة أنصار بيت المقدس....لكن هل هذا الشبح منعكم من تأمين الطرق؟؟ منعكم من نجدة مصابي سانت كاترين؟؟ هل شبح جماعة أنصار بيت المقدس مُحتَجز أفراد الأمن المصري؟؟ لا...أيها الحكومة الموقرة...فتخاذلكم هو سبب ما يحدث و ليس شبح الجماعة

أيها الحكومة الموقرة قد حان الآن الوقت ل

ل

ل

لآذان المغرب حسب التوقيت المحلي لمدينة القاهرة وعلي المقيمين خارجها مراعاة فروق التوقيت

أعذروني...أنا أصلي مش هأقدر أقول حان الوقت ل إية....لأني سبق و قلت إني بخاف...أوي...أتكلم في السياسة

إسم جماعة أنصار بيت المقدس أصبح يكتب دائماً بجانب إسم جماعة الاخوان المتأسلمين

فأصبح أي تفجير يحدث ...سرق إغتصاب تحرش قتل 

يكتب علية

عمل الطالبين: جماعة الإخوان و جماعة أنصار بيت المقدس

إنتبهوا من وهم صنعتوة و صدقة شعب....شعب مقتنع أن (كابتن ماجد) هو أكثر لاعب كرة قدم محترف  

قال الفيلسوف----الجواز-١

قال الفيلسوف

الجواز اللي عن حب بيفشل

الجواز اللي من الصالونات بينتهي

الجواز العرفي حرام

الجواز المسيار وطي

لا إله إلا الله في طبعك أيها الفيلسوف

طب إية النظام!! لا حقيقي آنهي جواز اللي حلو؟؟

و لأني شخصية أمينة و سُكرة هقولكوا ما هي كانت اجابة الفيلسوف عليا بالظبط لما سألتة عن نوع الجواز السوبر

الفيلسوف قالي كالآتي

يا إبنتي الفاضلة إن كنتي تبحثين عن جواز يدوم العمر و لا يأتي عن طريقة حزن أو ضيق فعليكي ب (جواز السفر) لأنة كلة فوائد

أولاً.....ستكونين علي راحة راحتك يا مُزة ولا حد يقولك كيكي ولا حد يقولك ميكي

ثانياً....ستستمتعين بالدليڤيري و كومبوهاتة بدلاً من المطبخ و حوارتة

ثالثاً....سيكون وقتك ملكك أنتي و ساونتك و كافيهاتك و جاكوزيهاتك و نزولاتك 

  

رابعاً..... يا سيدتي ستصونين نفسك من مرض الضغط و السكر و القلب و الكلا و أنفلونزا الطيور.....بإختصار هتعيشي بصحتك

خامساً و هو الأهم..... إذا أخترتي (جواز السفر) ستنقذي نفسك من (حماتك)...و ما أدراكي ما حماتك!!.. إسمعي كلامي أنا فيلسوف و عارف الحماوات و عمايلهم السودا

فأعترضت كلامة قائلةً: و لكن يا سيدي الفيلسوف أنا أشتهي لبيت دافئ يجمعني أنا و زوج رومانسي...أشتهي أن نسهر سوياً نشاهد الأفلام و نحتسي القهوة...أشتهي أن أعد لة أكلة طيبة لتدفئة من برد الشتاء...أشتهي أن يكون لي إبنة تحمل إسمة و تناديني ب أمي

فأجاب قائلاً

طب متطلعيش عين (أمي) و إلبسي

أيها الفيلسوف أحقاً حضرتك قلت  (إلبسي)!! كيف تقول مثل هذة الكلمة!! أين وقارك الذي كنت تظهرة طول هذة السنوات علي محطات الراديو؟؟

قالي هأاااو...وقار!! واآر مين يا أبلة!! مفيش وقار فية بُلطي...أشويلك؟؟

تباً لك أيها الفيلسوف كم خذلتني...حقاً أنا صدمت... أأحدثك عن الزواج...فتقول لي (بُلطي...أشويلك)...بُلطي أيها الفيلسوف!! بُلطي!!!....سحقاً.....فأنا أشتهي الجمبري الچامبو المشوي

إن كان لديكم أي إستفسارات فتابعوا حلقات الفيلسوف بتاعنا...دا راجل سكرة و بيجيب مالآخر 

 

قال الفيلسوف أصدار ٢٠١٤

كنت أنا و بفضلك أصبحت هي

في أول بطولة لي

نقدني مؤلف الرواية

فأرسلت له قائلةً

يا سيادة المحترم كيف تنتقد شخصية من تأليفك؟؟ كيف تنقُد ما كتبت؟ 

أخبرني في ماذا أخطأت؟؟

فقد أديت الشخصية تماماً كما كانت في نَص الرواية

يا سيدي أنت المؤلف المخلص في عملة الذي أهتم بكتابة أدق تفاصيل هذة الشخصية و لم تكتفي بهذا فقط...لكنك وقفت بجانبي لتعلمني كيف لمثل هذة الفتاة أن تؤدي

و أنا نفذت....و أصبحت هي 

 

 

أنت من إختار لي هذة الشخصية...و من أسقاني هذا الأداء

فلا تنتقدني....بل إنتقد نفسك...فأنا مجرد مؤدية  أنفذ ما كتبتة في رواية حياتنا

سيدي هل تتذكر حين أتيت لك في أول حياتي المهنية و أخبرتك بأن البراءة و الطيبة ستليق بي أكثر

ولكنك..عاندت...أصريت علي أن تمنحني دور الحقيرة

أمامك الآن بطلة روايتك في الدور الذي أخترتة لها

فلك ما ألفت يا سيدي

قابل للكسر

لقد وصلتني رسالة منك عبر صديقتي

حقاً كلماتك أسعدتني للغاية...تلك السعادة التي تصاحبها دموع لا تجف

تلك السعادة التي ترسم إبتسامة لا تُمحي

ولكني تألمت...تألمت لأنك مازلت تتذكرني

تألمت لإنني مازلت ملكة أحلامك

تألمت لأنك حزين و تدّعي السعادة

و حينما إنتهيت من رسالتك...إتخذت قراري...بأني سوف آتي لأنقذك

و وجدت أن إنقاذي لك سينقذني أنا الأُخري

حتماً سينقذني

و لكن كيف؟؟

كيف أذهب لأنقاذة؟؟

كيف و أنا ممنوعة من الحياة؟؟

كيف سأتخذ خطوة في الطريق إلي الحياة و أنا ممنوعة حتي من النطق بأسمها

كيف؟؟

في هذا الوقت فرضت السكوت علي كلماتي...و سمحت لدموعي بالحديث

فلن يستطيع أحد اللوم علي الدموع  

دموعي تحدَثَت لتعتذر لك نيابةً عني...فسبق و قلت لك أني ممنوعة من الحياة....فكيف لي أن أنطق أسمك و أوجة لك رسائل بالكلمات و أنت الحياة...التي مُنعت منها

فدموعي أخرجتني من هذا المأزق و تحدثت قائلةً ما بداخلي

عذراً .....لن أستطيع أن أنقذك...لن أستطيع

لن أستطيع سوي إغماض عيناي فأري سوادٌ حالِك...و أتخيل وجودك في وسط هذة الظُلمة

عذراً فأنا ليس مسموح لي أن أراك سوي في حلكة غمضة عيناي

حلكة غمضة عيناي التي لا يوجد بها سوي خطوط و نقاط سوداء

و لكني إستخدمت كل هذة الخطوط السوداء و رسمت وجهك

و رأيتك

فكلما وجدتوني مغمضة عيناي...فأعلموا أني في لقاء معة

وعد و صندوق

من إمبارح و أنا مش عارفة أبطل تفكير في أطفال القمر...حقيقي والله متضايقة جداً عليهم

و أخدت وعد بيني و بين نفسي

و قررت إني أكتب الوعد دة عالمدونة...عشان يبقي قدامي...عشان خايفة أغير رأيي...فقلت لما أبقي قلتة قدام ناس كتير هيبقي حافز ليا إني أنفذ وعدي

وعدي إن

أقسم بالله العلي العظيم وحيات بنتي اللي معنديش في دنيتي كلها أغلي منها إن فلوس أرباحي من أول كتاب هانشرة بإذن الله...هاساعد بيها كلها في تحقيق حلمهم....قرية مغطاة صغيرة.... مليانة جناين و مراجيح و زحاليق ....و فيها بيسين كبير...و جوا القرية مدرسة صغيرة عبارة عن فصول إزازها شفاف بيبص عالجناين...و محلات لعب...و عيادة طبية مجهزة....و بيوت من اللي ليها حيطان...و شبابيكها إزاز عشان يشوفوا البسين و الجناين....و هناك هيعيشوا أحلي حياة

هيصحوا الصبح...يروحوا المدرسة بالعجل بتاعهم...و يخلصوا مدرسة يطلعوا عالمراجيح و الزحاليق اللي مشافوهاش غير في التليفزيون...و في الأجازة يروحوا بقي يعوموا في البيسين

أصل للأسف والله أنا مبشتغلش عشان أتبرع شهرياً بجزء من مرتبي و أساعد بية...بس والله العظيم أنا إبتديت أحوش...جبت صندوق و حطيتة في البيت عندي و إبتديت أحط فية فلوس ل (قرية أطفال القمر) طبعاً ملحقتش أحوش فية فلوس كتير...بس والله أنا متفألة جداً

 أنا عايزة أقولكوا إن أول فلوس إتحطت في الصندوق كانت (٢جنية)....ال (٢ جنية) دول من بنتي (مليكة).....مليكة فتحت الحصالة بتاعتها اللي سبق و قلتلكم إنها منطقة عسكرية بالنسبة لها و لو حد مننا قرب لحصالتها بتضربة بالعجلة أو بالسكوتر..علي حسب اللي بيبقي جمب إيديها...شكراً يا مليكة يا حبيبتي...مليكة لما عرفت القصة بتاعة الأطفال اللي عايزين نوفرهم نادي و مدرسة قالتلي (ونبي يا مامي سموا النادي دة چودي)...عايزة أقولكوا إن مليكة بتطلق الإسم دة علي كل حاجة حواليها...لدرجة إنها مسمياني أنا شخصياً..چودي

المهم أنا كنت عايزة أرجع بيكو للحظة اللي قبل ما مليكة تقتنع و تفتح حصالتها و تحط في الصندوق ال (٢ جنية)....مليكة سألتني (هو إحنا لية هنحوش فلوس يا مامي؟) فحاولت أحكيلها الموضوع بطريقة بسيطة عشان تقدر تستوعب فقلتلها (فية أطفال صغيرين نفسهم يروحوا المدرسة و يروحوا يلعبوا في النادي بس مش عارفين لأنهم عيانين أوي و مش معاهم فلوس يجيبوا الدوا...فعشان كدة إحنا بنحوش فلوس عشان نجيبلهم الدوا)...فسكتت و قالتلي (طب ممكن يا مامي نروح نجيبهم بالعربية و نخليهم ييجوا النادي يلعبوا معايا؟؟ وممكن كمان يا مامي نخليهم ييجوا معايا المدرسة بتاعتي؟) قلتلها ( لأ يا مليكة يا حبيبتي مينفعش عشان هما عيانين أوي أوي ولازم يبقي ليهم نادي لوحدهم و مدرسة لوحدهم) فضلت مستمرة في الجدل و ميت ألف كلمة (لية)....فإترفزت طبعاً و قلتلها (مليكة إخلصي...هتحطي فلوس في الصندوق ولا لأ؟؟؟) فقالتلي (آه هاحط)..و فعلاً راحت فتحت حصالتها و حطت ( ٢جنية) فئة ٤ تنصاص

و بعد أكتر من ٨ ساعات متواصلة من سؤال (ها يا مامي جبتي الدوا و النادي للأطفال بالفلوس اللي حطيتها في البوكس؟) ها يا مامي؟؟ ها يا مامي؟؟؟ ها يا مامي؟؟؟؟ ها يا مامي؟؟؟ ها يا مامي؟؟

فتحت الصندوق

و رجعت لمليكة الإتنين جنية بتوعها و قلتلها (آه يا حبيبتي جيبتلهم الدوا و النادي بالفلوس اللي إنتي حطيتيها في الصندوق و دول الباقي) حقيقي الزن لا دين لة

و المصيبة إنها مرضيتش تاخد الفلوس و قالتلي: لا لا يا مامي خليهم يمكن يعوزوا يشتروا لعب ولا إسكوتر

يا أهل الخير ملاقيش بقي حد يتبرع في الصندوق بس ميكونش زي مليكة؟؟

إرحموا من في الأرض

قدم الإعلامي المحترم (يسري فودة) اليوم في برنامجة (آخر كلام) علي قناة (أون تي ڤي) تقريراً عن مرض (أطفال القمر) في مصر و نوه إن التقرير بيحتوي علي مشاهد قاسية...أنا بصراحة إستغربت جداً من إسم المرض...لإني والله عمري ما سمعت عنة خالص...و إستغربت أكتر إنة بيقول مشاهد قاسية...قلت جوا نفسي قاسية إزاي يعني!! لأني أعتقدت إن أطفال القمر دول هما الأطفال اللي شعرهم و حواجبهم بيضا...و إبتدي التقرير...و برضو أول ما التقريرإبتدي لقيت جملة تحذيرية من المحتوي القاسي اللي بداخل التقرير....أنا برضو مهمنيش....مغيرتش القناة...وإبتدي التقرير بضلمة الليل...و صوت رقيق جداً لطفلة بتقول (أنا كان نفسي أوي أروح المدرسة زي بقيت الأطفال)...برضو أنا مفهمتش إية اللي ممكن يكون مانعها من أقل حق من حقوقها!! إية اللي ممكن يكون مانعها من حلم بسيط أوي زي دة!! إية اللي ممنوع في حلمها اللي بمدرسة حكومية فيها ٧٠ طفل في الفصل...بمدرسة حكومية من اللي مفيهاش تعليم أساساً...ولا يمكن يكون كتير عليها حتي إنها تروح المدرسة بالعربيات النص نقل اللي بتحمل ألف عيل عشان توصلهم لقبرهم....كتير عليها إنها تحقق حلمها بإنها تروح مدرسة بسيطة؟؟

كتير عليها تتبسط بحاجات بسيطة جداً؟؟ كتير...آه والله تصدقوا إنة طلع كتير عليها

لإنها عيانة

جابوا الكاميرا علي بيت الطفلة....بيت بدائي جداً...أسرة بسيطة....باين عليهم الفقر...الأسرة كلها ملتفة حوالين تليفزيون صغير جداً...و بيتفرجوا علي فيلم...و بيضحكوا! آه والله كانوا بيضحكوا...كان واضح عليهم الرضا بطريقة أثارت إستغرابي....رضا بحالهم و بالمرض اللي ربنا إبتلي بية بنتهم....الكاميرا جابت الطفلة صاحبة الصوت الملائكي

و أول ما شفت وشها

أقسم بالله بكيت....وقفلت عيني

و قلبت القناة

مقدرتش أكمل

مقدرتش أكمل مش بسبب إني قرفت ولا خفت

لأ مقدرتش أكمل لإني أقسم بالله العظيم حسيت إني إنسانة حقيرة

إنسانة مش حاسة بأي حاجة خالص

عايشة في ماية البطيخ

حسيت إني قرفانة من نفسي...جداً

و قرفت أكتر و أكتر من البلد

البلد اللي كل حاجة فيها زبالة و الناس قابلة و راضية و ساكتة

فين البلد؟؟ فين هي بجد!! إية الهرتلة دية!! الله يلعن أبو دي بلد الملايين فيها بتترمي عشان حفلة تتعمل تطلعوا تطبلوا و تغنوا فيها للحاكم!! و سايبين الأطفال يموتوا بالبطيئ

الله يلعن أبو دي بلد مبيهمهاش غير إنها تريح الناس اللي معاها فلوس

و الناس اللي معهاش فلوس بيضربوها بالجزم

طفلة صغيرة جداً ذنبها إية هي إنها تفضل من و هي عمرها ٦ سنين لحاد ما تكبر محبوسة في البيت؟؟ لية؟؟ ممكن إجابة؟؟ لية متعملوش( جمعيات لأطفال القمر) زي اللي موجودة في فرنسا و المغرب!! يعني إحتمال ربنا يرحمكوا شوية من ذنبنا كلنا!! بجد أستغفر الله العظيم

أنا مش طايقة البلد الضلمة دية

يا جماعة مرضي أطفال القمر مبيقدروش يتعرضوا للشمس خالص و الموضوع مش زي الأطفال اللي شعرهم أبيض و حواجبهم بيضا اللي كانوا معانا في المدارس...لأ...الموضوع خطير...مصابي هذا المرض أشعة الشمس بتخلي جسمهم يتآكل و يذوب....و تقدروا تشوفوا تقرير المحترم (يسري فودة)....شوفوة أرجوكم

البلد عملت إعلانات بمبالغ مالية طائلة لدعم الدستور....و مهنش عليهم يدفعوا الفلوس دية عشان يأسسوا جمعية واحدة بس ل أطفال القمر عشان تحسن حالتهم النفسية....عشان تعملهم رحلات ليلية توريهم الدنيا اللي هما ماشافوهاش..توفرلهم مدارس ليلية....إنما إزاي!! بلد ماتعرفش توفر غير (الملاهي الليلية)...لإن الملاهي الليلية دي بتجيب فلوس...إنما جمعيات أطفال القمر و المدارس الليلية دية مش هتجيب فلوس لإن أطفال القمر الموجودين في مصر فقرا و معهمش فلوس يدفعوا...لإن أطفال القمر الأغنيا راحوا علي فرنسا يعيشوا هناك بفلوسهم...إنما الغلابة...يفضلوا محبوسين في بيوتهم اللي هيا أصلاً عشش...آه والله عشش و أهالي العيال بتسد الفتحات اللي في العشش بهدومهم اللي دايبة خايفيين لا الشمس تدخل و عيالهم يموتوا....حسبي الله و نعم الوكيل

بلد ضلمة و هتفضل ضلمة 

بلد عمرها ما هتتعدل غير لما الحكومة تتقي الله فينا

إتقوا الله بقي...شوفوا الناس الغلابة

أنا هأيد الريس اللي يقضي عالفقر و المرض

أنا هأيد الريس اللي يسكن الناس في بيوت بدل العشش

أنا هأيد الريس اللي هيخلي الغلابة مياكلوش من الزبالة

أنا هأيد الريس اللي هيخلي المدارس الحكومية زي المدارس اللغات

أنا هأيد الريس اللي هيخلي العيال اللي مالية الشوارع ليها دخل شهري و يونيفورم يروحوا بية المدرسة

أنا هأيد اللي هيرحم الغلابة

أياً كان إنتمائة أياً كان ديانتة...أياً كان...حتي إن كان مجوسي...و هيحل للناس مشاكلها...والله لأيدة

أنا باطالب أي مرشح للإنتخابات الرئاسية إنة يطلع رجل محترم و يوفر الفلوس اللي هيرميها في دعاية خايبة لية و يأسس بيهم جمعية لأطفال القمر

أرجو من مرشحي الرئاسة إن حد فيهم يطلع رحيم و يوفر للأطفال دول مكان يحتويهم...والله العظيم الفلوس اللي هتسعد بيها الأطفال دول...الدعوات اللي هتجيلك من قلب كل أم شايفة بنتها و أبنها مبسوطين...أحسن ميت ألف مرة من أم دا كرسي عايزينة

والله أحسن

أرجوا من كل واحد فيكوا قرا المقال إنة يعملة شير يمكن يوصل لحاد من المسؤلين اللي كانوا منيمنا (ننا هووو) وكانوا معتمين و مكتمين عالمرض دة لحاد يسمع بية و يأرفهم....شيروا...خلينا نعرف الناس اللي لسة معرفتش عن المرض دة.....شيروا...يمكن إبن ولا بنت حد من اللي نازلين الإنتخابات يقرا الحل اللي إقترحتة و يقنع والدة إنة يوفر الفلوس بتاعة (الأسفلت منور لية...عشان المهيطل ماشي علية) و يعملوا جمعية واحدة حتي لأطفال القمر....شيروا...يمكن حد من المسؤلين يقفل (ملهي ليلي) و يفتح مكانة (مدرسة ليلية) للأطفال دول

شيروا يمكن حد يحس

شيروا يمكن حد يصادف و ضميرة يوجعة

شيروا 

كلامي دلوقتي لكل أم....تقدري تشوفي إبنك ولا بنتك بعد الشر في مكان أطفال القمر؟؟

تقدري تلاقي إبنك بيبص في المراية و يقولك (هو أنا عيني الشمال راحت فين يا ماما)؟؟

تقدري تسمعي بنتك بتقولك (هي يا ماما المدرسة شكلها إيه)؟؟

تقدري تسمعي إبنك بيقولك (أنا نفسي أشوف البحر و الرمل يا ماما)؟؟

تقدري تسمعي بنتك بتقولك (هو أنا لية شكلي مش عامل زي البنات اللي بشوفهم في التليفزيون)؟

لا متقدريش...أنا أم و عارفة إنك مش هتقدري

طيب ممكن نساعدهم؟؟

ممكن؟؟

ممكن نعمل حفلة و تمن التذكرة يكون مثلاً   ٥٠ جنية...و نعمل إينڤايت لكل الناس...و نطلب مساعدة شركات الدعاية و الإعلان إنها تعمل للحفلة دية إعلانات في الجرايد و في الطرق و عالفيسبوك.....و ممكن كمان نفتح حساب بنكي و نعملة رقم عشان الناس تدفع فيها زكاة الفطر و زكاة المال...و ساعتها هيكون معانا مبلغ محترم...هنقدر نأسس جمعية (أطفال القمر) اللي هتعملهم رحلات ليلية و تفسحهم و وقتها الأطفال لما يكونوا زي بعض نفسيتهم هتبقي كويسة...لإنهم شايفين أطفال تانية زيهم بنفس حالتهم...و مدرسة ليلية كمان....ممكن؟؟

الحفلة دية حل بديل لإني عارفة إن مرشحي الرئاسة هيفضلوا لافتات الدعاية والإعلانات التليفزيونية الغالية طحن و النتايج و توزيع الزيت و اللحم الضاني...للأسف...محدش هيساعد الأطفال دول غير ربنا و إحنا

ها هنساعدهم؟؟ ولا صعب؟؟

صعب صح؟؟

مستحيل؟؟

عموماً أنا مش هايأس

أقسم بالله ما هابطل محاولة

وحيات بنتي عندي لأطحن نفسي لحد ما أعرف أحقق حلمها و حلمة

إنها تروح المدرسة

و

إنة يروح الملاهي

خراشوف بالكونڤيرس

علي فكرة بقي الچاكيت أبو نجمة دة اللي الناس عمالة ترغي علية اللي بوتين أهداة للسيسي  دا چاكيت (كونڤيرس) ..قاموا بقي الناس قالوا نجمة مقاتل و نجمة الجيش الروسي و هي أصلاً نجمة الكونڤيرس

خراشوف يا سي بوتين و ونبي الزيارة الجاية إبقي إبعتلي شنطة كونڤيرس منقوشة لزوم البسين

٧ سطور----السيستم واقع

مساء الخير...أنا حابة جداً إني أحدد يوم في الإسبوع أكتب فية (٧ سطور)...٧ سطور و بس

٧ سطور...فيهم تريقة و سياسة و كآبة و نقد و إستظراف...٧ سطور فيهم مشاكلنا بس من غير أي حلول

ما أهو أنا أصلي مش هاضحك عليكوا و أقولكوا: ياي أنا كيوت و هاكتب (٧ سطور) فيهم مشاكل بتواجهنا و حلها!! أنا كدة هأبقي بأحور عليكوا!! دا إحنا بنفضل ٧ سنين مش عارفين نحل مشكلة..هاجي بقي أنا و أحلها في ٧ سطور!! مستحيل

ال (٧سطور) دول هقول فيهم كل اللي جوايا و اللي ممكن يكون شبة اللي جواكوا

٧ سطور فيهم أنا و إنتوا

٧ سطور فيهم مجتمعنا و مطباتة و بلاعتة 

ال (٧ سطور) هكتبهم يوم الأربع من كل أسبوع إنشاء الله

أول (٧ سطور) هيكونوا تحت عنوان (تي إي داتا إديتنا الراوتر و خدت مننا كل حاجة) حمادة شاب لطيف عمرة ٢٩ سنة....حمادة بعتلنا رسالة ڤودافونية بيشتكي فيها من خدمة عملاء (تي إي داتا) بيقول إنوا كل ما يكلمهم عشان يعرف النت قاطع عندة لية لازم يقولوا (السيستم واقع) و لو حصل و بعد الشر لقوا (السيستم) بيقوموا قايلنلة (حضرتك إفصل كل فيش التليفون اللي في البيت و إقفل الراوتر و إفتحة) و لو مشتغلش بيسمعوا جملة (حضرتك في إصلاحات في أجهزتنا اللي في السنترال و جاري إصلاحها ومدة الأصلاح بتكون ٤٨ ساعة عمل بإستثناء العطلات)..حمادة معترض و بيقول (طب مقلوش مالأول لية إن فية إصلاحات)..طبعاً كلنا نحب نقولة (كلنا زيك يا حمادة) و بينهوا المكالمة مع حمادة بإعلامة طرق السداد و مهما حاول يقولهم إنه عارف..برضو بيقولوا...تي إي داتا يا ما نفسي آجي ألزق علي كل فروعكوا بوستر رابعة عشان تروحوا تلعبوا مع السيستم

تصبحوا علي ألف خير

قايمة أم هناء

عن صياعة و دهاء أهل العروسة سأتحدث

عن ملاوعة أهل العروسة سأتحدث

عن أڤورة أهل العروسة سأتحدث

الحوار منقول من داخل بيت أهل (هناء) العروسة

أبو هناء: خدي يا بنتي صورة القايمة أهي اديها لخطيبك عشان يراجعها علي مهلوا

هناء: حاضر يا بابا

أم هناء: صورة قايمة إية اللي تديهالوا!! إنت إتجننت يا راجل إنت!؟؟

أبو هناء: إية يا أم هناء!! إية المشكلة يعني!! آه تديهالوا...حقوا

أم هناء: حقوا!! جاك كسر حوقوا!! قال حقوا قال

هناء: في إية بس يا ماما؟؟

أم هناء: فية إن أبوكي إتجنن!! عايز يدي لخطيبك صورة القايمة يقعد يفصص فيها و يوريها لمحامي...دا غير بقي أمة الحرباية!! تفضل تقولة لأ خليهم يشيلوا دة و يحطوا دة

هناء: طيب يا ماما و إية المشكلة؟؟

أم هناء: فين المشكلة!! يا بت إنتي هبلة ولا شكلك كدة

هناء: يا ماما محمد قالي إنة عايز يشوف القايمة و إنة مش هيمضي علي حاجة غير لما يراجعها كويس

أم هناء: يشوف إية و يراجع إية يا بت يا هبلة إنتي!  دا لو خادها و وداها للمحامي ولا الولية العقربة أمة شافتها مش هيرضي يمضي طبعاً...دا إحنا كاتبينلة قايمة ب ٧٥٠ ألف جنية..و هو محلتهوش اللضا أساساً....دة لو شافها مش هيمضي...إنما بقي لو سمعتي كلامي هيمضي...و لما يمضي هيمشي تحت رجلك...يعني مالآخر كدة لو فتح بقة و ضايقك وحيات غلاوتك لا القايمة تودية في ستين داهية...و ساعتها بقي هيعملك ميت ألف حساب

هناء: طيب ما أهو كدة كدة لو شافها و هو بيمضيها مش هيرضي يمضي...ساعتها بقي إحنا هنعمل إية؟؟

أم هناء ضحكت ضحكة خبيثة و قالت: لأ ما أهو مش هيشوفها 

هناء: مش هايشوفها!! دا ازاي يعني؟؟ هنخطفة و نمضية؟؟ ولا هنشربة حاجة أصفرة و نمضية؟ 

أم هناء: أنا معرفش إنتي طالعة هبلة لمين؟؟ يا خسارتك والله كان نفسي تطلعي زيي

بصي يا سيتي....إنتي هتفضلي تعومي معاه موضوع القايمة دة....يعني كل ما يقولك (عايز أشوف القايمة) تردي و تقوليلة (حاضر يا حبيبي)...فهمتي؟؟

و احنا بقي هنعمل نفسنا ناسيين موضوع القايمة دة

وهو طبعاً ما هيصدق إن إحنا مبنجبلوش سيرة القايمة

و إنتي هتفضلي تتوهي فية لحاد يوم الفرح

و لما ييجي يوم الفرح....و تلبسي فستانك و تتأنتكي

و ييجي لحاد باب أوضتك عشان ياخدك..ساعتها بقي سيبيهولي

هناء: هتعملي فية إية يا ماما؟؟

أم هناء: يوة يا بت هو أنا هاكلة!! متخافيش علية كدة...داهية تشيلك إنتي و هوا

أنا بس هفتحلة باب الأوضة...و أقولة: أدخل يا محمد يا إبني عايزاك

و لما يدخل هطلعلة القايمة و أقولة إمضي بقي قايمة (هنونة) حبيبتك

طبعاً هيعترض و هيفضل يزعق...بس مش هيقدر ميمضيش

مش هيضيع الفلوس اللي دافعها في الفرح...ولا الفلوس اللي دافعها في شهر العسل...ولا هيقدر ينزل يمشي قرايبة

هيمضي و رجلة فوق رقابتة...و حياتك ليمضي

و في اللحظة دي و مع نهاية خطة أم هناء لتدبيس محمد في القايمة أم ٧٥٠ ألف جنية إنسحب أبو العروسة و هو يتمتم قائلاً: حسبي الله و نعم الوكيل...أستغفر الله العظيم...ولية جبارة ربنا يهدك يا شيخة

هذا الحوار يدور بداخل ٨٥٪ من بيوت أهالي العرايس

و فعلاً الخطة اللي بتحطها أم العروسة بتمشي عنب

و العريس بيمضي

بس للأسف علاقة العريس مع أهل مراتة بعد الفرح بتبقي سيئة جداً....لإنة مبينساش القفا اللي خدوا من أهل مراتة

 و بتفضل العلاقات سيئة و في تصاعد مستمر إلي أن تنقطع

و بتفضل البنت في النص محتارة بين أهلها و جوزها...مبتبقاش عارفة ترضي جوزها ولا أهلها

و حقيقي والله مفيش أوحش من الإختيار بين الأهل (الأم و الأب) و الزوج

القايمة شرعاً هي حق الزوجة...بس لما تبقي قايمة عادلة....قايمة معمولة بغرض حفظ (حق الزوجة).....و بكرر....(حق الزوجة)....حفظ حق الزوجة

لكن للأسف الشديد القايمة الزوجية بقت تتعمل بغرض إرهاب الزوج....بغرض تهديد الزوج...القايمة بقت تتعمل لإخراس الزوج...مالآخر القايمة بقت كلبشات للزوج

القايمة الحديثة معمولة لضمان حق (مش من حق الزوجة أصلاً)!! تلاقي القايمة مكتوب فيها حاجات مش موجودة في البيت أساساً...و حتي الحاجات اللي موجودة بيبقوا كاتبين جمبها أسعار هلامية...أسعار مش حقيقية...دا بالإضافة إلي إن فية شوية حاجات بيكتبوها في القايمة بتجيب (حساسية موسمية) مثلاً زي: ماكينة بيتيفور....عدد ٤ قطاعة كوكيز متكونة من شكل قلب و نجمة و قمر هلالي الشكل و مثلث متساوي الأضلاع...ملاحة علي شكل طباخ...مريلة مطبخ منقرشة...ساعة محتوية علي بطاريتين قلم (إنرجايزر)....خلل سنان...عدد ٧٥ مشبك غسيل منقسمين إلي ٣٠ مشبك لونهم أزرق سماوي و ٤٥ مشبك أصفر كتكوتي

طب دا يرضي ربنا دة!! ينفع كدة بجد والله!!...بيكتبوا مشابك الغسيل...لأ و (كتكوتي) كمان!! طب دول بيعملوا قايمة ولا بيهرجوا!! لا بجد!! إية الهلس دة

يا أساتذة...القايمة اللي إنتوا بتقولوا عليها (حق الزوجة شرعاً) مبتبقاش كدة!! ما أهو اصل شرع إية اللي يخليكوا تكتبوا مشابك كتكوتي و سماوي و بطاريتين إنرجايزر و قطاعة كوكيز!!! طب إفرضوا المشابك ضاعت!! ولا قطاعة الكوكيز ولعت!! تودوا بقي الراجل في داهية بتهمة (تبديد قايمة المنقولات الزوجية)!! ....ولو حصل و مفيش حاجة ضاعت...المبلغ الخزعبلي اللي إنتوا مبتبقوش صرفتوا نصة اللي إنتوا كاتبينها في القايمة دا حق بنتكوا!! إنتوا صرفتوا المبلغ دة أصلاً!!..أصل دي كدة مش قايمة خالص...دا وصل أمانة

للتوضيح أنا مش معترضة علي (القايمة العادلة) خالص....أنا معترضة علي سلوك أهل العروسة في كتابتهم للقايمة و طريقتهم المبتذلة مع العريس في تدبيسة و إجبارة علي إمضاء القايمة....للأسف والله أهالي كتير جداً بيتبعوا السلوك دة....بيكتبوا قايمة بمبلغ مالي أضعاف أضعاف أضعاف اللي هما صرفوة و بييجوا يوم الفرح و يفاجأوا العريس...و يا تمضي يا مفيش جواز و إلبس بقي إنت في فلوس الفرح و في المعازيم

أنا معترضة علي السلوك العدواني المتمثل في (قايمة ب تريليون ألف جنية) اللي بيلجألة أهل العروسة بغرض تأمين مستقبل بنتهم....أصل معلش...عمر الفلوس ما كانت...ولا عمرها هتكون أمان لبنتك

إنت كا أب أكبر أمان...لبنتك

إنتي كا أم أكبر أمان...لبنتك

وجودكوا معاها هو الأمان ليها....وجودكوا جمبها هو اللي هيخلي جوزها يحترمها و يشيلها فوق راسة

و معلش والله هو إنتوا لما تبقوا مهددين جوز بنتكوا...لما يمشي جمب الحيطة لإنة خايف لتاخدة حاجة مالبيت و تيجوا تبلغوا عنة إنة بدد و أهدر....حلو كدا؟؟ لا والله بجد هتكونوا مبسوطين!! و لما يكون كويس مع بنتكوا لإنة خايف من القايمة...دية بقي حاجة كويسة!! ولما يبقي مش عايز يطلقها لإنة خايف من القايمة أم ٥٠٠ ألف جنية...دية حاجة حلوة؟؟ حاجة تبسط يعني؟؟ 

بلاش تخلي جوز بنتك يبقي متمسك بيها لإنة معهوش فلوس يدفع مؤخر أو حتي يبقي متهدد بقايمة! خلوة يبقي متمسك بيها عشانها هيا

لما يبقي عايزها و متمسك بيها بالرغم من عدم وجود قايمة ولا مؤخر...إنتوا كدا هتبقوا حققتولها الأمان

بلاش تخلوا بنتكوا تبدأ حياة بوصل أمانة ظالم متنكر في هيئة قايمة

بلاش تخلوا بنتكوا تبني في حياتها علي أساس مغشوش......لإن ببساطة الأساس دة هو اللي هيشيل سنين حياتها كلها

 حيات بنتكوا تستاهل أساس صح

و فككوا بقي من المشابك السماوي و الكتكوتي

يلا تصبحوا علي ألف خير

وحيد بين الجميع

مها تبحث عن لقب مُطلقة

 أخواتي الأفاضل البنت المصرية من يوم ما بتتولد لحاد ما تموت و هي مُكبلة و مسجونة في سجن العادات و التقاليد واللي يصح 

واللي ميصحش و كلام الناس و أهلها و جوزها و أهل جوزها و ولادها و أجواز ولادها...و هكذا

إنهاردة أنا هتكلم عن موضوع: أتطلق إمتي؟؟

البنت تتجوز شاب جميل و أمور...بعد الجواز يظهر علي حقيقتة...يضربها و يهينها أو يخونها أو يطلع حشاش مثلاً...فالبنت تعوز تطلق....فأهلها و الناس اللي حواليها يقنعوها بإن (أول سنة) في الجواز بتبقي صعبة و إن بعد كدة الدنيا هتروق و تحلي...و برضو تصمم عالطلاق....فا متعرفش تطلق

عشان هية شابة و عندها ٢٦ سنة فا مش هينفع تحمل لقب (مُطلقة)!!! شابة و صغيرة وحلوة و مُطلقة في بداية جوازها الناس تقول عليها إية (معيوبة)!! لأ إزاي لازم تكمل الجوازة لحسن الناس تاكل وشها! فتفضل عايشة مع جوزها كام سنه كمان فتحمل و تخلف...و مع تعب و أرف العيال بتحس إنها خلاص مش قادرة تستحمل جوزها بالرغم من أن (أول سنة) الصعبة اللي أهلها قالولها عليها بقت (أول ١٠ سنين)!! و هو لسة زي ما هو...و الدنيا ولا راقت ولا حليت!!..و هية كمان خلاص عمرها عدي التلاتين...فتقدر تعمل اللي كان نفسها فية و تطلق.....فا متعرفش تطلق

عشان عندها ولاد فا مش هينفع ولادها يحملوا لقب (ولاد المتطلقة)!!!....فتكمل لف في الساقية...و تستحمل...و تكبر عيالها و تجوزهم...و تحس إنها خلاص بقي عملت كل اللي عليها...وصلت إبنها بيتة مع مراتة و وصلت بنتها لبيت جوزها.....فا زي ما تقولوا كدة بتبقي خلاص بقي عايزة ترتاح...بقالها سنين مستحملة...أظن حقها ترتاح شوية...فتعوز تتطلق...فا برضو متعرفش تطلق

عشان جوز بنتها و مرات إبنها مينفعش يحملوا لقب إنهم مناسبين من (عيلة  مطلقة)!! فتستحمل عشان خاطر عيالها...و تفضل متعذبة لحااااااد ما لا نهاية

أنا نفسي والله أي حد....يجاوبني

ما هو التوقيت المناسب للطلاق؟؟

لا بجد والله

البنت لما تعوز تطلق...تطلق إمتي؟؟؟

الله يا جدعان...البنات مش عارفين يطلقوا إمتي

ييجوا يتطلقوا

أول الجواز: لأ كلام الناس و أصبري شوية

بعد مرور سنتين: يا بنتي دا إنتي بنتك علي إيدك و لسة بترضع!! دا علي أساس إن الأب هو اللي بيرضع!! شئ عجيب والله

بعد مرور ٦ سنين: الرضيعة كبرت و إتفطمت و بقت طفلة...لأ أصل العيال صغيرين و محتاحين أبوهم

بعد مرور ٢٥ سنة: العيال علي وش جواز..ما تصبري لحاد ما يتجوزا..إنتي إية!! عايزة تفضحيهم!! عايزة نسايبهم يعايروهم

بعد مرور ٣٥ سنة: ولادها إتجوزوا و راحوا بيوتهم و خلفوا...هو إنتي جاية دلوقتي بعد ما بقيتي جدة و عايزة تطلقي!! يا شيخة عيب علي شعرك الأبيض!! و بعدين دا إنتي حاجة!! حاجة!! و يزخرفوا كلامهم ب (هو إنتي ملحوقة و متصربعة عالطلاق لية!! خلاص يعني العريس واقف عالباب!!...يا حاجة دانتي ماما ستو) و في آخر الكلام يقولوها: ما كان من الأول...عايزة تطلقي كنتي إتطلقتي من الأول...كنتي ساعتها عرفتي تعملي حياة تانية و بيت تاني...إنما جاية و إنتي عمرك ٥٩ و عايزة تطلقي...يا شيخة إستهدي بالله و قومي صليلك ركعتين

لا تعليق!! بجد والله لا تعليق

قال إية..كنتي إتطلقتي من الأول...يا ولاد اللذينا ما هي قالت من الأول (عايزة أتطلق) و انتوا قلتلها لأ و انتي شابة وكلام الناس....و إستحملت كل دة و في الآخر قولتولها برضو لأ و إستعنتوا بعبادة (الحج) اللي هي عملتها و الشعر الأبيض عشان تقنعوها إنها متطلقش!! دا علي أساس إن الطلاق هيلغي الحجة و هيصفر شعرها

أنا نفسي والله أعرف البنت اللي عيشتها مع جوزها مستحيلة و عايزة تطلق...تطلق إمتي؟؟

و هل مباح الطلاق في سن مبكر؟؟

هل المعتمرة (اللي عاملة عمرة) و جوزها بيخونها مثلاً هل يجوز لها الطلاق؟؟ أم العمرة اللي هي كانت عملاها هتسقط؟؟

و هل صاحبة الشعر الأبيض مباح لها الطلاق؟؟ 

حقيقي مجتمع عقيم...معندوش طموح إنة يتعدل

مجتمع أصدر قرار إن الطلاق ميتمش...غير لو الراجل هو اللي طلق!! لكن البنت تطلبة...بيكون فية ألف مانع و مليون إعتراض

  

مجتمع شايف إن طلاق البنت فضيحة

أنا مش بشجع حد إنة يتطلق...أنا بس نفسي إننا نبقي مزودين بثقافة إستيعاب المُطلقة الشابة و المُطلقة الحاجة اللي شعرها أبيض

والله مفيش أوحش من إننا نحرم بعقليتنا المتأخرة اللي ربنا أباحة و قال علية حلال

شعب بينسي كتاب ربنا في اللي علي مزاجة ...و يرجع يفتكرة في اللي علي مزاجة

إتبع دينك و سنة رسولك

و نفض خالص لأقوال تيتة و جدو و عمو حسين جارك الحِشري و طنط فيفي قريبتك النمامة 

ربنا اللي هيحاسبك...مش الناس

إرضي ربنا...مش الناس

إعمل اللي يريحك...مش اللي يريح الناس

لإنك ببساطة إنت اللي هتبقي مبسوط أو قرفان...مش الناس

أصل دي حياتك...مش حيات...الناس

بسمة السباعي

واحد فول...و واحد بطاطس طحينة

نورا و أدهم كانوا بيحبوا بعض جداً...و إتخطبوا...و حصل العادي...سابوا بعض...قعدوا سنين كتير محدش فيهم بيشوف التاني...و طول السنين دية هو كان هيموت و يقابلها صدفة...و هي كانت كل يوم بليل تفضل تتفرج علي الصور بتاعتة و تدعي ربنا إنها تشوفة حتي و لو لثانية.....هي منسيتوش...ولا هو كمان نسيها....هما الإتنين تعبوا أوي من غير بعض....طبعاً إنتوا عايزين تعرفوا هما سابوا بعض لية؟؟.....هجاوب عليكوا بسؤال....هوا إنتي سيبتي الولد اللي كنتي بتحبية أوي لية!؟؟ و إنت سيبت خطيبتك اللي كنت بتحبها لية!؟؟ يعني جيتوا علي نورا و أدهم و مستغربين إنهم سابو بعض!!...يا سيدي كلنا نورا و أدهم...بس إحنا اللي مبنبصش لنفسنا...أو بمعني أصح الدنيا مش مخليانا نلحق نبص لنفسنا

المهم كل يوم الساعة ٩ الصبح نورا و أدهم بيبقوا علي كوبري ٦ أكتوبر عشان يروحوا شغلهم...بس هو بيبقي ماشي في إتجاة و هية ماشية في الإتجاة التاني.....نورا و أدهم بيبقوا في نفس المكان و في نفس التوقيت بس للأسف مبيشوفوش بعض مع إن اللي بينهم رصيف ميكملش نص متر

رصيف رفيع أوي هو اللي واقف مابينهم

رصيف رفيع أوي هو اللي مخلي نورا كل يوم ترجع تعيط من كتر ما أدهم واحشها

رصيف رفيع أوي هو اللي خلي أدهم هيموت من كتر ما نورا واحشاة

ياااه علي الدنيا!! ياااااه...خليتهم يحبوا بعض...و يتعودوا علي بعض...و يسيبوا بعض...و بتستخسر فيهم صدفة لمدة ثانية...ثانية هتصبرهم سنين.....أصل الدنيا رافضة....رافضة إنها تخليهم يعرفوا يناموا و لو ل ليلة واحدة من غير بكا.....رافضة و بطريقة رخيصة أوي ...رافضة برصيف...قيمتة نص متر

هي كدا...الدنيا دايماً تلاقيها بترفض اللي إنت نفسك فية و تلاقيها بعد مدة جاية بتعزم عليك بحد إنت أصلاً ملكش فيه...الله! مبتحبش الحد دة.....و يبقي يومك إسود و مهبب لو قلت لأ...تلاقي اسطوانة بتتبطر عالنعمة و النعمة هتزول و بترفص النعمة و جمل كتير لازم تكون محتوية علي كلمة (نعمة)!! و إنت من جواك ولا قاصد تتبطر ولا ترفص ولا نيلة...كل الحكاية إنك بتبقي حاسس إنك لسة ملك حد..فمبتبقاش قادر تبيع نفسك لحد تاني

و أكلمك بصراحة...إنت حتي لو قبلت إنك تبيع نفسك لحد تاني...مش هتقدر..والله ما هتقدر...لإنك ببساطة لسة ما أخدتش تنازل من المالك القديم عن نفسك.....فالحل ساعتها لو حد قالك أي جملة فيها كلمة (نعمة) إنك تنفض خالص و تطلب منة إنة يجيبلك من ال (نعمة) دة واحد بطاطس بالطحينة و واحد فول إسكندراني و علبة مخلل و تاكل و تروح تنام و ولا كأنك سمعت حاجة خالص...عايزاك دايماً تاخد كلمة (نعمة) بمعني (محل الفول و الطعمية)...لأن والله لو خدتها بمعني (إنك تبقي مع حد مبتحبوش) هتلاقي حياتك معاة بقت بتنجان و حمضان كمان...فخليك في الفول و البطاطس الكريمة أنضفلك

نرجع لنورا و أدهم و الرصيف اللي ما بينهم 

 إنتوا عارفين إنكوا ممكن تكونوا في مكانهم و إنتوا مش واخدين بالكوا؟؟ و تبقوا حكاية حد تاني غيري بيحكيها

إنتي عارفة إن إنتي ممكن تكوني في مكان نورا...بيمنعك عن حبيبك رصيف رفيع أوي...أو حتي شارع...و تبقي هتموتي و تلمحية...بس للأسف الدنيا بتبقي مقررة...بإنها تمنعك من إبتسامة هتترسم علي وشك لما تشوفية...من فرحة في قلبك بإنك لمحتية...بتمنعك...و ساعتها بنقول نصيب و عادي جداً

لكن لما إنتي تمنعي نفسك من حد تاني مبتحبهوش...بيبقي رفص نعمة!! مبيسمهوش نصيب..و كلمة عادي بتنسحب 

نورا و أدهم في نفس المكان و (رصيف) مانعهم يشوفوا بعض

ها بقي...تفتكروا في كام (رصيف) مانع ما بينا و بين حد كنا بنحبة و مبقناش معاة.......ها؟؟ كام رصيف؟؟

هو المقال كدا إت publish؟؟

مساء الخير يا أساتذة

أخباركوا اية؟؟

كلو تمام؟؟

طب الحمدلله إن كلو تمام

هوا إنهاردة كام في الشهر صحيح؟؟

٦

معقول!! دا كدا فاضل ٨ تيام عالڤلانتين

طب إية النظام؟؟ جاهزين يا بنات!! شباب حضرتوا نفسكوا؟؟

طبعاً أنا بكلم المصاحبين و المخطوبين..االرجاء من المتجوزين الصمت خالص...قلبي معاكوا والله

الڤلانتين مناسبة غير (شرعية) بالنسبة للمتجوووو....يا نهار إسود!! لأ (شرعية إية بس!!) (شرعية إية!!!) ديليت بسرعة أنا عندي عيال و جوزي قايلي (متتكلميش في السياسة)...طب وبعدين؟؟ ما أهو أنا مش لاقية كلمة تحل محل (شرعية)؟؟ أعمل اية طيب؟؟

طب ما أنا برضو خايفة لحسن يقولولك بتحرض و بتاع...و أنا أساساً مليش في السياسة

طب دا أنا والمصحف قلت نعم عالدستور و غيرت صورة بروفايلي عالفيسبوك و حطيط الصورة الخضرة الجميلة بتاعت (نعم) آه وربنا

طب قشطة أنا هحاول أظبط الدنيا

إنتوا عارفين يا جماعة أنا حاطة لوجو (وزارة الداخلية) باك جراوند عندي عالآيباد...و موبيلي رنتة تسلم الأيادي

ها قشطة كدا؟؟ 

أنا هاكمل بقي و خلاص؟؟ و زي ما تيجي تيجي

لأ...لأ..بلاش..لحسن الداخلية هي اللي تيجي...و تاخدني تفسحني في الكافية الجديد اللي فاتح ورا الشمس..و أنا مليش في الشمس ولا ليا في أوتينج الداخلية..ما أهو أصل أنا مقلقة...أوبااا أنا لاقيت حل جامد جداً

أنا ها أحط نقطة علي حرف ال ع...كدا أضمن برضوا...مش طالباها فرهدة و كافيهات و إقسام 

النقطة هتظبط الأداء

المهم كنا بنقول إن الڤلانتين مناسبة غير (شرغية) بالنسبة للمتجوزين...معرفش لية؟؟ 

لما ييجي الڤلانتين و تقولي لجوزك (ما تجيبلي ورد يا حسين) مثلاً

تلاقي حسين رد و قالك: ورد!! (مع ضحكة إستحقار) ورد إية يا أم ورد!! إنتي كبرتي عالكلام دة خلاص

ورد!! و كبرت!! إية يا مستر سحس؟؟ هيا بتقولك ما تجيبلي تيتينة ولا عضاضة!! بتقولك ورد

ورد يا سيدي ورد

لا إله إلا الله يا أخي في طبعك الهباب

و في المقابل المخطوبين و المصاحبين بيبقوا عايمين في بحيرات الشيكولاتة و الورود

إفرحوا يا إخوانا إفرحولكم يومين....شوية و هاتلبسوا الدبلة الشمال و هتتعاملوا معاملة شمال و يوم الڤلانتين ساعتها هيكون شمال في تاني شمال

و حتي لو...أنا بقول حتي...لو

مستر سحس جاب لمراتة ورد...تفتكر هي بقا هتتبسط؟؟

دية ميسز سحس هتطلع عين أمة خناق...و هتفضل تقولة (ورد!! ورد!! جايبلي ورد بس!! لية هو أنا عاملة الزايدة!! طب هاقول لصحباتي إية!! جوزي جابلي ورد!! ما أهو مش معني إني قلتلك هاتلي ورد..إنك تجيبلي ورد بس!!! دا حسام جوز سلمي أنتيمتي جابلها الڤلانتين اللي فات خاتم ألماظ ٦٠ قيراط...و إنت جايبلي ورد!!) و تقوم ناتشة بوكية الورد من ايدة و حادفاة علي ترابيزة السفرة 

 

و تمشي في الطرقة متجهة إلي أوضتها و هي في الطريق بتفضل تبرطم و تقول: ما أهو أصل أنا الشغالة...طول اليوم بكنس و بطبخ  و أكل ولادة و أودي مدارس و أجيب من مدارس و أذاكرهم...و في الآخر مفيش تقدير!! جوازة زفت...و تختم وصلة البرطمة بدعوة معتبرة علي الشخص المتسبب في الجوازة

و مهما يحاول يصالحها مفيش!! إنسي يا سحس

خلاص عفواً يا معلم لن تستطيع إستخدام هذة الخدمة قبل سداد الألفين جنية تمن هدية الڤلانتين

و طبعاً سحس مبيسددش

فيتحول سحس تلاقئياً إلي القائمة السوداء

هذا هو يوم الڤلانتين نسخة المتجوزين

أتمني من كل قلبي من سحس و عشيرتة..(تاني!! سياسة تاني!!...الله يخرب بيتي!! عيالي هيتشردوا كدا!! طب أعمل إية؟؟ كلمة عشيرتة في سياق الموضوع..أعمل اية!!...آه عرفت..ثانية واحدة بس عشان بغير الباك جراوند بتاعة الآيباد هحط صورة وزارة الداخلية كلها مش اللوجو بس...و نسيت كمان أقولكوا إني كمان حطيت كول تون أغنية إخترنااااك...) إخترناك!! الله يخرب بيتي تاني!  اخترناك إية بس؟؟ لأ دا أنا مصممة إنة أروح أشوف الكافية الجديد...ما أهي مش غلطتي علي فكرة...الأغاني كلها بقت نفس طبلة (إخترناك) !! دي غلطة الطبالين..المفروض كانوا يغيروا (الطبلة)....خلاص أنا بجد إتخنقت جداً جيت أخرج من مشكلة (شرعية) دخلت في مشكلة (عشيرتة) جيت أخرج من مشكلة (عشيرتة) دخلت في مشكلة (إخترناك) قشطة بجد أنا إتخنقت جداً و مش طالباها خروجات و فسح مع الداخلية

أنا هأنهي المقال اللي كلة مشاكل دة

ولا ڤلانتين ولا بتاع

سحس مش هاينفعني لما أروح الكافية الجديد

تصبحوا علي خير

 أنا بفكر أعمل ديليت بقي للمقال دة...مش طالباها حوارات

Done

Publish

Back....Back....Baaaaack

هاتشتمني...هاكتب

إمبارح بليل و تحديداً الساعة ٣ الفجر..لاقيت علي المدونة مجموعة شباب بيشتموني أنا و أبويا و أمي...أه والله...مجموعة من الشتايم قذرة موجهينها ليا...ليا كا بسمة...و لوالدى و والدتي...الشتايم مكنتش لأسلوب كتابتي أو لمقالاتي

إتضايقت جداً....فضلت والله العظيم أبكي لحاد ما الصبح طلع عليا....و خدت قرار إني مش هاكتب تاني خالص...لإني أوتجعت أوي من الشتايم اللي إتوجهتلي......قررت إني أهرب...كان لازم أهرب...ما أنا برضو بنت و ليا عيلة و عندي بنت...مش هينفع بنتي تلاقي مامتها بتتشتم و يتخاض في شرفها بالطريقة المهينة دية...قلت لأ خلاص بقي

قلت لنفسي ما أنا بكتب من و أنا في أولي إعدادي..و بأحتفظ بكتابتتي لنفسي...فقررت إني هرجع أكتب لبسمة و بس...و آخري أقراهم لصحابي لما أكلمهم في التيليفون أو لما أخرج معاهم....بس من جوايا كنت مش موافقاني...اه والله مكنتش موافقاني إني أسيب حاجة بحبها عشان ناس شتمتني!..بس برضو مكنتش قادرة أكمل و أفضل أتشتم!....بس عارفين..أنا والله العظيم وحيات بنتي اللي معنديش في دنيتي أغلي منها...مفيش حاجة بتبسطني في الدنيا دية كلها غير الكتابة....الكتابة وبس....عارفين لية؟؟ لأني طول الليل و النهار ببقي متضطرة اضحك و أجامل و أمثل و أنافق...أما هنا...في المدونة....فببقي أنا

بس إحساسي إني بطلع اللي جوايا و إن فية ناس بتقراة خلاني أنتصر علي نفسي...خلاني أحس بإن كل مشاكلي بتتحل...لإني طلعتها من المخبأ اللي جوايا و قلتها بعلو صوتي....مش مجرد كتبتها في نوتة محطوطة علي طرابيزة الليڤينج و محدش بيقراها غيري أو أي حد مزنوق في ورقة ففتح النوتة بالغلط

مكنتش موافقة إني أرجع أكتب لنفسي و بس....مكنتش موافقة إني أرجع سجينة في زنزانة (أنا بضحك و فريش)...كنت خلاص إتعودت علي حرية مشاعري...كنت مبسوطة أوي بإني بقول أنا حاسة بإية....كنت مبسوطة لما كنت بكتب حاجة و آلاقيها عجبت حد...حسيت إن ليا قيمة...خصوصاً إني من وقت ما إتخرجت من الجامعة مشتغلتش خالص...لأني أول ما إتخرجت إتخطبت و إتجوزت علطول...و بعد الجواز بنتي جت علطول...فمشتغلتش...مكنتش عارفة والله يعني إية إني أحس إني شخص...إني كيان...إني بإختصار إنسانة مش جماد

إحتياجي لشعور (إني أكون أنا) خلاني أقرر إني أعمل مدونة...وأكتب للناس...مش لبسمة بس

و بقيت كل يوم بليل أدخل أكتب عليها

ولو في يوم كنت زعلانة و بداري العياط بضحكي مع كل اللي حواليا...كنت لما بدخل بليل عالمدونة...كنت بأكون أنا...أنا زي ما أنا...زعلانة و بعيط...و بأرمي التمثيل و النفاق في الزبالة...بأكون أنا

لحاد إمبارح بليل...لحاد ما إتشتمت و إتهنت بأقذر الألفاظ

بكيت...والله بكيت...بس معرفتش ساعتها أعمل اية

معرفتش أعمل اية!! ما المكان الوحيد اللي كان بيهون عليا... ممنوع عليا دخولة

والله فضلت أعيط...كنت محتاجة أوي اني أفتح البلوجر أبليكشن و أكتب و أقول إني موجوعة من الألفاظ اللي إتقالتلي...كنت عايزة أعتذر لوالدي و والدتي اللي إتشتموا بسبب كتابتي...كنت عايزة أقولكوا إني زعلانة أوي....بس معرفتش

مقدرتش والله مقدرتش

مقدرتش لإني قررت إنة خلاص...مش هأكتب تاني في مدونتي

خلاص أنا منعت نفسي مالمدونة

و دخلت علي الأكونت بتاعي علي الفيسبوك و كتبت إني (سأترك الساحة لشخص محارب و قوي)...لإني ببساطة إتهزمت

و نمت...نمت الساعة ٨ الصبح...نمت و والله العظيم والله العظيم و مخدتي كانت غرقانة من عياطي...مش بس من الشتيمة...لأ عياطي كان لإني منعت نفسي من إني أكتب...عياطي كان لإني إتسجنت تاني...سجنت نفسي جوا نفسي لإني متحملتش الإهانة القذرة دية..ما هو مكانش قدامي إختيار...ما أهو يا إما أحرر نفسي من سجن نفسي و أفضل أتشتم أنا و والدي و والدتي...يا إما أعيش في هدوء و إحترام بس هاكون مسجونة....وقتها فضلت الأختيار التاني...فضلت إني أفضل طول الأسبوع و الشهر و السنة مجرد صورة مهرج

صحيت الساعة ١١... صحابي البعاد و القريبين...بعتنلي كلام جميل أوي..لاقيت جوزي و أبويا و أمي بيقولولي (أوعي تسيبي الكتابة)..بالرغم من إنهم كانوا معارضين لمبدأ إني أكون كاتبة (خوفاً عليا)......فرحت أوي

و إبتسمت...عارفين الإبتسامة اللي بتيجي وسط الدموع...الإبتسامة دية اللي بتفرض وجودها علي حزنك...الإبتسامة اللي بتأمر دموعك بإنها تقف

الإبتسامة دية بسببكوا كلكوا والله

شكراً جداً لكم يا أنقي و أجدع أهل و أصحاب

شكراً جداً لكل قارئي المدونة

شكراً جزيلاً

إنتوا والله خلتوني أخلي سبيل نفسي من نفسي

خلتوني أفرج عن (بسمة السباعي) بضمان تشجيعكوا و دعمكوا الرائع ليها

شكراً لكم

 

رسالة أخيرة للأساتذة اللي شتموني أنا و والدي و والدتي 

من هنا ورايح كل يوم هبقي البلوج  و اللي عايز يشتمني يتفضل براحتة....شتيمتكوا ليا حقيقي والله العظيم قوتني...و سأدع الكلاب تهوهو براحة راحتها...الأساتذة الشتامين فلتُكملوا نقاشكم و نقدكم لي بلغة الكلاب..الهوهوه يعني