عن صياعة و دهاء أهل العروسة سأتحدث
عن ملاوعة أهل العروسة سأتحدث
عن أڤورة أهل العروسة سأتحدث
الحوار منقول من داخل بيت أهل (هناء) العروسة
أبو هناء: خدي يا بنتي صورة القايمة أهي اديها لخطيبك عشان يراجعها علي مهلوا
هناء: حاضر يا بابا
أم هناء: صورة قايمة إية اللي تديهالوا!! إنت إتجننت يا راجل إنت!؟؟
أبو هناء: إية يا أم هناء!! إية المشكلة يعني!! آه تديهالوا...حقوا
أم هناء: حقوا!! جاك كسر حوقوا!! قال حقوا قال
هناء: في إية بس يا ماما؟؟
أم هناء: فية إن أبوكي إتجنن!! عايز يدي لخطيبك صورة القايمة يقعد يفصص فيها و يوريها لمحامي...دا غير بقي أمة الحرباية!! تفضل تقولة لأ خليهم يشيلوا دة و يحطوا دة
هناء: طيب يا ماما و إية المشكلة؟؟
أم هناء: فين المشكلة!! يا بت إنتي هبلة ولا شكلك كدة
هناء: يا ماما محمد قالي إنة عايز يشوف القايمة و إنة مش هيمضي علي حاجة غير لما يراجعها كويس
أم هناء: يشوف إية و يراجع إية يا بت يا هبلة إنتي! دا لو خادها و وداها للمحامي ولا الولية العقربة أمة شافتها مش هيرضي يمضي طبعاً...دا إحنا كاتبينلة قايمة ب ٧٥٠ ألف جنية..و هو محلتهوش اللضا أساساً....دة لو شافها مش هيمضي...إنما بقي لو سمعتي كلامي هيمضي...و لما يمضي هيمشي تحت رجلك...يعني مالآخر كدة لو فتح بقة و ضايقك وحيات غلاوتك لا القايمة تودية في ستين داهية...و ساعتها بقي هيعملك ميت ألف حساب
هناء: طيب ما أهو كدة كدة لو شافها و هو بيمضيها مش هيرضي يمضي...ساعتها بقي إحنا هنعمل إية؟؟
أم هناء ضحكت ضحكة خبيثة و قالت: لأ ما أهو مش هيشوفها
هناء: مش هايشوفها!! دا ازاي يعني؟؟ هنخطفة و نمضية؟؟ ولا هنشربة حاجة أصفرة و نمضية؟
أم هناء: أنا معرفش إنتي طالعة هبلة لمين؟؟ يا خسارتك والله كان نفسي تطلعي زيي
بصي يا سيتي....إنتي هتفضلي تعومي معاه موضوع القايمة دة....يعني كل ما يقولك (عايز أشوف القايمة) تردي و تقوليلة (حاضر يا حبيبي)...فهمتي؟؟
و احنا بقي هنعمل نفسنا ناسيين موضوع القايمة دة
وهو طبعاً ما هيصدق إن إحنا مبنجبلوش سيرة القايمة
و إنتي هتفضلي تتوهي فية لحاد يوم الفرح
و لما ييجي يوم الفرح....و تلبسي فستانك و تتأنتكي
و ييجي لحاد باب أوضتك عشان ياخدك..ساعتها بقي سيبيهولي
هناء: هتعملي فية إية يا ماما؟؟
أم هناء: يوة يا بت هو أنا هاكلة!! متخافيش علية كدة...داهية تشيلك إنتي و هوا
أنا بس هفتحلة باب الأوضة...و أقولة: أدخل يا محمد يا إبني عايزاك
و لما يدخل هطلعلة القايمة و أقولة إمضي بقي قايمة (هنونة) حبيبتك
طبعاً هيعترض و هيفضل يزعق...بس مش هيقدر ميمضيش
مش هيضيع الفلوس اللي دافعها في الفرح...ولا الفلوس اللي دافعها في شهر العسل...ولا هيقدر ينزل يمشي قرايبة
هيمضي و رجلة فوق رقابتة...و حياتك ليمضي
و في اللحظة دي و مع نهاية خطة أم هناء لتدبيس محمد في القايمة أم ٧٥٠ ألف جنية إنسحب أبو العروسة و هو يتمتم قائلاً: حسبي الله و نعم الوكيل...أستغفر الله العظيم...ولية جبارة ربنا يهدك يا شيخة
هذا الحوار يدور بداخل ٨٥٪ من بيوت أهالي العرايس
و فعلاً الخطة اللي بتحطها أم العروسة بتمشي عنب
و العريس بيمضي
بس للأسف علاقة العريس مع أهل مراتة بعد الفرح بتبقي سيئة جداً....لإنة مبينساش القفا اللي خدوا من أهل مراتة
و بتفضل العلاقات سيئة و في تصاعد مستمر إلي أن تنقطع
و بتفضل البنت في النص محتارة بين أهلها و جوزها...مبتبقاش عارفة ترضي جوزها ولا أهلها
و حقيقي والله مفيش أوحش من الإختيار بين الأهل (الأم و الأب) و الزوج
القايمة شرعاً هي حق الزوجة...بس لما تبقي قايمة عادلة....قايمة معمولة بغرض حفظ (حق الزوجة).....و بكرر....(حق الزوجة)....حفظ حق الزوجة
لكن للأسف الشديد القايمة الزوجية بقت تتعمل بغرض إرهاب الزوج....بغرض تهديد الزوج...القايمة بقت تتعمل لإخراس الزوج...مالآخر القايمة بقت كلبشات للزوج
القايمة الحديثة معمولة لضمان حق (مش من حق الزوجة أصلاً)!! تلاقي القايمة مكتوب فيها حاجات مش موجودة في البيت أساساً...و حتي الحاجات اللي موجودة بيبقوا كاتبين جمبها أسعار هلامية...أسعار مش حقيقية...دا بالإضافة إلي إن فية شوية حاجات بيكتبوها في القايمة بتجيب (حساسية موسمية) مثلاً زي: ماكينة بيتيفور....عدد ٤ قطاعة كوكيز متكونة من شكل قلب و نجمة و قمر هلالي الشكل و مثلث متساوي الأضلاع...ملاحة علي شكل طباخ...مريلة مطبخ منقرشة...ساعة محتوية علي بطاريتين قلم (إنرجايزر)....خلل سنان...عدد ٧٥ مشبك غسيل منقسمين إلي ٣٠ مشبك لونهم أزرق سماوي و ٤٥ مشبك أصفر كتكوتي
طب دا يرضي ربنا دة!! ينفع كدة بجد والله!!...بيكتبوا مشابك الغسيل...لأ و (كتكوتي) كمان!! طب دول بيعملوا قايمة ولا بيهرجوا!! لا بجد!! إية الهلس دة
يا أساتذة...القايمة اللي إنتوا بتقولوا عليها (حق الزوجة شرعاً) مبتبقاش كدة!! ما أهو اصل شرع إية اللي يخليكوا تكتبوا مشابك كتكوتي و سماوي و بطاريتين إنرجايزر و قطاعة كوكيز!!! طب إفرضوا المشابك ضاعت!! ولا قطاعة الكوكيز ولعت!! تودوا بقي الراجل في داهية بتهمة (تبديد قايمة المنقولات الزوجية)!! ....ولو حصل و مفيش حاجة ضاعت...المبلغ الخزعبلي اللي إنتوا مبتبقوش صرفتوا نصة اللي إنتوا كاتبينها في القايمة دا حق بنتكوا!! إنتوا صرفتوا المبلغ دة أصلاً!!..أصل دي كدة مش قايمة خالص...دا وصل أمانة
للتوضيح أنا مش معترضة علي (القايمة العادلة) خالص....أنا معترضة علي سلوك أهل العروسة في كتابتهم للقايمة و طريقتهم المبتذلة مع العريس في تدبيسة و إجبارة علي إمضاء القايمة....للأسف والله أهالي كتير جداً بيتبعوا السلوك دة....بيكتبوا قايمة بمبلغ مالي أضعاف أضعاف أضعاف اللي هما صرفوة و بييجوا يوم الفرح و يفاجأوا العريس...و يا تمضي يا مفيش جواز و إلبس بقي إنت في فلوس الفرح و في المعازيم
أنا معترضة علي السلوك العدواني المتمثل في (قايمة ب تريليون ألف جنية) اللي بيلجألة أهل العروسة بغرض تأمين مستقبل بنتهم....أصل معلش...عمر الفلوس ما كانت...ولا عمرها هتكون أمان لبنتك
إنت كا أب أكبر أمان...لبنتك
إنتي كا أم أكبر أمان...لبنتك
وجودكوا معاها هو الأمان ليها....وجودكوا جمبها هو اللي هيخلي جوزها يحترمها و يشيلها فوق راسة
و معلش والله هو إنتوا لما تبقوا مهددين جوز بنتكوا...لما يمشي جمب الحيطة لإنة خايف لتاخدة حاجة مالبيت و تيجوا تبلغوا عنة إنة بدد و أهدر....حلو كدا؟؟ لا والله بجد هتكونوا مبسوطين!! و لما يكون كويس مع بنتكوا لإنة خايف من القايمة...دية بقي حاجة كويسة!! ولما يبقي مش عايز يطلقها لإنة خايف من القايمة أم ٥٠٠ ألف جنية...دية حاجة حلوة؟؟ حاجة تبسط يعني؟؟
بلاش تخلي جوز بنتك يبقي متمسك بيها لإنة معهوش فلوس يدفع مؤخر أو حتي يبقي متهدد بقايمة! خلوة يبقي متمسك بيها عشانها هيا
لما يبقي عايزها و متمسك بيها بالرغم من عدم وجود قايمة ولا مؤخر...إنتوا كدا هتبقوا حققتولها الأمان
بلاش تخلوا بنتكوا تبدأ حياة بوصل أمانة ظالم متنكر في هيئة قايمة
بلاش تخلوا بنتكوا تبني في حياتها علي أساس مغشوش......لإن ببساطة الأساس دة هو اللي هيشيل سنين حياتها كلها
حيات بنتكوا تستاهل أساس صح
و فككوا بقي من المشابك السماوي و الكتكوتي
يلا تصبحوا علي ألف خير
