أخواتي الأفاضل البنت المصرية من يوم ما بتتولد لحاد ما تموت و هي مُكبلة و مسجونة في سجن العادات و التقاليد واللي يصح
واللي ميصحش و كلام الناس و أهلها و جوزها و أهل جوزها و ولادها و أجواز ولادها...و هكذا
إنهاردة أنا هتكلم عن موضوع: أتطلق إمتي؟؟
البنت تتجوز شاب جميل و أمور...بعد الجواز يظهر علي حقيقتة...يضربها و يهينها أو يخونها أو يطلع حشاش مثلاً...فالبنت تعوز تطلق....فأهلها و الناس اللي حواليها يقنعوها بإن (أول سنة) في الجواز بتبقي صعبة و إن بعد كدة الدنيا هتروق و تحلي...و برضو تصمم عالطلاق....فا متعرفش تطلق
عشان هية شابة و عندها ٢٦ سنة فا مش هينفع تحمل لقب (مُطلقة)!!! شابة و صغيرة وحلوة و مُطلقة في بداية جوازها الناس تقول عليها إية (معيوبة)!! لأ إزاي لازم تكمل الجوازة لحسن الناس تاكل وشها! فتفضل عايشة مع جوزها كام سنه كمان فتحمل و تخلف...و مع تعب و أرف العيال بتحس إنها خلاص مش قادرة تستحمل جوزها بالرغم من أن (أول سنة) الصعبة اللي أهلها قالولها عليها بقت (أول ١٠ سنين)!! و هو لسة زي ما هو...و الدنيا ولا راقت ولا حليت!!..و هية كمان خلاص عمرها عدي التلاتين...فتقدر تعمل اللي كان نفسها فية و تطلق.....فا متعرفش تطلق
عشان عندها ولاد فا مش هينفع ولادها يحملوا لقب (ولاد المتطلقة)!!!....فتكمل لف في الساقية...و تستحمل...و تكبر عيالها و تجوزهم...و تحس إنها خلاص بقي عملت كل اللي عليها...وصلت إبنها بيتة مع مراتة و وصلت بنتها لبيت جوزها.....فا زي ما تقولوا كدة بتبقي خلاص بقي عايزة ترتاح...بقالها سنين مستحملة...أظن حقها ترتاح شوية...فتعوز تتطلق...فا برضو متعرفش تطلق
عشان جوز بنتها و مرات إبنها مينفعش يحملوا لقب إنهم مناسبين من (عيلة مطلقة)!! فتستحمل عشان خاطر عيالها...و تفضل متعذبة لحااااااد ما لا نهاية
أنا نفسي والله أي حد....يجاوبني
ما هو التوقيت المناسب للطلاق؟؟
لا بجد والله
البنت لما تعوز تطلق...تطلق إمتي؟؟؟
الله يا جدعان...البنات مش عارفين يطلقوا إمتي
ييجوا يتطلقوا
أول الجواز: لأ كلام الناس و أصبري شوية
بعد مرور سنتين: يا بنتي دا إنتي بنتك علي إيدك و لسة بترضع!! دا علي أساس إن الأب هو اللي بيرضع!! شئ عجيب والله
بعد مرور ٦ سنين: الرضيعة كبرت و إتفطمت و بقت طفلة...لأ أصل العيال صغيرين و محتاحين أبوهم
بعد مرور ٢٥ سنة: العيال علي وش جواز..ما تصبري لحاد ما يتجوزا..إنتي إية!! عايزة تفضحيهم!! عايزة نسايبهم يعايروهم
بعد مرور ٣٥ سنة: ولادها إتجوزوا و راحوا بيوتهم و خلفوا...هو إنتي جاية دلوقتي بعد ما بقيتي جدة و عايزة تطلقي!! يا شيخة عيب علي شعرك الأبيض!! و بعدين دا إنتي حاجة!! حاجة!! و يزخرفوا كلامهم ب (هو إنتي ملحوقة و متصربعة عالطلاق لية!! خلاص يعني العريس واقف عالباب!!...يا حاجة دانتي ماما ستو) و في آخر الكلام يقولوها: ما كان من الأول...عايزة تطلقي كنتي إتطلقتي من الأول...كنتي ساعتها عرفتي تعملي حياة تانية و بيت تاني...إنما جاية و إنتي عمرك ٥٩ و عايزة تطلقي...يا شيخة إستهدي بالله و قومي صليلك ركعتين
لا تعليق!! بجد والله لا تعليق
قال إية..كنتي إتطلقتي من الأول...يا ولاد اللذينا ما هي قالت من الأول (عايزة أتطلق) و انتوا قلتلها لأ و انتي شابة وكلام الناس....و إستحملت كل دة و في الآخر قولتولها برضو لأ و إستعنتوا بعبادة (الحج) اللي هي عملتها و الشعر الأبيض عشان تقنعوها إنها متطلقش!! دا علي أساس إن الطلاق هيلغي الحجة و هيصفر شعرها
أنا نفسي والله أعرف البنت اللي عيشتها مع جوزها مستحيلة و عايزة تطلق...تطلق إمتي؟؟
و هل مباح الطلاق في سن مبكر؟؟
هل المعتمرة (اللي عاملة عمرة) و جوزها بيخونها مثلاً هل يجوز لها الطلاق؟؟ أم العمرة اللي هي كانت عملاها هتسقط؟؟
و هل صاحبة الشعر الأبيض مباح لها الطلاق؟؟
حقيقي مجتمع عقيم...معندوش طموح إنة يتعدل
مجتمع أصدر قرار إن الطلاق ميتمش...غير لو الراجل هو اللي طلق!! لكن البنت تطلبة...بيكون فية ألف مانع و مليون إعتراض
مجتمع شايف إن طلاق البنت فضيحة
أنا مش بشجع حد إنة يتطلق...أنا بس نفسي إننا نبقي مزودين بثقافة إستيعاب المُطلقة الشابة و المُطلقة الحاجة اللي شعرها أبيض
والله مفيش أوحش من إننا نحرم بعقليتنا المتأخرة اللي ربنا أباحة و قال علية حلال
شعب بينسي كتاب ربنا في اللي علي مزاجة ...و يرجع يفتكرة في اللي علي مزاجة
إتبع دينك و سنة رسولك
و نفض خالص لأقوال تيتة و جدو و عمو حسين جارك الحِشري و طنط فيفي قريبتك النمامة
ربنا اللي هيحاسبك...مش الناس
إرضي ربنا...مش الناس
إعمل اللي يريحك...مش اللي يريح الناس
لإنك ببساطة إنت اللي هتبقي مبسوط أو قرفان...مش الناس
أصل دي حياتك...مش حيات...الناس
بسمة السباعي
