من إمبارح و أنا مش عارفة أبطل تفكير في أطفال القمر...حقيقي والله متضايقة جداً عليهم
و أخدت وعد بيني و بين نفسي
و قررت إني أكتب الوعد دة عالمدونة...عشان يبقي قدامي...عشان خايفة أغير رأيي...فقلت لما أبقي قلتة قدام ناس كتير هيبقي حافز ليا إني أنفذ وعدي
وعدي إن
أقسم بالله العلي العظيم وحيات بنتي اللي معنديش في دنيتي كلها أغلي منها إن فلوس أرباحي من أول كتاب هانشرة بإذن الله...هاساعد بيها كلها في تحقيق حلمهم....قرية مغطاة صغيرة.... مليانة جناين و مراجيح و زحاليق ....و فيها بيسين كبير...و جوا القرية مدرسة صغيرة عبارة عن فصول إزازها شفاف بيبص عالجناين...و محلات لعب...و عيادة طبية مجهزة....و بيوت من اللي ليها حيطان...و شبابيكها إزاز عشان يشوفوا البسين و الجناين....و هناك هيعيشوا أحلي حياة
هيصحوا الصبح...يروحوا المدرسة بالعجل بتاعهم...و يخلصوا مدرسة يطلعوا عالمراجيح و الزحاليق اللي مشافوهاش غير في التليفزيون...و في الأجازة يروحوا بقي يعوموا في البيسين
أصل للأسف والله أنا مبشتغلش عشان أتبرع شهرياً بجزء من مرتبي و أساعد بية...بس والله العظيم أنا إبتديت أحوش...جبت صندوق و حطيتة في البيت عندي و إبتديت أحط فية فلوس ل (قرية أطفال القمر) طبعاً ملحقتش أحوش فية فلوس كتير...بس والله أنا متفألة جداً
أنا عايزة أقولكوا إن أول فلوس إتحطت في الصندوق كانت (٢جنية)....ال (٢ جنية) دول من بنتي (مليكة).....مليكة فتحت الحصالة بتاعتها اللي سبق و قلتلكم إنها منطقة عسكرية بالنسبة لها و لو حد مننا قرب لحصالتها بتضربة بالعجلة أو بالسكوتر..علي حسب اللي بيبقي جمب إيديها...شكراً يا مليكة يا حبيبتي...مليكة لما عرفت القصة بتاعة الأطفال اللي عايزين نوفرهم نادي و مدرسة قالتلي (ونبي يا مامي سموا النادي دة چودي)...عايزة أقولكوا إن مليكة بتطلق الإسم دة علي كل حاجة حواليها...لدرجة إنها مسمياني أنا شخصياً..چودي
المهم أنا كنت عايزة أرجع بيكو للحظة اللي قبل ما مليكة تقتنع و تفتح حصالتها و تحط في الصندوق ال (٢ جنية)....مليكة سألتني (هو إحنا لية هنحوش فلوس يا مامي؟) فحاولت أحكيلها الموضوع بطريقة بسيطة عشان تقدر تستوعب فقلتلها (فية أطفال صغيرين نفسهم يروحوا المدرسة و يروحوا يلعبوا في النادي بس مش عارفين لأنهم عيانين أوي و مش معاهم فلوس يجيبوا الدوا...فعشان كدة إحنا بنحوش فلوس عشان نجيبلهم الدوا)...فسكتت و قالتلي (طب ممكن يا مامي نروح نجيبهم بالعربية و نخليهم ييجوا النادي يلعبوا معايا؟؟ وممكن كمان يا مامي نخليهم ييجوا معايا المدرسة بتاعتي؟) قلتلها ( لأ يا مليكة يا حبيبتي مينفعش عشان هما عيانين أوي أوي ولازم يبقي ليهم نادي لوحدهم و مدرسة لوحدهم) فضلت مستمرة في الجدل و ميت ألف كلمة (لية)....فإترفزت طبعاً و قلتلها (مليكة إخلصي...هتحطي فلوس في الصندوق ولا لأ؟؟؟) فقالتلي (آه هاحط)..و فعلاً راحت فتحت حصالتها و حطت ( ٢جنية) فئة ٤ تنصاص
و بعد أكتر من ٨ ساعات متواصلة من سؤال (ها يا مامي جبتي الدوا و النادي للأطفال بالفلوس اللي حطيتها في البوكس؟) ها يا مامي؟؟ ها يا مامي؟؟؟ ها يا مامي؟؟؟؟ ها يا مامي؟؟؟ ها يا مامي؟؟
فتحت الصندوق
و رجعت لمليكة الإتنين جنية بتوعها و قلتلها (آه يا حبيبتي جيبتلهم الدوا و النادي بالفلوس اللي إنتي حطيتيها في الصندوق و دول الباقي) حقيقي الزن لا دين لة
و المصيبة إنها مرضيتش تاخد الفلوس و قالتلي: لا لا يا مامي خليهم يمكن يعوزوا يشتروا لعب ولا إسكوتر
يا أهل الخير ملاقيش بقي حد يتبرع في الصندوق بس ميكونش زي مليكة؟؟
