ها يا جدعان كلو حضر الأقلام الفرنساوي الزرقا؟؟ كلو حضر العيل اللي هيبقي شايلة علي إيدة عشان يشحت علية و ياخد إستثناء و يحتل دور الناس اللي جايين قبلوا و يدخل لجنتة زي الباشا؟؟ طب ها كلو حضر نفسة عشان يتخانق و يسب و يلعن في الناس اللي هيكونوا عكس رأية؟؟
أنا عن نفسي حضرت قلمي الازرق...و لبست بنتي طقم الإستفتاء...و محضرة قاموس مكون من (إنت: فلول-إخواني-ربعاوي-دخيل-عميل) كدا تمام؟؟
خلينا نتكلم شوية عن الإستفتاء ذو طابع صنع في مصر
من أهم نوادر الإستفاءات دي... طابور الرجالة...طابور الرجالة بيبقي ٩٠٪ من الرجالة اللي فية من نوعية (الأب الحنين المثالي)...بمعني إنة في الأيام العادية اللي مفيهاش إستفتاءات تلاقي الراجل من دول طول اليوم في الشغل و لما يخلص الشغل يطلع علي القهوة و يخلص القهوة يطلع عالبلاي ستيشن و في الآخر يروح يناااام قتيل و ميشوفش خلقة عيالة أصلاً...لكن في الإستفتاءات...الأب دايماً شايل عيالة فلذات كبدة...آه والله...لأ و تلاقيه أساساً آخر مرة شاف عياله في الإنتخابات الرئاسية اللي فاتت لما خد الواد ولا البت عشان ينجز و ميقفش في الطابور...والله منظر الراجل اللي واقف في الطابور و شايل العيل علي كتفة بيخليني أقول اللهم إجعل كل أيامنا إستفتاءات...آميييين...و أهو كلو عشان الستات ترتاح شوية...المهم إن كل طفل بكرا يشوف راجل شايلة ميتخضش..دا باباك يا حبيبي...دا باباكي يا حبيبتي..متخافوووش يا حبايبي
والله حوار الإستفتاءات و الإنتخابات اصبح فرصة مثالية لجمع شمل الآباء و الأبناء...عمار يا مصر يا مجمعة العيال و ابوهم...عمااااار يا غالية
هتقول نعم ولا لأ؟؟
أنا هبتدي كلامي ب اليُفط العريضة اللي مرشقة عالدائري بتاعت إستفتاء الدستور في ١٤-١٥ يناير يعني (نعم) لثورة ٣٠ يونيو و ٢٥ يناير
سأنتقل من اليافطة العريضة إلي الإعلان الرااايق اللي قلبة قاسي أوي أوي اللي بصوت الإعلامي الكبير طارق نور اللي بيقول فية للناس ينزلوا يشاركوا في الإستفتاء (وبصوت واطي قولوا نعم)تأييداً للثورتين قدام العالم كلة و في نهاية الإعلان طارق نور قام مشغل خاصية الإشعال الذاتي عشان يسخن الناس...وقام قايل (العالم كلو منتظر يشوف مصر هتقول إية) بس هو لو كان ناصح و كان عايز يسخن الناس صح كان إستبدل كلمة (العالم) ب (قطر و الجزيرة و أوباما منتظرين يشوفوا مصر هتقول إية) كدا الناس هتجري أسرع نحو لجان الإستفتاء و شغاااااال يونيڤرسااال
مع العلم إني هأقول (نعم) للدستور
لكن أنا أرفض و بشدة مبدأ الإحتلال الفكري دا...اللي هوا التصوووويت ب نعم...نعم...تفتح راديو تلاقي نعم للدستور...تفتح تلفزيون تلاقي نعم للدستور...تمشي في الشارع تلاقي يفط نعم للدستور...دا بجد إحتلال و رسمي كمان....مينفعش يا جماعة كدا...والله مينفع...المفروض يكون في توعية سليمة للشعب المصري عن طريق إعلانات و يفط بتوضح للناس مواد الدستور و بطريقة بسيطة جداً و أعتقد إن الشعب المصري كلو بقي محنك سياسياً و هيفهم...أصل كلمة قول نعم دي عشان تؤيد الثورتين فكرتني بإخوانا اللي كانوا بيقولوا اللي هيقول (نعم) هيروح الجنة...مبدأ الإحتلال الفكري دا مرفوض تماماً
فاكرين إعلان بتاع محمد رضا الله يرحمة بتاع (طول ما ندي ضهرنا للترعه عمر البلهارسيا في جتتنا ما ترعا) فاكرينة
أهو الإعلان دا أقسم بالله عشرة علي عشرة
عارفين لية عشرة علي عشرة؟؟
لإنة وصل للناس معلومة ان الترعة مضرة بطريقة غير مباشرة
إنتوا بقا مكنتوش عارفين تعملوا إعلانات للدستور زي الإعلان البسيط دا؟؟
لية بتوجهوا الناس لإنهم يقولوا نعم بالأمر المباشر
مع إنكوا تقدروا تخلوا الناس تقول نعم عن طريق إنكوا تفهموهم
لكن للأسف الشديد جزء كبير أوي من الناس اللي نازلة تقول نعم نازلين كدا و هما مش قاريين في الدستور ولا حتي سطر واحد
المهم أرجع لموضوعي
أيها المواطنون الشرفاء وحيات أبوكوا رفقاً بالمنتقبات و الملتحين
الله يخليكوا
بلاش بصات الإستحقار اللي ناويين تبوصهالهم بكرا في الطوابير
كل واحد حر في رأية
محدش لية دعوة بحد
هما عاملين في ورقة الإستفتاء نعم و لا
منجيش إحنا بقا و نشلق للي هيقول عكس رأينا
كل واحد حر
أنا والله أتمني إن إستفتاء ١٤ و١٥ يتم بسلاسة و من غير خناقات ولا واحد يمسك في دقن ملتحي و يقولوا خد ياض يا إرهابي يا إبن ال**** ولا واحدة تمسك في خناق واحدة منتقبة و تقولها يلا يا بيييت يا ربعاوية
هقولها تاني..كل واحد حر في لبسة و في دقنة و أخيراً في رأية
تحلوا بأخلاق الرسول (علية أفضل الصلاة و السلام)...تحلوا بأخلاقة الكريمة و سماحتة
و أهو بدل ما إنتوا عمالين تكتبوا و تشيروا بوستات عن المولد النبوي و نازلين لغ في السمسمية و الملبن أبو عين جمل...خليكوا كويسين في يومين الإستفتاء دول وحيات النبي يا أخوانا
و أهو فرصة أنا شايفة الناس علي الفيسبوك متأثرة بالمولد النبوي أوي
وإستغلالاً مني لهذا التأثر عايزة أقول كلمة أخيرة
أرجو من السيدات و السادة اللي نازلين الإستفتاء علي الدستور الآتي
أولاً : الإلتزام بالدور
ثانياً: بلاش رخامة و تباتة علي إخوانا الملتحين و أخواتنا المنتقبات
ثالثاً: إملا جيبك بحلويات المولد النبوي عشان كل ما نفسك توزك علي جر شكل حد تقوم رازع حتت ملبن من بتاعة المولد في بقك فتتكتم...و لما تبلعها إفتكر
إن في ذكري مولد الرسول الكريم أن تحلي نفسك بأخلاق سيدنا محمد علية أفضل الصلاة و السلام
مش تحلي بقم بحلوي مولد النبي بتاعة العبد و خلاص علي كدا
لأ..إفتكر أخلاق رسولك
إفتكرها
و خليك كويس
و انت حر...قول لا...قول نعم
كدا كدا النتيجة هتكون....نعم...نعم
نعم يا مليكة عايزا إية؟؟
معلش قطعت كلامي معاكوا... أصل بنتي كانت بتندهلي
المهم كنت بقولكوا إن كدا كدا النتيجة هتكون زي ما الأغلبية هتقول
أشوفكوا بكرا إنشاءالله...و سأحدثكم من داخل طابوري اللي في المقطم
صباحكوا منجا
