ثورة بالصدفة
تعرفوا إية عن ثورة ٢٥ يناير؟
إنها ثورة شعب علي نظام فاسد
أيوا يعني كلموني شوية عن الثورة يا أخوانا هو الكلام بفلوس؟؟
طيب ماشي...بصي يا سيتي ثورة ٢٥ يناير
قامت عشان الشعب كان طلعان عين أمة قهر و جوع و فقر و مرض
قامت لإن الشباب مكنوش لاقيين شغل
قامت عشان نوفر لساكني العشوائيات بيت بسيط
قامت عشان الوزارات كلها كانت فسيخ
قامت عشان نقول لا لتوريث الحكم
قامت عشان نرجع آلاف المعتقلين السياسيين لبيوتهم
قامت عشان التزوير اللي كان مالي البلد
قامت عشان نلاقي مكان يأوي أطفال الشوارع
قامت عشان البلد تتنفس حرية و ديموقراطية
قامت عشان النظام كان ضعيف و ذو أيدي مرتعشة
قامت عشان الداخلية قتلت خالد سعيد
قامت عشان نعيش بقي
آااه قلتلي...هي الثورة بقي قامت عشان كل ما سبق دا؟؟
طب إسمعني بقي..هاتسمعني ولا هتقول عليا فلول؟؟ قشطة أنا مش هيفرق معايا أوي لقب (فلول) لإن الألقاب فقدت هيبتها من ساعة ما بقي الحرامي يتقال علية (باشا) و الرقاصة بيتقال عليها (هانم)...فا موضوع الألقاب دا مبقاش يأثر فيا خالص
أنا هأقول رأي اللي أنا مقتنعة بية و اللي أكيد مش هيعجب ناس كتير بس أصل انا مش عشان أزود عدد اللايكات و الكومنتات فا أقوم كاتبة كلام اللي مع الموجة....أنا مبقللش من ثورة ٢٥ يناير بس كل الحكاية إن مشهد نزول الناس إنهاردة احتفالاً بذكري الثورة التي لم تحقق مطلب واحد من مطالبها حسيسني بأني مش وطنية و إني مش شايفة أفضال الثورة الرهيبة اللي مغرقانا في خيرها
أنا مش هتكلم عن رجال الدولة الحاليين و دة مش خوف مني لأتكهرب ولا أتعذب...لأ...لإني أنا هتكلم عن الشعب...مش الشعب هو اللي قام بالثورة؟..الشعب هو اللي يهمني...الشعب هو اللي بيثبت وزير في مكانة و بيخلعة...الشعب هو اللي بيمشي رئيس و حاشية و جماعة بحالها....و لأن الشعب هو اللي لية الكلمة الأولي و الأخيرة في كل تفصيلة في مصر....فهو هيكون محور كلامي
المهم عايزة أرجع لموضوعي و هو الثورة اللي بقت ثورة بالصدفة البحتة
ثورة غير منظمة تماماً...الثوار نزلوا و مكنوش متخيلين إنهم يقدروا يطيروا مبارك...العادلي طمن مبارك و قالة متخافش دول شوية عيال و لو بعتنالهم مزتين حلوين هيخدوهم و يروحوا هوا...فالثوار برضو مروحوش... الإخوان لقوا الدنيا بيس و أمان في الميدان فقالوا ينزلوا....مبارك طلع إتنحنح و شغل موسيقي هادية للناس و نيمهم مغناطيسي...جزء كبير من الشعب إستجاب لجلسة التنويم المغناطيسي اللي قام بيها المعالج حسني مبارك و إتعاطف معاة..الجزء التاني مصمم علي موقفة....الإخوان نفسيتهم قامت عليهم لإن الشعب تعاطف مع مبارك....أجروا كام عيل من جروب (طرق مبتكرة للإرهاب) و هوب موقعة الجمل...الناس فاقت من جلسة التنويم المغناطيسي علي جمال و ضرب...فهووووب..... مش هنمشي هو يمشي...إرحل يعني إمشي ياللي مبتفهمشي
إرحل إرحل
لحاد ما وصلنا ل
يوم الجمعة بعد العصر كلو هيدخل جوا القصر
و إبتدت الحشود في الزحف نحو قصر الإتحادية
ومن قصر الإتحادية إلي مذيعة التلفزيون المصري و بيان هام من رياسة الجمهورية
قرر الرئيس محمد حسني مبارك تخلية عن منصب رئيس الجمهورية
نقطة
ال ٣ سنين اللي بعد الثورة
أنا بتكلم كمواطنة مصرية عادية جداً و مليش دعوة ولا بأحزاب ولا بديموقراطية ولا بتوريث ولا بالكفتة دي كلها
أنا اللي أعرفة ان الثورة قامت عشان عيش..حرية..عدالة إجتماعية
و ولا حاجة من التلات حاجات دية حصلت
حقيقي ثورة ٢٥ يناير حققت عكس مطالبها
الناس زادت فقر
الشباب اللي مش لاقي شغل لسة برضو مش لاقي شغل بس مكتسبات الثورة أضافت للعاطلين مجموعة كبيرة من شباب كانوا شغالين و اتقفل مكان شغلهم نظراً للظروف السيئه اللي بتمر بيها البلد
بالنسبة للأمراض اللي كانت موجودة فالثورة زودت عليها الأمراض النفسية (الشيزوفرنيا) اللي بقي معظم الشعب بيعاني منها
أما بقا بالنسبة لحوار إن الثوار كانوا عايزين البلد تتنفس حرية و ديمقراطية فهي الحمدلله البلد دلوقتي بقت تتنفس سجاير كيلوباترا سوبر و تحبي النفس جواها لحسن تتحبس
أما بالنسبة للنظام ذو الأيدي المرتعشة اللي كان موجود زمان فالثورة كرمتنا برئيس وزارة ذو أيدي و أرجل و أنف و أذن مرتعشين..و الريس لسة مجاش و لما ييجي بقي هنشوف إية نظامة مرتعش ولا؟؟
أطفال الشوارع لسة منورين الشوارع
بالنسبة ل (التوريث) فمبدأ التوريث دة أصلاً وراثة في الشعب المصري...چين بيحملة دم جميع المصريين...بدليل إن أي صحفي كبير بيشغل إبنة صحفي معاه في نفس الجريدة بالرغم من إن إبنة ممكن يكون مش كفأ بس الأسم الثلاثي كفيل بحل موضوع الكفاءة دة...و هكذا في الشركات و المستشفيات و القنوات الفضائية و الجامعات...دا حتي في سوق الخضار الست اللي بتبيع أوطة بتخلي المكان اللي جمب فرشتها لبنتها...التوريث دا نظام المصريين....و إذا أردتم تغييرة فإبدأوا بنفسكوا...بأي وش ننتقد الرؤساء و احنا أصلاً العيب مالينا و بنعمل زيهم...بنورث المناصب لولادنا لمجرد إنهم ولادنا....بلد أصبح فيها المؤهل للحصول علي الوظيفة هو (الإسم الثلاثي) فقط لا غير
أما بقي بالنسبة للتزوير فا أنا مش هتكلم!! التزوير دا رياضة في مصر حاجة كدا زي كرة القدم و البالية
أما بقي لأهم سبب من أسباب قيام (ثورة الصدفة البحتة) هو قتل الداخلية ل(خالد سعيد)
فالثورة قامت عشان تاخد حق خالد سعيد من الداخلية
فالداخلية إعتذرت و حاولت تعوض خالد سعيد عن مقتلة
و قامت بعتالة شباب و بنات و أطفال كتيييير عشان ميزهقش...ونبي الداخلية بنت حلال!! خافت عالمرحوم يزهق فقالت تبعتلة صحابة و صحباتة...كم أنتي رائعة أيها الداخلية!! و إحنا وقتها كنا ظالمنها
لأ و الجميل أوي جملة (الثورة مستمرة) مستمرة إية الله يخرب بيوتكوا هتودونا فين تاني؟؟
وحيات أبوكوا كفاية أوي لحد كدا
أو لو عاجبكوا الشعار دا تقدروا تضيفولوا كلمة (في النفخ) هتكون أجمل والله
الثورة مستمرة في النفخ
الله!! أيوا كدا
مكتسبات (ثورة ٢٥ يناير) المصرية هي
مقتل معمر القذافي
البشير قفش علي الشعب السوداني و عايرهم بإنه هو السبب في معرفتهم بالهوت دوج
بشار الاسد خد حبوب الهطل و نازل نسف في شعبة
و أخيراً (كارت البنزين الذكي المدعم) ذو اللون السماوي المدهش
فأكيد إخوانا اللي نزلوا إنهاردة يحتفلوا بذكري ثورة (٢٥ يناير) نزلوا عشان كارت البنزين!! أكيد صح؟؟
تحيا مصر
للأسف ثورة (٢٥ يناير) كادت أن تكون ثورة لولا أن لوثها السعي لإعتلاء (كرسي الريس) الخالي
كلوا بقي يروح ميدان التحرير عشان يركب ميكروباص الثورة اللي هيوصلة لقصر الإتحادية
و في النهاية ميكروباص الثورة تاه...تاه لأن السواق مكنش عارف الطريق و لما سأل الأئتلافات اللي راكبة معاة عن الطريق...كل إئتلاف فيهم قال رأي مختلف عن التاني...و تحول الموضوع لخناقة....كل مجموعة فيهم مصممة إن هيا اللي صح و إن الباقي عملاء و خاينين و قابضين عشان يتوهوا ميكروباص الثورة....فالسواق معرفش يمشي من آنهي طريق لإن الركاب اللي المفروض إنهم يدلوه إنشغلوا بخناقات و مزايدات مختلة...فتاهوا...و تاه ميكروباص الثورة معاهم
تاه
رحم الله الشهداء
رحم الله الأحياء..فنحن حقاً نستحق الرحمة
قصر الإتحادية يا أسطي؟؟؟
لا يا عم مبروحش...دا الطريق للقصر لبش و أنا عندي عيال
