عندي سؤال لكل مستخدمي الفيسبوك
حياتك اللي انت بتوريها للناس عالفيسبوك هي نفس حياتك اللي إنت عايشها؟
أكيد لأ
لما بتشكري جوزك علي خروجة كنتوا خارجينها مع بعض بتبقي فعلاً إتبسطي ؟؟ ولا مجرد بتبيني للناس مدي السعادة اللي إنت أصلاً مش عايشة ربعها؟؟
لما بتكتب لمراتك كومنت تقولها فية مثلاً: إنها حبيبتك و قمر و أحسن زوجة و إنك أسعد زوج في الدنيا و الكلام إياة دا...بتبقي فعلاً قاصدة؟؟ ولا برضو زيك زي الحالة اللي قبلك؟؟
لما بتعملي شير ل بوست رومانسي و تقومي عاملة تاج لجوزك...بتبقي فعلاً حاسة الكلام اللي في البوست دا؟؟ ولا مجرد مسرحية عالناس اللي عندك؟؟
طيب سؤال تاني
إحساسك إية لما ييجي عيد ميلادك و تلاقي كل صحابك كتبولك هابي بيرزداي و الكلام الآلش دا و تلاقي جوزك...حلااااقة
طبعاً بيبقي احساس قذر جداً صح؟؟
و طبعاً بتروحي تطلعي عينة عشان يكتبلك حاجة لزوم المنظرة قدام ال ٣٤٠ فريندز اللي عندك..صح؟؟
و طبعاً هو بيقوم داخل كاتبلك ستاتس عندة و يعملك تاج فيها عشان يزود عدد المشاهدين و أهو بدل ما كانوا ٣٤٠ فريند اللي عندك بس فيزود عليهم ال ٤٠٠ فريند اللي عندة و أهو كل ما نسبة المشاهدة زادت كل ما النكد هيقل من علية
صح؟؟
احساسك اية بقا لما تعرفي إن كل البنااااااات و الولاااااد اللي عندك بيبقوا عارفين إن الستاتس اللي جوزك كتبهالك دي بيكون ليها تفسير من إتنين
التفسير الأول: كتبها تحت قهر السلاح...بمعني بوزك و هو سلاح المرأة الأول هو اللي خلاه يكتبها..و في الحالة دية هيكون بوزك هو اللي كتب مش هوا
التفسير التاني: إن إنتي بشحمك بلحمك ببوزك معاكي الباسوورد بتاعة الأكونت بتاعة فدخلتي زي الهبلة و كتبتي الستاتس و عملتي تاج لنفسك
و في الحالتين...مش هو اللي كاتب
إحساسك اية بقا إن إحنا كلنا عارفين كدا لإننا كلنا كدا
و هو دا بقا موضوعي
إحنا بقينا نبذل مجهود رهيب عالفيسبوك عشان نبين لبعضنا إننا أكتر ناس مبسوطين في العالم
مع العلم إننا والله العظيم لو بذلنا نص المجهود دا في حياتنا الخاصة الحقيقية...حياتنا هتختلف تماماً
والله هتختلف و أنا متأكدة إنها هتختلف
يا جماعة والله الفيسبوك مش مقياس...مش مقياس لأي حاجة لإنة كلة زيف...كلة كدب و تمثيل
أنا فاهمة والله إن الناس اللي بتكتب كدا بتحاول تلهي نفسها و تحسس نفسها إنها مبسوطة
لكن مينفعش كدا
والله إحنا كلنا أصبحنا مدمني مسلسل (أنا أسعد زوجة و وجوزي بيحبني طحن) كفاية بقا كدا
كفايانا بقا بيائة...دا أحنا بقينا والله ولا البت (نوجا) بتاعة صفحة أنا جوزي بيعشقني
حياتنا الخاصة لابد أن تكون خاصة
أنا أساساً بقول الكلام دا لنفسي قبل ما أقولهوكوا
فعلاً و بكل صراحة أنا حاسة إني في الفترة الأخيرة من حياتي بقيت بخرج مع صحابي عشان أعمل تشيك إن...وأتصور...و أرجع أنزل الصور...و أقعد أستني اللايكات و الكومنتات و ليلة أمة سودا معايا اللي معملش لايك ولا كتب كومنت...وش بفضل أشتم فية و بقعد أقول (يخرب بيت النفسنة) معرفش لية بعمل كدا؟؟ بس أصل أنا متعنتة جداً في حتت اللايكات دية بصراحة...اللايكات مصدر السعادة بالنسبة لي
لأ والموضوع اللي خلاني أتأكد من إن حالتي حرجة...هدايا جوزي ليا
لما جوزي بيجيبلي أي حاجة.....فرحتي بإني ها أصورها عشان أنزلها عالفيسبوك بتبقي أكتر بكتييييير من فرحتي بالحاجة نفسها....لدرجة إني ساعات والله بنسي أشكرة مع إنة بيكون واقف قصادي...بس اللي عمري ما أنساة إني أشكرة عالفيسبوك...بأكتبلة شكر طويل عريض و بعديها أقعد أرزع في قلوووووب كتير...مع إنة واقف قصادي...بس بنسي...بنسي!! والله بنسي أشكرة وجهاً لوجة... لإني أصبحت مدمنة فيسبوك
طب هو أنا لية بقيت كدا؟؟
لية بجد؟؟ دا الموضوع وصل معايا لإني بقيت أصور كيس الشيبسي اللي جوزي جابهولي دا حتي زبادي لاكتيل بالفاكهة برضو بصوروا...و أقوم كاتبة شعر تحت الصورة...حقاً أنا إنسانة أوفر..بس كيوت والله
أنا عارفة إن فيه ناس كتير زيي
بس أنا عندي الجرأة إني أقول الحقيقة و أواجة نفسي...بحقيقة إدماني للمنظرة الفيسبوكية
الناس اللي هتقرا كلامي دة...نوعين
النوع الأول هيضحك و هيقول (إية دا!! دا أنا بالظبط) و النوع دا أنا بأحترمة جداً
النوع التاني هيستنكر أوي كلامي و هيعمل فيها (مهند و نور) بس هو من جواة مقتنع إنة (مدمن منظرة فيسبوكية) زيي بس بيكابر و النوع دا أنا كنت بأنتمي لية لحد ما ربنا تاب عليا و هداني للطريق الصواب
عموماً
سواء إعترفت بكونك (مدمن منظرة فيسبوكية) أو لا
فحياتك الخاصة أهم
والله أهم
يا مدام...ركزي مع جوزك و لما تعوزي تحبي فية حبي فية بينك و بينة و لما يجيبلك هدية أشكرية و انتي باصة له في عينة...و لما ييجي عيد ميلادك خلية يكتبلك الكلام اللي إنتي نفسك إنة يقولة في ورقة و شيليها في درجك..و أبوس إيديكي أوعي بعد ما يكتبها تقومي مصوراها و منزلاها عالفيسبوك...ونبي خلي مشاعرك بينك و بينة...مش بينك و بين ال ٥٠٠ فريند اللي عندك و عندة!!..و أرجوكي خلي لغة الحوار اللي بينك و بينة هي العينين و الحضن...مش اللايك و الكومنت
صدقوني والله حياتنا الخاصة أولي بالمجهود الفظيع اللي إحنا بنبذلة عالفيسبوك دا
حياتنا أهم
و صدقيني والله يوم ما هتبقي مبسوطة في حياتك مش هيفرق معاكي الناس اللي عندك ولا اللي عندة
ها ممكن بقي تتبسطي في الحقيقة و تسيبك خالص من الفيسبوك دا؟؟
ممكن تفكك من الناس خالص...أصل إية اللي هيفيدك لما تلاقي ٦٠ لايك و ٥٤ كومنت مليانين وشوش بتغمز و قلوب علي ستاتس إنتي كاتبها و إنتي عارفة إنها مش حقيقية؟؟ ساعتها هتتبسطي؟؟
هو إحنا لية كلنا بنشوف نفسنا بعنين الناس؟؟ لية بجد؟؟
مش مهم الناس شايفانا اية
المهم إحنا شايفين نفسنا إية
صدقيني والله...إنتي أهم حد عند نفسك...خدي بالك أوي علي نفسك...و حاولي...حاولي تبني حياتك و تخليها صورة طبق الأصل من الصورة اللي إنتي راسمها عالفيسبوك
