عم سيد عامل بسيط في بنزينة توتال بأبو داوود الظاهري
أول مرة شفتة كان أمبارح
كنت رايحة عشان أغسل عربيتي و لقيتة واقف مهموم أوي...كان مكشر بطريقة خلتني أزعل عشانة
رحتلة و سألتة مالك يا والدي؟
فإبتسم وقالي مفيش يا فندم
قولتلة: طب إسمك إية يا والدي
قالي: سيد...عم سيد
عم سيد كان صعبان عليا جداً
كان نفسي أوي أضحكة...كان نفسي أفرحة
إتصرفت بطريقة طفولية عفوية جداً
أنا كنت ماسكة في إيدي تفاحة كنت هفطر بيها
فمديت إيدي ل عم سيد و قلتلة: عم سيد إتفضل التفاحة العسل دي
ضحك جداً
قمت والله نطيت في مكاني و قلتلة: يااااه أخيراً ضحكت
قلتلة أنا مبسوطة جداً إنك ضحكت...و قلتلة: لعلمك يا عم سيد التفاحة دي كانت فطاري...و لعلمك كمان أنا عمري ما برضي أدي التفاحة بتاعتي لحد...بس إنت عادي...مدام هتضحك كل يوم هاجي أجيبلك تفاحة
فضحك جداً
و مد إيدة خد التفاحة و قالي: ونبي إنتي اللي عسل
أنا مشيت من البنزينة و كنت مبسوطة جداً...إن عم سيد ضحك
أنا عارفة إن الموضوع ممكن يثير تريقتكوا و تقعدوا تقولوا يخرب بيت التمثيل قال اية مبسوطة إن عم سيد اللي متعرفهوش ضحك و مبقاش زعلان!! بس أقسم بالله العظيم إني في قمة سعادتي إن عم سيد ضحك
بجد والله العظيم مفيش أجمل من إنك تهون علي حد مشكلة...مفيش أجمل من إنك تخلي واحد مكشر يبتسم...خلي مكانك جمب الناس اللي متعرفهمش قبل اللي تعرفهم...الغلابة قبل النضاف المتبرفانين.....خليك سند الناس الغلابة..أقف جمبهم..صدقني هتتبسط لما تبسط الناس
ولو مش مصدقني...جرب
