بعد ثورة ٢٥ يناير ظهر مليون و تلتميه و ستين ألف حزب سياسي....مبارك كان كابت الناس ياعيني...فا أول ما إتوكل علي الله بقا كل يوم يطلع حزب جديد...حتي يا عيني الناس اللي في بيتها مرحموهاش..قالوا عليهم (حزب الكنبة)...الناس يا عيني بقت عايزة تقول كلمة حزب وخلاص
و أي حد يكلمهم يقولك حقوق الإنسان و حرية الرأي
المشكلة هي إن كل من نكش شعرة و لبس بنطلون چينز فاتح يوسد و لبس نضارة فريم بلاستيك من عالرصيف بقي ناشط و يلم ستة سبعة من صحابة الفاضيين اللي مرمين علي قهوة كتكوت و يقوموا عاملين حزب..و يعارضوا أي حاجة...فالحزب يتشهر و يظهروا كل يوم في برامج حوارية و يبقوا نجوم
الواد من دول يكون حسابة اللي عالنوتة بتاع قهوة كتكوت لسة متقفلش و هوا ناشط أوي و بيطلع في تريليون قناة..طب يلا إنت إدفع الفلوس اللي عليك...يقولك معترض...ياض إدفع ياض...يقولك يسقط السيسي...سيسي مين يااااض يا إبن ال***** هو حد جاب سيرة السيسي بنقولك هات الفلوس اللي عليك...يقولك عايزنها دولة مدنية...و هكذا تضيع الحقوق
هذا ما تفعلة الأحزاب السياسية في مصر...كتر إعتراضهم علي أي و كل حاجة بيضيع أصل الموضوع...أصل الموضوع اللي هوا مصلحة مصر...الحزب من دول يفضل يجادل و يناكف و يعافر و يعترض و يثور و يعمل وقفة و يحتج و في الآخر ولا هما أصلاً عارفين هما عايزين إية ولا سايبين البلد تهدا
الأحزاب السياسية اللي موجودة حالياً بتفكرني بعواميد النور اللي موجودة في بلدنا بتنور الصبح في عز الشمس ماهي طالعة و بليل في الضلمة تلاقيها مطفية...أهو الأحزاب بتوعنا كدا برضو لما المفروض يكون ليهم موقف بيطفوا...بيختفوا تماماً و لما تكون الدنيا ماشية ملبن تلاقيهم هوب نوروا و إعترضوا و طلعوا في ميت برنامج و نحن نشجب و ندين...ندين إية يا ولاد الهبلة إنتوا؟؟ و تيجي تقولة نص كلمة يقولك أنا من النُخبة...نُخبة مين ياض..نُخبة دي تبقي خالتك
قالوا حرية التعبير عن الرأي قلنا ماشي...حقها ولا مش حقها؟؟...حقها يا أبو كمال..حقها...بس لما الموضوع يقلب لإن كل من لقي نفسة عاطل يقوم لابس لبس النشطاء و لازق كلمة نُخبة علي قفاة و يفضل يقول أراء سياسية تنم عن جهل و تخلف عقلي يبقي لأ بقي...و كدا أوفر علي رأي ميس ميرفت
الحياة السياسية الآن في مصر تعاني من مراهقة متأخرة...ما يحدث الآن في مصر من ظهور كل ساعة حزب بيعارض الحزب اللي قبلة هو مراهقة متأخرة...يعني هو إحنا ذنب أمنا إية؟؟ العادلي و أمن الدولة كانوا مطلعين عين أبوكوا و اللي كان بيقول رأية كان بيفضل بعديها يقول آاااه للصبح...من الملاحظ إن أول ما العادلي مشي و تم حل جهاز أمن الدولة (ظاهرياً) بلاعة الأحزاب السياسية طفحت نُخب
و الوضع لو فضل علي كدا البلد هتغرق في مجاري النُخب و الأحزاب
إحنا كشعب مصر لازم نتكاتف و نلم من بعضينا عشان نجيب سباك يسد بلاعة الأحزاب السياسية
بعض النُخب بيعترضوا علي الدستور...هاهاهااا...أصل المادة ٥٦ و المادة ٥٧٨٨ و المادة ٣٤٤ مش حلوة....مادة إية ياض منك له!! و إنتوا مال أهاليكوا أصلاً بالدستور؟؟ هو إحنا سمعنا كلمة دستور دي غير بعد ما مبارك مشي .. ماحنا كنا عايشين و زي الفل ولا كنا بنسمع عن دستور ولا نيلة...خلاص بقي كلنا بقينا تشي جيفارا!!....حاجة تأرف بجد!! بتعترضوا علي إية؟ لا بجد إية وجة اعتراضكوا؟؟ هو إنتوا عارفين انتو بتقولوا لأ علي إية؟؟ ولا لأ و خلاص؟
قالك الدستور!! دستور اية!! قالك المواد مش عادلة.. مش عادلة إية ياض إنت!! متخرسوا بقا و تتهدوا
إتهدوا بقا بجد...الواحد كفر...ثورات و مظاهرات و حظر تجول و سرقات و إحتجاجات و وقفات و ناس عمالة تموت
كفاية بقي...كفاية
كفاية إحنا قرفنا
كفاية بقي مراهقة سياسية
و من الملاحظ برضو إن أكثر الجمل شيوعاً في المرحلة العكرة دي هي جملة (لا لحكم العسكر) و كلمة هنقاطع...أي حاجة هنقاطع
يا أهل الخير إحنا في الحوارات السودا دي من أيام ثورة ٢٥ يناير
إحنا بقالنا في بلاعة المظاهرات من أياااام ما بنتي كانت رضيعة و لسة هتبتدي تدوق التفاح و مش تفاح عادي لأ تفاح مسلوق
و بنتي دلوقتي بتدخل المطبخ تسلق فرخة و تاكلها و تعمل ملوخية علي شوربة الفرخة و تشهق لطشة الملوخية
و إحنا لسة واقفين...معترضين...ثائرين
كفاية هم بقي...إرحموا أبونا وقفات...أقعدوا بقا والله هيجيلكوا دوالي
أرجوكوا نفسي أوري بنتي مصر أيام ما كانت مصر الفاسدة المنهوبة
بدون مظاهرات
بدون إحتجاجات
بدون وقفات
بدون إضافات
بدون أحزاب نص كم
مصر المنهوبة المسروقة بدون أي أضافات...ينفع؟؟
مصر وبس
أقسم بالله العظيم ان الأحزاب اللي موجودة في البلد بتفكرني بالظبط لما تكلم كووك دوور و تبقي مستعجل و تطلب الأوردر و خلاص الرصيد هيقطع فتلاقي التنح البلط بتاع كووك دوور يقولك (طب تحب تجرب حلقات بصل...طب كولسلو...طب مخلل...طب حضرتك تحب آبل پاي...تشوكليت كييييي....) ....كول إندد...عفواً لقد نفذ رصيدكم...الرصيد خلص ولا إنت اديتهم العنوان ولا الأكل هيجيلك ولا كووك دوور هيخليك تاخد حلقات بصل ولا وصلت لأي حاجة غير إن رصيدك خلص
هو دا حالنا بالظبط....نُخب عمالة تعترض...و تقول لأ...نُخب عمالة تضيع في بلدنا...و في الآخر لا هنوصل لحل...ولا البلد هتقف علي رجلها...ولا النُخب هتعمل اللي هي عايزاة
مجرد تضيع وقت
كلنا هننزل نصوت ب نعم علي الدستور
نعم مش ضعف مننا
نعم مش جهل مننا
لكن نعم لوعي زايد مننا
نعم لإننا عايزين بلدنا تقوم بقا
نعم لإننا مش عيال بتوع هق و مق و بنحب نعترض لمجرد إننا نتشهر و الأضواء تسلط علينا
نعم لإننا عايزين رئيس بقا يبجي و مجلس شعب و شوري و وزارة محترمة بدل الوزارة المهلبية الطرية اللي عندنا دي
عايزين نعيش بقا
عايزين نعيش
نعم للدستور...نعم لرئيس محترم.....نعم لإلغاء كلمة (معترض) فقط لبعض الوقت
نفسي بقا في بلد سادة
بلد سادة من غير إضافات
أنا هقول نعم للدستور...و إنت؟؟
