حياتي بقت جميلة و إتغيرت تماماً للأحسن من وقت ما فكرت في موضوع دفن الميت
طبعاً أنا عارفة إنكوا ممكن تكونوا مستغربين شوية من العلاقة بين أسلوب حياتي و موضوع الدفن....و تحديداً إنتوا أكيد فاكرين إني هقولكوا إني قررت إني أكون بنت جميلة مع كل الناس علي أساس إن الدنيا فانية...بس لأ...مش موضوع فناء الدنيا هو اللي غيرني...أنا هفضل زي ما أنا بحب اللي وقف جمبي و مش هسامح اللي كان خسيس معايا...أنا كدا...عموماً أنا حاسة إن مسار الكلام إنحرف بعيد عن الموضوع الأساسي اللي كنت عايزة أتكلم فية...بالنسبة لموضوع حياتي اللي بقت حلوة بعد ما فكرت في الدفن هو إنتوا ممكن في الأول تحسوني بهِس في أي هتش بس والله لما تسمعوا بقيت الموضوع هتعرفوا إني بهيس مش بهِس...لأ والله بجد بقا لما تسمعوا وجهة نظري حياتكوا إنتوا كمان هتبقي حلوة و هتودعوا المشاكل خالص....بصوا يا أساتذة هو الموضوع مكلكع و عشان نقدر نكمل فية محتاج منكوا و إنتوا بتقروا شوية تركيز و كيس دوريتوس..قشطة؟؟
كلو يركز
كلو يفتح الدوريتوس
كلك واحدة في بقك..واحدة بس...متحفش
يلا بينا؟؟
هو ربنا أمرنا إن لم حد يموت ندفنة صح؟؟
لما فكرت في الموضوع دا قلت إن أكيد ربنا لية حكمة و لية رسالة عايز يوصلهالنا...هاستشهد علي كلامي بمثال صغير هوضح بيه أنا أقصد إيه...المثال هو موت الأم....ربنا عارف إن الأم هي أهم حد في حيات كل الناس صح؟؟ بكل بساطة كان ممكن ربنا لما الأم تموت يأمرنا بإننا نحنطها و نفضل سايبينها معانا في البيت..صح ولا لأ؟؟ بس ربنا كان عارف إن لو إحنا حنطنا الميت و خليناة قدامنا إننا كدا عمرنا ما هننسي...طول ما إحنا شايفنة قصادنا عمرنا ما هنعرف نطلع من أزمة أنه مات....عمرنا ما هننسي...و هنفضل موجوعين و كل ما الوقت يعدي هنتوجع أكتر...لما تحصلك مشكلة كبيرة أوي في حياتك و تدخل جري أوضة أمك و تلاقي جسمها بس...و مشكلتك مش مخلياك تفتكر إنها ميتة...الله ماهي موجودة..و تبتدي تحكي و تشتكي لأمك...و بعد ما تخلص كلامك تبقي مستني إنها تحضنك و تطبطب عليك....و تفضل باصص لها تقولها يا أمي ردي...يا أمي حليلي مشاكلي...طب يا أمي حتي أحضنيني...و لما متلاقيش رد ساعتها هتبتدي تفتكر إنها ميتة بقالها كام سنة و إن الموجود دا جسمها...جسمها و بس.....ساعتها وجعك و حزنك علي موت أمك هيكون كأنها لسة يادوب ميتة...الحزن كل يوم هيتجدد...طول ما أنت شايفها قصادك حزنك هيزيد...مش هيخلص...ساعتها هتحس بإية لما تفضل قاعد في بيت و أمك معاك بس إنت لوحدك؟؟ تخرج و ترجع و هي في مكانها...تيجي تتغدي ولا تتعشي و هي برضو في مكانها...هتعرف تعيش؟؟
و لما الأيام تعدي و تفوت سنين...هتكون نسيت؟؟
هتقدر تنسي حاجة شايفها عينيك؟؟
هتقدر تنسي حاجة لامسها بإيديك؟؟
أكيد لأ
و عشان كدا ربنا قالنا إن لما حد يموت ندفنة...ندفنة رحمةً بينا...ندفنة عشان نعرف نعيش...ندفنة عشان ننسي....ما هو لما يكون تحت التراب أكيد هننسي....آه مش هننسي بسهولة...بس أكيد هننسي...هننسي وجودة...بس مش هننسي إحساسنا بية... بس في المجمل بننسي و بنعيش و بيجلنا وقت بنكون بنضحك ويا صحابنا و مبسوطين و بيجيلنا وقت نفتكر اللي مات و نزعل و نبكي...و نرجع تاني ننسي و نتشغل...و هكذا...الحياة بعد فقدان شخص عزيز و غالي عندك بتتحول إلي كراسة إحصاء المنحني شوية بيكون عالي و شوية بيكون منخفض جداً لأنه بيكون وقتها إفتكر اللي كان بيحاول ينساه
هأرجع تاني لموضوعي...اللي هوا أسلوب حياتي اللي إتغير بسبب تفكيري في موضوع الدفن...لقيت إن ربنا أمرنا إنة بالرغم من شدة حزني مثلاً علي وفاة أمي ولا أبويا إني أكمل علي حزني دا بإني أودع وجودهم للأبد بإني أدفنهم!! غريبة أوي
بس إستنبطت إن ربنا من شدة حبة لينا قالنا نعمل كدا عشان إحنا ننسي و نعرف نعيش
ربنا قالنا نعمل كدا رفقاً بينا
صح؟؟
فكرت في إني أطبق فكرة الدفن في حياتي...و بالأخص في المشاكل اللي بتقابلني و الشخصيات اللي بتخذلني
مثلاً لما حد يظلمني وييجي عليا
بموتة من فكري و بإختياري....بأخد قرار إن خلاص الشخصية دي ماتت...آه هي عايشة...بس بالنسبة ليا بح...فينيتو...ماتت...و إكرام الميت دفنة....و أقوم هوووب شاحناة تحت التراب...و ذوق مني بوزع قُرص و بوريك و يوستافندي و رحمة الله عليك ياللي خذلتني
جربوا تموتوا اللي مضايقكوا من تفكيركوا...جربوا تدفنوا مشاكلكوا تحت التراب
و إنسوهاااا
و متقوللوليش مش عارفين
مينفعش تبقوا عارفين تضايقوا و عارفين تتجرحوا و عارفين تتوجعوا و عارفين تتظلموا و عارفين تعيطوا بالساعات و عارفين تبهدلوا نفسكوا
و تبقوا مش عارفين تحبوا نفسكوا
صعب أوي إنك توجع نفسك عشان حد أصلاً كان سهل عندة أوي إنه يكسرك و يدوس عليك
صح ولا إيه؟؟
يلا بقا حب نفسك شوية و أعمل زيي
قشطة؟؟
يلا بقا كملوا الدوريتوس دا لو كنتوا لسه منسفتوش أمه
