رسائل لبنتي

بكرا بإذن الله تعالى هيكون أول يوم لبنتي في الحضانة....جوايا فرحة بإنها كبرت و ابتدت تمشي في طريق نحو مستقبلها ولكن في النقيض إحساسي و فرحتي بإنها إبتدت تكبر ولد شعور عندي بالخوف والله لا يوصف....خوفي عليها مش من الحضانة ولا إنها هتبكي شوية ولا إني لأول مرة منذ ٣ سنوات نفترق حتي ولو ل ساعة إنما خوفي عليها لإن أول كام خطوة ليها بتجيب الباقي حضانة تجر مدرسة جامعة شغل يجيب جواز عيال و هكذا أنا فكري مش متخلف لكن أنا عايزة بنتي أكون أنا و أبوها سقفها و غطاها مش عايزاها ولا تتجرح ولا تتهان و لا حتي تشوف قذارة الدنيا مش عاوزاها تتعامل بطيبة و تتوجع بعدها زيي أنا.....نفسي والله لو بإيدي أفضل غطاها و أول ما يجي جرح نحيتها ولا إهانة آخدها أنا و قبل ما تنزل دمعة واحدة من عيونها أكون أنا منديل لعينها و قبل حتي متقول يا أمي أكون معاها حمياها من كل شر.....نفسي أخدها تاني جوا مني متغيبش ثانية عني خالص و لو زعلت يكون بس مني أنا أو من باباها.....قلقانة عليكي يا بنتي يا قلبي.....بس في حاجة واحده مطمناني إنها كل يوم بليل وهيا بتنام تقولي مامي أنا بحب ربنا أوي..آه والله بتقولي كدا و مدام بتحب ربنا أكيد هيكون ربنا بيحبها......والله لو أضمن إن بنتي  متشوفش جرح ولا عيونها الجميلة تطولها الدموع لو أضمن إن ولا يعرف الحزن عنوان ليها لو أضمن إن عمر ما ف يوم يهينها حد لأركبها صاروخ و أزقها لمستقبل جميل مفيهوش وجع