رحلة البحث الشاقة عن ولد
الثنائي المصري الفريد بعد الجواز بيبتدوا في رحلة بحث شاقة عن خلفة الواد
الرحلة بتبتدي من أول ما المدام تحمل...يفضل يقولها يلا بقي شدي حيلك و هاتلنا حمزة و لا عبدالله...و يبتدي بقي في ترديد مجموعة من الجمل الخايبة....زي: أنا عايز راجل تتسندي علية بعد ما أموت (جاك موتة تشيلك يا شيخ!! قال يعني مراتك مسنودة عليك أوي و انت عايش! هو إنت أصلاً بتعمل أي حاجة لمراتك!!)...أنا نفسي في واد كدا ينزل معايا في كل حتة (و إبقي تف علي وشي لو أخدتة معاك الصالون حتي!!)...أنا عايز واد يشيل إسمي و يفضل إسم عيلتي في الدنيا بعد ما أموت (و تلاقي اسمة و اسم عيلتة زُقلط الخُرُنج...خُرُنج!!! و عايز إسمة يفضل في الدنيا!! أمال لو كان إسمك عِدل كنت عملت فينا إية!! زُقلط!! و كمان خُرُنج!!)...و كثير من جمل لا مَحل لها من الإعراب...جمل خايبة تدل علي شخص خايب
جملة (أنا عايز ولد) أصبحت هذة الجملة چين من چينات الشعب المصري...أصبحت شئ يورث من جيل لآخر...أصبحت شئ يتميز بة رجال و نساء مصر حاجة كدا زي (الكرش) اللي بيتميز بية الرجل المصري...و (الجناب) اللي بتتميز بها المرأة المصرية...الإتنين عايزين ولد ...أم جناب و المكرش عايزين ولد
ومن أكتر المشاهد المضحكة بالنسبة لي....لما بلاقي عيلة مكونة من راجل و ست و ٤ عيال كلهم بنات.....ببقي متأكدة إنهم بعد أول خلفة ما جت بنت قالوا يجيبوا تاني و تالت و رابع بحثاً عن (ولد) بس برضوا الأربعة جم بنات...و لما أسألهم انتوا لية مخلفين ٤ هو كدا مش كتير؟؟ يقولوا عزوة!! و ينكروا إنهم بيدوروا علي عبدو....و والله ببقي متأكدة إن لو تاني خلفة ليهم كانت ولد مكنوش هيخلفوا و لا تالت ولا رابع...بس أصل إنكار الثنائي المصري بحثهم عن ولد دا من أهم سمات الرحلة الشاقة
إحنا في مجتمع فية البنت زي الولد فقط في أغنية (البنت زي الولد...تيراراراااا...مهيش كمالة عدد...تيراراررراااا) في كلمات الأغنية و فقط
سؤالي بقي...لماذا هذة العقلية المتأخرة؟؟
لا بجد لية فكرة (أنا نفسي في ولد) بقت راسخة جوانا أوي كدا و بالشكل الرهيب دا؟؟
يا أستاذ يا مدام
( لِلَّهِ مُلْك السَّمَوَات وَالْأَرْض يَخْلُق مَا يَشَاء يَهَب لِمَنْ يَشَاء إِنَاثًا وَيَهَب لِمَنْ يَشَاء الذُّكُور) صدق الله العظيم
إرضوا باللي ربنا قسمهولكوا
(أصل إحنا خايفين علي البنت من المجتمع المهبب اللي إحنا فية دا)...(أصل البنت مسؤلية علي عكس الولد)....(أصل إحنا بقينا في مجتمع البنت فية حقها ضايع)...(أصل البنت مبتعرفش تشيل أهلها لما يكبروا زي الراجل)...و تعددت الحجج
كل الجمل اللي فاتت دية بيقولها معظم الناس اللي بتفضل خلفة الولاد
و ردي عليهم هيكون بمجموعة أسئلة
هو مين اللي خلي مجتمعنا مهبب؟
هو مين اللي بيقيد حرية البنت و بيفضل يحجِم في قدراتها و لأ متروحيش ولا متسوقيش ولأ متتهببيش؟؟
هو مين اللي بيخوف البنت من إنها تشيل مسؤلية؟؟
و لو شالت المسؤلية و بقت معتمدة علي نفسها برضو مبيعجبش...و الناس بتفضل تعاير و تعيب في تربية البنت اللي بميت راجل؟؟ و بيتهموها إن ملهاش أهل
سوري هو مين اللي ضيع حقوق البنت؟؟
معلش بس سؤالين كمان
لما بتروح عيادة ولا مستشفي و تلاقي راجل عجوز ولا ست عجوزة...بتلاقي مين اللي ساندهم و واقف جمبهم؟!
بلاش يا سيدي العيادة
إنت نفسك أكيد عندك أب و أم و أكيد كمان عندك إخوات بنات
ممكن تتصل بمامتك ولا باباك و تسألهم مين اللي دايماً بيسأل عليهم و شايل همهم؟؟
بلاش يا سيدي تسألهم
اسأل نفسك إنت يا راجل ياللي أهلك فضلوا برضوا يدوروا علي خلفة ولد...إنت آخر مرة رحت لأبوك و لأمك إمتي؟؟
لما أهلك بيتعبوا مش بذمتك بتكلم أختك و تقولها معلش ونبي ودي أبوكي للدكتور...معلش ونبي أمك عيانة أوي روحيلها معلش أقعدي معاها يومين...بذمتك مش دا بيحصل؟؟
من وجهة نظري إن سبب كره المجتمع المصري لخلفة البنات هو أن
الراجل المصري بيخاف من خلفة البنت لإنة لا يستطيع رؤية بنتة البريئة الرقيقة زوجة لشاب...الراجل المصري لا يستطيع تخيل فكرة أن بنتة لما تتجوز هتتعري قدام شاب...الفكرة دية خلت الراجل المصري يكرة خلفة البنات...الراجل المصري عندة فوبيا الشرف و العرض...فبيتهيألوا إن لما بنتة بتكون زوجة إنة كدا هو بقي إريال و مش راجل...من الآخر الراجل المصري مبيقدرش يشوف بنتة مكان زوجتة....و دية للأسف مش غلطتة...دي غلطة مجتمع بيسقف بإيد للولد الصايع اللي ماشي يبوس و يحضن في البنات و في الإيد التانية ماسك كرباج بيجلد فية البنت لو فكرت تعلق بوستر ل هاني سلامة ولا كريم عبدالعزيز في أوضتها...حقيقي مجتمع بيعاني من تخلف ذهني و شلل رباعي
مجتمع مش هينضف غير لما (المساواة) تسيب مكانها في المعجم الوجيز و تيجي تنور و تشرف عندنا في المجتمع...تيجي كدا و تأنسنا
غير نظرتك للبنت...لإن البنت تقدر تعمل كتير...بس إسمحلها...إديها فرصة...فك الكلبشات اللي المجتمع رابطها بيها....البنت مش مجرد معالم أنثوية و فستان عريان...البنت مخ و طاقة جبارة....البنت قوة ملهاش حدود....غير نظرتك ليها....إقلع النضارة اللي بتصنف بيها لإن إزازها بايظ...مليان شروخ و كسور كتير...دي مخلياك تشوف حاجات ملهاش وجود...و الدليل إنها مخلياك تشوف الولد بإنة الكائن الوحيد اللي بيشيل مسؤلية...و البنت إنها كائن ضعيف ذو معالم أنثوية مغرية و بس...اقلع بقي النضارة دي...إقلعها كدا...ها شفت؟؟
شفت البنت اللي هناك دي...البنت دي اللي ساندة أبوها العجوز و مدخلاة العيادة...ها شفتها؟؟
ها البنت شايلة أهلها ولا لأ؟؟
طب شفت البنت اللي ورا دي...البنت اللي شايلة بيبي و ماسكة ولد صغير في إيد و كيس مليان خضار في الإيد التانية؟؟شفتها؟؟
ها البنت شايلة مسؤلية بيتها وولادها ولا لأ؟؟
شفت البنت اللي طلعت الأولي عالجمهورية في السباحة؟؟
ها البنت رافعة راس أهلها ولا لأ؟
شفت البنت اللي ناشرين صورتها في الجورنان دية...البنت اللي ضربت الواد اللي كان بيتحرش بيها و مسكتة من قفاة وودتة القسم؟؟
ها كنت حابب تبقي والد البنت الجدعة دي؟ ولا برضوا بتفضل العيل اللي مش راجل اللي بيتحرش بالبنات لمجرد إن نوعة في البطاقة ذكر؟؟
بقي مش بذمتك لما قلعت النضارة شفت أحسن؟؟
خلفت بنت أو ولد
أرجوك ربي صح
وبلاش دا ولد يتأخر و يصيع و دي بنت فهنقفل عليها بميت ترباس و قفل
بلاش كدا
ولد و بنت
الإتنين ربنا هيحاسبهم نفس الحساب...و الإتنين ربنا هيحاسبك عليهم نفس الحساب
أنا زعلانة جداً والله لإني عارفة و متأكدة إن كلامي ليس له أي قيمة...فأنا أتحدث مع مجتمع (أعور)...عندة عين واحدة بيشوف بيها أي غلطة بسيطة بتعملها البنت....أما الولد فمهما بيعمل فهو متشاف بالعين العورة اللي مبتشوفش
يا أستاذ كلمة أخيرة من فضلك...لو إنت بتزعم إنك خايف عالبنت من الحرام و الكلام دا....فالحرام برضوا دا ساري علي الولد
إنما إنت ولا فارق معاك حرام ولا حلال
إنت فارق معاك الصح و الغلط اللي المجتمع محددة و منفض خالص للصح و الغلط اللي ربنا محددة
أرجوكوا حاولوا تنشأوا جيل محترم
أرجوكوا إذا أردتوا أن تهتموا فإهتموا بالحلال و الحرام اللي ربنا قال عليهم
مش بالحلال و الحرام اللي المجتمع الأعور قال عليهم
و أخيراً
أرجوكم إدعولي بقي إني أجيب ولد عشان يكون سند لبنتي بعد ما أموت و أهو برضو يشيل إسم أبوة
صباحكوا منجا
