عبدالرحيم علي مقدم برنامج الصندوق الأسود علي قناة القاهرة و الناس
فعلاً برنامج الصندوق الأسود بتاع الأخ المجاهد عبدالرحيم علي ينقصة الأخت هناء السمري و الأخ صاحب أطول كرافتة في العالم سيد علي
المجاهد الثوري عبدالرحيم علي في برنامجة (الصندوق الأسود) علي قناة القاهرة و الناس إبتدي يشد الأضواء من توأمة توفيق عكاشة...و الملاحظ إن الناس بتحب النوعية دي من البرامج...البرامج المليئة بالردح و الفضايح...برنامج عبدالرحيم علي لا يختلف عن برنامج توفيق عكاشة إلا في شئ واحد فقط و هو كواليتي و نقاء الصورة و بس...لكن غير كدا نفس المستوي المنحط و الأداء المبتذل و تحديداً عبدالرحيم علي و توفيق عكاشة متطابقين في البدي لانجويتش اللي بتتمثل في الكلام اللي لازم يكون معاة غمز بالعينين و خبط عالترابيزة و هزة راس فيفي عبدة أثناء الكلام و نبرة صوت مستفذة مع رفع في الحاجب الأيسر
عموماً أنا بقترح علي توفيق عكاشة خطة ليسترد جمهورة اللي سابة و راح للثوري عبدالرحيم علي...بص يا عُكش إنت تشوفلك واسطة حلوة كدا و تجيب المكالمات المتسجلة بتاعت عبدالرحيم علي و تقوم ذايعها علي الفراعين و بس كدا يا برنس...و بكدا هتسترد الجمهور تاني يا عُكش
طبعاً أنا مش هأقدر أنسي صاحب الفضل عليا في فكرتي للعكش بإنة يسجل و يذيع...تحية ل مُلهمي...الأستاذ المناضل مفجر ثورة يناير و يوليو و أغسطس و ديسمبر و فبراير عبدالرحيم عمرو و أحتكم الأمر و هأتجوزززز هاتجوووز
يا جماعة أنا بس مش عايزاكوا تظلموا الأستاذ عبدالرحيم و تقولوا إنة العين السحرية لأمن الدولة و أنة جايب التسجيلات دي منهم...لأ لأ يا جماعة...إلا الظلم..اللي حصل إن الأستاذ عبدالرحيم نفسة هفتة علي أكلة سمك بيتي...فراح إشتري كيلو سمك بلطي و نص سبيط...و لما روح البيت قام قالع البدلة و لبس الترينج و شمر الكم و هوووب فتح السمك عشان ينضفوا و سبحان الله!!و هو بيفتح أول سمكة عشان يغسلها لقا جوا بطنها كييييس كبييييييير...الكيس الكبير دا مليان سيديهااااات...و فلاشاااات...و هاردااااات...فأخينا الثوري إتخض جداً و قال (إية دا سيدهات و فلاشات و هاردات أحمدك يارب) و غسل إيدة و نزل راح السايبر اللي علي أول شارع بيتة...و فتح السيديهات و الفلاشات و الهاردات فهوبا لقا المكالمات...شفتوا بقا إن إنتوا كنتوا ظالمين الراجل و بتقولوا أمن دولة و بتاع..الله!!...مفترين بجد إنتوا
بس للأسف يا استاذ عبدالرحيم إنت أخطأت لما عرضت التسجيلات دي عالتلفزيون...أخطأت لإني شعرت و أنا بأسمع المكالمات دي بإن الدولة جمال عبدالناصر البوليسية قد عادت...شعرت بإني داخل فيلم (إحنا بتوع الأتوبيس) عارفة طبعاً يا أستاذ عبدالرحيم؟؟ حضرتك أكدتلي شعور جوايا كنت بحاول أهملة..الشعور دا أن جميعنا مراقبون.....أنا شفت إن إذاعتك للمكالمات دي ملهاش إلا غرض واحد و هو إنك توجة للشعب المصري رسالة تهديد بأن الكل مُراقب....إنت بتخوف الناس مش بتحذرهم...أصل متقنعنيش إنك عايز تكشف لنا قذارة النشطاء العساسيل اللي إنت ذعت مكالمتهم لإن كلنا عارفين مدي حقارة شخص زي مصطفي النجار و وائل غنيم مش محتاجين نسمع يعني ..أنت تتعامل مع شعب واعي و أسلوبك في إرهاب الناس أسلوب مبتذل و رخيص
كنت هاحترمك لو قمت بتقديم المكالمات اللي لقيتها في بطن السمكة البلطي للنيابة و خليهم يشوفوا هما شغلهم يا عم كرمبو إنت
لكن إنت فضلت إنك تذيع هذة المكالمات عشان تؤكد للشعب أن الكل مراقب...و أن جميعنا جابر (عادل إمام) و مرزوق (عبدالمنعم مدبولي) و أن جميعنا نعيش في مجتمع إحنا بتوع الأتوبيس
للأسف نصف الشعب بقا جابر و مرزوق و النص التاني بقا الشاويش (عبد المعطي) اللي بينفذ أوامر الظابط (رمزي بية) و هو مش فاهم حاجة...شوية يتعاطف معاهم و شوية يجلد بكرباج تِلم
و شرفك يا بلدي سحابة و هتعدي و برضو إنتي بلدي
و برضو إنتي بلدي
يا بلدي داحنا ياما خدنا منك فيها إية لو يوم نديكي..فيها إية
ليا مين غيرك يا بلدي...ليا مين
ليا مين...ليا مين
إضرب...إضرب زي ما أنت عايز...لازم الناس تعرف الحقيقة
احنا مبنوزعش منشورات..إحنا بتوع الأتوبيس
إحنا كلنا بتوع الأتوبيس....كلنا بتوع الأتوبيس
